05.10.2018

05.10.2018, ॴशिद (आश्विन/ असूज),गटॖ पछॖ (कृष्ण पक्ष), काह (एकादशी), शॊकुरवार (शुक्रवार/जुम्मा),श्री सप्तार्षि सम्वत 5094,राश सिंह (शामन 7.2 बजि प्यठॖ),ऋतु हरुद (शरद)  (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: आमॖन्युक टॊट
    अ: बहानॖबाज़/कामि-च़ूर
2. मु: बान्दव कुस ज़ि चन्दॖ
    अ: द्यारव सॗत्य छि व्वपर ति
         पनॖन बनान
3. मु: बाबॖ आदमस ज़ॖ गबर
         ॳक्य रऺट आवर्यॆन तॖ ब्यॆयि
         क़बर
   अ: मतलब छु ह्यॊन्द तॖ मुसल-
         मान यिम छि बारॖन्य
4. मु: बालॖनॖय छि लाल नेरान/
         लॆम्बि मंज़्य छु पम्पोश
         फ्वलान
   अ: ग़रीब गरॖ मंज़ॖ कांह जान
        नेरुन
5. मु: बाह पंज़्य ति गऺयि शेठय
    अ: अकुय चीज़ मुख्तिलिफ़
          तऺरीकव वनुन
*************************
1. हाख बतॖ ख्यॊन....To eat
           for survival/To
           have minimum
          requirements
2. हाल....Hall/Health
               condition
3. हालव.... Locust
4. हामॖ.... A kind of weeds
5. हान..... Allegation/
             Accuse/Charge/
             Impeachment/
             Imputation
6. हानुन....To become cold
           To shrink with cold
           To freeze/To be
           chilled
7. हांठ.....Barren/Unfruit-
           ful/Unproductive
8. हांछ़.... Allegation/Taint
           Blemish/To blame
           To censure
9. हांकल...Iron chain
10. हांगुल....Stag
*************************
       गीता ज्ञान  : अध्याय-6  :
सारिनी यूगियन मंज़ॖ श्रदावान
युस पज़ि मनॖ म्योन दारान द्यान
सुय यूगी छुस बॖ स्रेष्ठ मानान
वॊन भगॖवानन गीता ज्ञान
*************************
मन गव ख्वश यि बूज़िथ ज़ि यीच़व व्हाटसाप ग्रूपव मंज़ॖ छु ॳक्य ग्रुपन "ओक्टूबर 29 Festival"  यि मन बनोवमुत ज़ि अख द्वह हफ्तस मंज़ सिरिफ कऻशिर्य ज़बान ह्यॆछॖनावनॖ बापथ थवुन तॖ अमि द्वह सिरिफ पनॖनि माजि-ज़्यॆवि मुतलक कथ करॖन्य। यि छु अख रुत ख़याल तॖ रुत क़दम आमुत सौंचनॖ तॖ तुलनॖ। म्यॆ ति आव ह्वकुम ज़ि बॖ ति करॖ जबऻन्य हॖन्ज़ॖय कथबाथ ॳज़्यकि द्वह तॖ ब्यॆयि नॖ कॆंह। अथ छि कऻशिर्य पऻठ्य वनान कॊबिस लथ कारगर यानि यी म्यॆ मुद्दा ओस ती ब्रूंठ्य युन। म्यॆ छु यॆमि ब्रौंठ ति पनॖनि सब़कॖ दऺस्य वॊनमुत ज़ि सानि यथ कऻशिर्य ज़बऻन्य मंज़ छि बाकॖयव ज़बानव ख्वतॖ शॆ मात्रायि ज़्यादॖ यिवान इस्तिमाल करनॖ लेखनॖ विज़ि यॆमि सॗत्य सानि जबऻन्य छु कऻशुर रूप बनान। सऻन्य यि कऻशिर्य ज़बान छि नागरीयस यानि देवनागरी लिपि या हॆन्दियस मंज़ यिवान लेखनॖ तॖ ब्यॆयि नसतालीकस यानि उर्दू-हस मंज़ ति यिवान लेखनॖ। चूंकि कऻशिर्य बटन हॖन्ज़ मज़हबी किताबॖ छि ज़्यादॖतर संस्कृतस या हॆन्दियस मंज़ इस्लिये छु ज़रूरी ज़ि ॳस्य लेखव पनॖन ज़बान नागरीयस मंज़ॖय।कऺशीरि मंज़ छि मुसलमान नसतालीकस यानि उर्दू-हस मंज़ पनुन फ़लसफॖ आमॖत्य लेखान।
सानि ज़बऻन्य हुन्द आदार छु शारदा लिपि। शारदा लिपि छि वारियाहन ज़बऻन्यन हुन्द ग्वड।
ॳस्य करव पनॖनि ज़बऻन्य हॖन्ज़ कथ।
यिम ज़्यादॖ मात्रायि छि:
ॶ, ॷ, ॳ, ॴ, ऒ, ऎ
यिहॖन्ज़ आवाज़ किथ पऻठ्य छि बनान स्व ननिवॖ त्वहि कॆंच़व शब्दव सॗत्य यिमन मुतलक पगाह कथ करव
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)