24.10.2018

24.10.2018, ॴशिद (आश्विन/असूज) ज़ूनॖ पछॖ (शुक्लॖ पक्ष) पुनिम (पूर्निमा), ब्वदवार (बुधवार) श्री सप्तर्षि सम्वत 5094, राश मेष (दुहचि 9.22 बजि प्यठॖ) ऋतु हरुद (शरद)(चलान), द्रठॖपऻन्च़ुक (पंचक) ति म्वकॖलि अज़ दुहचि 9.22 बजि प्यठॖ
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
**************************
1. मु: बस्ति मंज़ काजवठ
    अ: तक्लीफ़ तमि अन्दाज़ॖ द्युन
         युथ नॖ ब्यॆयन फिकिरी तरि
2. मु: बस्तॖ छ़ॖनिथ क्याह छु
         खखरायि ख़ोच़ुन
    अ: बेशर्म बऺनिथ क्याह छु पतॖ
         कऻन्सि ख़ोच़ुन
3. मु: बलाय मरगस तिलवारि
       च़ायि वरगस बंगि मंज़ नच़न
    अ: यॆलि बऺड्य छि मरान ल्वक
          ट्यन छु बोर खसान/
          फ़ज़ूल कऻम करॖन्य/राव-
          रावुन
4. मु: बंदय बंदस मंगि, आग़ॖ
         बेदार नोकर श्वंगि
    अ: भगवानस मंगनॖ बजाय
          बंदस मंगुन छि शर्मिहॖन्ज़
          कथ
5. मु: बंदॖ नय ग्वनाह करि ख्वदा
         क्याह बख्शियस
   अ: ख्वदा छु ग्वनहऻन माफ़
        करान
**************************
1. वुफ़.... Flying/Fast move
               ment
2. वपुन...To burn slowly/
               To burn from
                within/To burn
                from inside
3. वबाल.... Burden/Non-
                sense/Vexation
4. वबा.... Epidemic/Plague
5. वावेला...Lamentation
6. वाफिर/ ...Ample/Plenti-
     वऺफूर.      ful/Adequate/
                  Sufficient
7. वासकठ.... Waistcoat/
                     Jacket
8. वाह वाह.... Expression of
                  happiness/
                  Appreciation
9. वऻन्लिजि खोंट...Dearone/
            Intimate/A part of
            liver
10. वऻन्लिज....Liver/Heart/
                       Mind
**************************
       गीता ज्ञान : अध्याय-7
त्रग्वन मायायि मंज़ गिर्फितार
यिम म्यॆ स्वरान आसन लगातार
तिम सम्सारॖ सागरस तार लबान
वॊन भगवानन गीता ज्ञान
**************************
कऺशीरि मंज़ वख्तॖ अकि ॴस्य सऻन्य शुर्य मऺहलस मंज़ वारिहान
चीज़न गिन्दान रोज़ान, लऺठ्यकिंज लऺठिस, च़ूरि-च़ूरि रटनस, अन्य-क़तरि, गर्मस, क्रिक्यटस। योत ताम म्यॆ ज़्वन छु सऻन्य शुर्य ॴस्य नॖ हाकी या फुटबाल गिन्दान। सानि कोरि आसॖ खो-खो या ॳन्य-क़तरि गिन्दान आसान। यनॖ कशीरि प्यठॖ ॳस्य च़लिथ आयि, लऺग्य ब्योन ब्योन जाय, सान्यन शुर्यन गव गिन्दुन मशिथॖय या रूज़ॖख नॖ गिन्दनॖ बापथ सॊ जाय। कश्यप कशमीर सबा, गुडगांव-हस मंज़ समाजिच सीवा करन वाल्यव सदस्यव तुल अख क़दम तॖ सॊम्बरऻविख कॆंह लऺडकॖ होरॖक्य योरॖक्य तॖ बनोव यिमव अख क्रिक्यट टीम तॖ ह्यॊतुख गिंदुन। यिमन वुछिथ ह्यॆतिन बनॖन ब्यॆयन ब्यॆयन जायन ति ल्वकॖट्य ल्वकॖट्य टीम यिम पानॖवुन्य गिन्दान रूद्य। गिन्दान गिन्दान द्युत यिमव अख मुद्दा तॖ मक्सद ति  तॖ ह्यॆच़ॖख समाजिच अख बऺड ज़िम्वऻरी ति पानस प्यठ। पनॖनि चंदॖ पौंसॖ कऺडिथ ॳकिस संस्थायि यथ नाव छु के एम ई सी टी अमिच सम्पति बऺडरावॖन्य। अति युस पौंसॖ जमाह गछ़ान छु सु छु लगान सान्यन ब्यमारन हॖन्ज़ि तीमारदऻरी प्यठ। अम्युक तपसरॖ करव अलग कुनिसातॖ। बहरहाल वुछव ॳस्य यि के पी एल-7 क्याह छु। कथ छि जऻरी
**************************
कऻशुर ह्यॆछव कऻशुर परव
कऻशिर्य पऻठ्य पानवुन्य कथबाथ करव
**************************
  नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)