04.10.2018, ॴशिद (आश्विन/ असूज), गटॖ पछॖ (कृष्ण पक्ष),दऺहम (दशमी), ब्रसवार (वीरवार/बृहस्पतवार),श्री सप्तार्षि सम्वत 5094, राश कर्कट (चलान), ऋतु हरुद (शरद)
(चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: आसुन गव ॴरख बुथि
         प्यठय छु ननान
    अ: बुथि प्यठय छि मनॖच कथ
         ननान
2. मु: बानॖ हतस दीज़ि ठानॖ हथ
         ज़्यॆवि हतस कऺर्यज़ि क्याह
   अ: यॆलि कथ लूकन अथि छि
         लगान पतॖ छु नॖ तथ चारॖ
         लगान/लूख छि कथन पखॖ
         लागान
3. मु: बागि बोग नानि क्युथ टोक
    अ: बेमंदॖछ लागुन/ज़्यादॖ
          लालॖच करुन
4. मु: बांग्यन छि बांग दिन्य
    अ: गाटॖल्य छि वथ हावान न
         कि मजबूर करान
5. मु: बऻज़्य ति कऺरिव ज़ुव ति
         बचऻविव
   अ: कांह सख़ कऻम करनॖ विज़ि
         गछ़ि ज़ुवुक ति ख़याल
         रोज़ुन
*************************
1. वुनुन....To face bad luck
2. वनॖहऻर...A maina
3. वनि...... Remembrance/
                 Aware
4. वनि आसुन.....To remem-
           ber/To be aware of
5. वनि कडुन..   .To disting-
           uish/To recognise/
           To discriminate
6. वंदिथ लगुन....To sacrifice
                         oneself
7. वंदुन.....To sacrifice
8. वदुन..... To weep
9. वऺन्य दिन्य....To look for
            someone eagerly/
            To search for/To
            seek/To track out
10. वूंगुन... Weeping of dog
*************************
         गीता ज्ञान  :अध्याय-6  :
यूगी तपस्वी ख्वतॖ स्रेष्ट आसान
शास्त्र ज्ञान्यव ख्वतॖ यछ़ ज़ान
अर्ज़न च़ॖ छुख यूगी तॖ ज्ञानवान
वॊन भगॖवानन गीता ज्ञान
*************************
फिकिरी छु नॖ तरान ज़ि ॳज़्युक इन्सान क्वत कुन छु लमान। ॳज़्यकिस इन्सानस त्रॖष्णा कऻच़ाह छि बडेमॖच़, अंद छु नॖ नज़र यिवान। पेंचॖ फटनय शुर्य क्याह क्याह छि मंगान रोज़ान तॖ बुज़र्ग तॖ बुडॖ क्याह क्याह आसनॖच छि व्वमॆद करान रोज़ान इन्सान छु वाकॖय हऻरान तॖ परेशान यि वुछिथ तॖ यि बूज़िथ। जवऻनी हुन्द जोश छु बिल्कुल पज़नॖ प्यॆठी। पऻन्सुक बहाव छु तेज़ तर तेज़। क़दमन हॖन्ज़ रफ़तार छि तेज़। फुर्सत छे नॖ अख ॳकिस मेलनस सॊम्ब। अंगन ॴशनावन ताम वातुन छु दुशवार। कति सु ब्वरुत गरॖ तॖ कति ॳज़्युक छ़ॊर गरॖ। सामानॖ छु वारियाह मगर बऻच़ छि कति। शुर्यन छे नॖ अज़ कथ करनस सॊम्ब फुर्सत। शुर्य ति कति छि। कति तिम पांछ़ शे ॴठ नव शुर्य, अज़ यिमन अख ज़ॖ तिमन ति खुर्य।फ़ीस वीस बऺर्य बर्य पेरैंट बरहम। शुर्य पालान ॳस्य कमि लोलॖ सान, अख वोत चीन तय ब्याख जापान। ॳड्य छि च़्रंगान तॖ ॳड्य लाचार। प्रऻन्य पऻठ्य मेलहऻव मगर मेलनस नॖ वार। वख छु नॖ दिवान वथ यिमन हालातन प्यठ करहऻव बिहित व्यच़ार। दीन ईश्वर सारिनी पनॖन्यन पनॖन्यन कारन तार। सद्बुदि दीन सारिनी, दयस रोज़व करान ज़ारॖ पार
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)