03.10.2018

03.10.2018, ॴशिद (आश्विन/ असूज), गटॖ पछॖ (कृष्ण पक्ष), नवम (नवमी), ब्वदवार (बुधवार),श्री सप्तार्षि सम्वत 5094, राश कर्कट (दुहचि  4.45 बजि प्यठॖ), ऋतु हरुद (शरद)
*************************
जे के विचार मंचॖ तरफॖ छुस बॖ त्वहि सारिनीय यछ़ान
     ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: अलॖ रुवनि वांगन कडॖन्य
    अ: यथ नॖ व्वमेद आसि ति
         मेलुन/अचानकन कॆंह
         प्रावुन
2. मु: बऻल्य बऻल्य फेरुन
    अ: आवारॖगर्दी करॖन्य
3. मु: बऻच़न इज़ा तॖ प्वतल्यन
         पूज़ा
    अ: पनॖन्यन तक्लीफ तॖ
          व्वपरन फ़ऻयदॖ
4. मु: बऻज़्यगारस बऻज़् गरस
    अ: युस कऻन्सि बद कांछि तस
          छु पानसॖय बद गछ़ान
5. मु: बाह त्रख श्वॊंगुन तॖ खार
         व्वथुन
   अ: बे-ग़म रोज़ुन
*************************
1. वन....Tell/Forest
2. वान....Shop
3. वुन्य....Just now
4. व्वंय....Now
5. वोन्य... Shopkeeper/
               Grosser
6. वोरॖ-न्यॆचुव...Step son
7. वोरॖ-बोय.....Step brother
8. वोरॖ-ब्यॆनि... Step sister
9. वोरॖ-मोल.... Step father
10. वोरॖ-मऻज्य..Step mother
*************************
      गीता ज्ञान : अध्याय-6  :
पॊत ज़न्मॖ ॴस्यमॖत्य रॖत्य संस्कार
यूग प्राप्ती मंज़ यिवान दरकार
स्यॆदी खऻतरॖ पऺतिमि ख्वतॖ यत्न करान
वॊन भगॖवानन गीता ज्ञान
*************************
पनॖन माजि ज़्यव ज़िन्दॖ थावॖनॖ बापथ छु ज़रूरी ज़ि ॳस्य करव पानॖवॖन्य कऻशिर्य पऻठ्य कथबात यॆलि युस यॆमिस यॆतिनस मेलि।
पनॖन्यन शुर्यन करव मजबूर ज़ि तिम करन पनॖन्यन पनॖन्यन गरन मंज़ कऻशिर्य पऻठी कथ बात पनॖन्यन गरिक्यन बऻच़न सॗत्य। कथबाति सॗत्य सॗत्य ह्यॆछन कऻशिर्य पऻठ्य लेखुन तॖ परुन ति। हॆन्दी यानि नागरीयस मंज़ छु कऻशुर लेखुन। कांह बऻथ, कांह अफ़सानॖ, कांह मुहावरॖ, कांह कथ ल्वकॖट बऺड पज़ि तिमन पनॖनि कापी  प्यठ लेखुन। कींहनय तॖ म्यऻन्य यिम मुहावरॖ तॖ कऻशिर अलफ़ाज़ अंग्रीज़ माने ह्यथ लीखिन पनॖन्यन कापियन प्यठ तॖ कऺरिन पनॖनिस मऻलिस-माजि सॗत्य अथ प्यठ पृछ़गऻर। मऻलिस माजि ति पज़ि तिमय पंदाह मिनट या ऒड गन्टॖ पनॖनिस शुरिस रूज़िथ तऺमिस ह्यमथ दिन्य तॖ तमिस वथ हावॖन्य। पनुन फ़र्ज़ ज़ऻनिथ पज़ि असि यथ कथि कन द्युन तॖ पनुन पान परज़ॖनावुन
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)