27.10.2018

27.10.2018, कार्तिक (कतक) गटॖ पछॖ (कृष्ण पक्ष) त्रय (तृती) बटॖवार (शनिवार/शनिश्चरवार),श्री सप्तर्षि सम्वत 5094, राश वृष (चलान), ऋतु हरुद (शरद) (चलान)...अज़ छि संकट च़ोरम ति (ज़ून खसि अज़ शामन 8.1 बजि)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबात
**************************
1. मु: बोनि मुहुल तारुन
   अ: बेक्लस कथ फिकरि तारॖन्य
        छि स्यठाह मुश्किल आसान
2. मु: ब्वछि फुहॖर तॖ नॆन्दॖर पथर
    अ: ब्वछि विज़ि छि नॖ मज़ॖ
         वुछान तॖ नॆन्द्रि विज़ि नॖ
         बिस्तरॖ
3. मु: बोर छु जहनमुक पोर
    अ: ज़िम्वऻरी छि स्यठाह गॊब
         आसान
4. मु: बॊहग्नस छि बाह ग्वन
    अ: वारियाह सिफ़त आसन-
         वोल/प्रथ कऻन्सि छु कांह
         न तॖ कांह सिफ़त आसान
5. मु: बोय गव कऺन्य ब्यॆनि गयि
         थऺन्य
    अ: बोय छु ब्यॆनिहॖन्दि ख्वतॖ
          कम माय थवान
**************************
1. न्यतॖ....Lazy
2. न्यतुन...To shear animal
                (sheep)
3. न्यमुन...To bow/To nod
4. न्यमरावुन...Cause to bow
5. न्यॆनि.....Meat
6. न्यॆनि बतॖ...Meat and rice/
                 Food
7. न्यॆनि म्वंडॖज...Frog
8. न्यबर....Outside/Beyond
                 Abroad
9. न्यराहार.... Complete fast
                 ing/Fast
10. न्यॆशब्वद... Innocent/
               Irrational/Foolish
               Brainless
**************************
       गीता ज्ञान  : अध्याय-7 :
यिमव मंज़ॖ म्यॆ युस भक्ति भावॖ स्वरान
सु ज्ञऻनी म्यऻन्य असलियथ ज़ानान
बॖ तस टोठ सु म्यॆ यछ़ टोठ आसान
वॊन भगवानन गीता ज्ञान
**************************
शतवुह ओक्टूबर कुनवुहशथ तॖ सत्तऻजी द्वह छु कशीरि हुन्द म्युल आमुत करनॖ हिन्दुस्तानस सॗत्य। यि द्वह यादाशतकिस रॗफस मंज़ आव मनावनॖ राथ राजेन्द्र भवनॖ, दिल्लि मंज़। आच़ार-व्यच़ार आव करनॖ कॆंच़व महानुभावव दऺस्य। अथ दॊहस छि वनान "विलय दिवस" या Accession Day.
म्यॆ छु नॖ बासान ज़ि अथ दॊहस मुतलक आसि सानि समाजिक्यन सारिनीय बायन स्यठाह ज़ऻन्यकऻरी। रातकिस अथ प्रोग्रामस मंज़ ॴस्य अख ज़ॖ तिम ति यिमन ख़ास तजरुबॖ रूदमुत छु अमि दुहुक। बोज़नावन वऻल्य ॴस्य स्यठाह ग्यऻनी मगर बोज़न वाल्यन हॖन्ज् ॴस हना कमी। मज़मून ओस जान। यि द्वह पज़ि असि प्रथ वऺरयि मनावुन ताकि सान्यन दिलन मंज़ रोज़ि कऺशीरि हॖन्ज़ माय बरक़रार।
**************************
कऻशुर ह्यॆछव कऻशुर परव
कऻशिर्य पऻठ्य पानवुन्य कथबाथ करव
**************************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)