23.10.2018

23.10.2018,ॴशिद (आश्विन/ असूज),ज़ूनॖ पछॖ (शुक्लॖ पक्ष),च़्वदह (चतुर्दशी), च़न्दॖरवार (सोमवार),श्री सप्तर्षि सम्वत 5094,राश मीन (चलान), ऋतु हरुद (शरद)(चलान)... द्रठॖपऻन्च़ुक(पंचक) (चलान)
*****************"********
नमस्कार माहरा त्वहि सारिनी म्योन। त्वहि सारिनी ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
**************************
1. मु: बऺडिस बऺड ब्वद
    अ:अक्लि कनि ति बॊड आसुन
2. मु: बऺडिथ तुलुन किसि नम
    अ: बऺडिथ कऻन्सि हावॖन्य
         लायक़ कऻम करॖन्य
3. मु: बऺडिस बॊडुय बोग
    अ: बऺडिस इन्सानस छु हिसॖ ति
         बॊड
4. मु:बडि गरि अगर तील ति
         मेलि हलम गछ़्यस दारुन
    अ: बऺडिस मॊहनिविस निश यि
         कॆंछ़ा लारि रटुन गछ़ि
5. मु: बस्ति मंज़ सिर
   अ: इन्सानस अंदर छि राज़
        आसान/इन्सान छु राज़व
        बऺरिथ
**************************
1. वाक़ा....To be situated
2. वाकॖ....Incident/Happen
               ing/Occurrence
3. वाख.....Sayings
4. वाकॖय.. Certainly/Really
                 Actually
5. वाख पालुन....To honour a
                         promise
6. वाल.....Hair/To bring
                down
7. वान........Shop
8. वाद......... Argue
9. वान बिहुन..To run a shop
10. वानॖवोल...Shop-keeper
**************************
      गीता ज्ञान  : अध्याय-7
सतोग्वन रजोग्वन तॖ तमोग्वन
यिहॖन्दि बाव म्यॆ निश पऻदॖ सपदान
यिम म्यॆ मंज़ तॖ यिमन मंज़ म्यॆ ज़ान
वॊन भगवानन गीता ज्ञान
**************************
कशमीरी पंडित लीग-7 (के पी एल-7)क्रिक्यट मैच आव त्र्यन दॊहन यानि कुनवुह, वुह तॖ अक्वुह ओक्टूबर 2018  गिन्दनॖ गुडगांवस यानि ग्वरु ग्रामस मंज़ तॖ अमि म्वखॖ ह्यॊकुस नॖ बॖ त्वहि ताम मोबायलॖ दऺस्य सबक़ वातनऻविथ। सुबॖहस श्यॆयि बजि प्यठॖ शामन श्यन बजन ताम ओसुस बॖ आसान तती। कश्यप कशमीर सबा तरफॖ छु यि कार्यक्रम चलान प्रथ वऺर्यि यथ मंज़ सानि समाजिक ल्वकॖट्य बऺड्य मर्द ज़नानॖ क्रिक्यट गिन्दनॖ बहानॖ अख ॳकिस सॗत्य मिलच़ार करनॖच कुशिश आमॖत्य छि करान। अथ मंज़ शमूलियथ करनॖ बापथ छि यिवान लूख ब्यॊन ब्यॊन जायव प्यठॖ यानि श्रीनगरॖ (कऺशीरि), ज्यॆमि, चन्दीगडॖ, गाज़ियाबादॖ, फ़रीदाबादॖ, दिल्लि प्यठॖ, गुडगांवॖ प्यठॖ, पूने, जयपूरॗ प्यठॖ वगैरा वगैरा तॖ गिन्दन वऻल्य ज़्यादॖ आसनॖ म्वखॖ छि बनान ब्यॊन ब्यॊन टीम तॖ यिम छि अख ॳकिस सॗत्य क्रिक्यट गिन्दान, मुकाबलॖ करान तॖ यनामॖ प्रावान।
ल्वकट्यन बचन हुन्द टीम, ज़नानन हुन्द टीम, नवजवानन हुन्द टीम, तॖ बुज़र्गन हुन्द टीम छु बनान तॖ यिथ पऻठ्य छु यि अख बॊड प्रोजकटॖच शक्लि मंज़ बनिथ यिवान। कथ छि जऻरी
**************************
कऻशुर ह्यॆछव कऻशुर परव
कऻशिर्य पऻठ्य पानवुन्य कथबाथ करव
**************************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)