25.10.2018

25.10.2018, कार्तिक (कतक) गटॖ पछॖ (कृष्ण पक्ष) ऒक्दॊह (प्रति/प्रथमा), ब्रसवार (वीरवार/
ब्रहस्पतवार), श्री सप्तर्षि सम्वत 5094, राश मेष (चलान), ऋतु हरुद (शरद)(चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
**************************
1. मु: बॊछ नॖ वाज़ॖवान नॊन नॖ
         बज़ाज़िवान
   अ: फ़ाकॖफ़ॊर छु ख्यनस-
       च्यनस तॖ नंगॖ-नॊन छु कपरस
       थपॖ दिवान
2. मु:बूज़िथ ज़ॊर तॖ डीशिथ ऒन
    अ: ज़ऻनिथ-मऻनिथ अनज़ान
          बनुन
3. मु: बॊछिस हून्य-माज़ हलाल
    अ: ब्वछि विज़ि छु प्रथ कांह
         चीज़ रुत बासान
4. मु: बनुन तॖ गुदरुन छु ह्यॆछना-
         वान
    अ: मुसीबतव सॗत्य छु इन्सान
         तजरुबॖकार बनान
5. मु: बंदॖ छु बशर
   अ: इन्सान सॖन्दि दऺस्य छि गल्ती
        ज़रूर गछ़ान
**************************
1. वद......Weep
2. वदॖव... Blessings/Cong-,
               ratulations
3. वदवुन..One who weeps/
               Sad countenance
4. वदुन...To weep
5. वदनावुन...To make some
               one cry/To cause
               to weep
6. वुचापॖ.. Strange/Odd
7. वऺहशथ....Terror/Rude-
               ness/Incivility
8. वहशी....Wild/Rude/Un
               civilized/Brute/
               Untamed
9. वछ....Chest/Breast
10. वछॖ दॊग...A blow on
          bosom/Breaking of
          heart with sorrow
**************************
     गीता ज्ञान  : अध्याय-7  :
अज्ञऻनी मायायि मंज़ गिर्फितार
असुर स्वबाव वऻल्य नीच बदकार
यिम क्वकर्मी छिनॖ म्यॆ बजान
वॊन भगवानन गीता ज्ञान
**************************
कै पी एल यानि कशमीरी पंडित लीग (क्रिक्यट) मैच छु व्वंय प्रथ वऺर्यि यिवान गिन्दनॖ यथ मंज़ बाह च़्वदह टीम छि  शिरकत करान। यि मैच छि गुडगांव वऻल्य यानि कश्यप कशमीर सबा वऻल्य गिन्दॖनावान। त्र्यन दॊहन छु यि मैच रोज़ान। युहुस ति आव यि गिन्दनॖ कुनवुह प्यठॖ अकवुह ऒक्टूबर 2018-हस ताम। ज़नानन हॖन्द्य, बुज़र्गन हॖन्द्य बचन हॖन्द्य तॖ नवजवानन हॖन्द्य टीम ॴस्य गिन्दान। यिमन गिन्दन-वाल्यन हुन्द ख्यन-च्यन, रातस श्वंगनुक इन्तिज़ाम, यिहॖन्ज़ वर्दी वगैरा वगैरा ज़िम्वऻरी छु ह्यवान कश्यप कशमीर सबा गुडगांव वऻल्य। चन्दीगड वऻल्य (हरम्वख) ति छि कुनि-कुनि वऺर्यि यि कऻम मटि ह्यवान। यिमन दॊहन छि आसान स्यठाह वॊसॖ-द्रॊसॖ। ॴखरी दॊह छि यिवान यनामॖ बऻगरावनॖ। अमि पतॖ छि सऻरी पनॖन्यन पनॖन्यन गरन गछ़ान। अथ गिन्दनॖकिस दौरानस मंज़ छु यिवान अख सांस्कृतिक यानि कल्चॖरल प्रोग्राम ति करनॖ यथ मंज़ कॆंह नऺव्य,प्रऻन्य कलाकार ब्यॊन-ब्यॊन जायव प्यठॖ यिथ छि पनॖन्य कला हावान।  वनुन छुम ज़ि कशीरि प्यठॖ नीरिथ लऺग्य ॳस्य यिमव काम्यव दऺस्य मिलच़ार करान तॖ पनॖनि समाजिक च़ीन्य मज़बूत बनावनॖच अख कूशिश करान।
**************************
कऻशुर ह्यॆछव कऻशुर परव
कऻशिर्य पऻठ्य पानवुन्य कथबाथ करव
**************************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)