15.10.2018

15.10.2018, ॴशिद (आश्विन/असूज), ज़ूनॖ पछॖ (शुक्ल पक्ष) शॆयम (षष्ठी),च़न्द्रवार (सोमवार),श्री सप्तार्षि सम्वत 5094, राश धनु(चलान), ऋतु हरुद (शरद)(चलान)
*************************
नमस्कार माहरा त्वहि सारिनीय म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: बद जान बदनाम नॖ
    अ: बदनऻमी छि बद आसनॖ
         ख्वतॖ ज़्यादॖ ख़राब
2. मु: बदस सीर बावुन छु बॆबि
         स्वरुफ रछुन
   अ: बद इन्सानस पनुन राज़
        वनुन गव पानस गुदरिथ
        अनुन
3. मु:बद ॴस्यतन या रद ॴस्य-
         तन, इन्सान कति बनि
    अ: इन्सान छु स्यठाह म्वलुल
         आसान
4. मु: बख्तस बॊड छुय खऺदमत-
         गार
    अ: बऺडिस मॊहनिविस छु
          ताल्यॆह आसान
5. मु: बऺडॖ इश्कॖ गव मॊहरि मुशकॖ
    अ: बऺडॖ सुन्द इश्कॖ छु स्यठाह
         म्वलुल आसान
*************************
1. वठ.......Close/Stone
2. वटुक.....All the utensils
          (put together) used
          for worship on Shiv-
          ratri
3. वपुन....To burn slowly/
         To burn from within
4. वाश...Rest/Recreation/
              Repose/Stop/
              Relaxation
5. वाज़.... Sermon
6. वाज़ परुन....To provide
             advice/To preach
          To deliver a sermon
7. वांगुन.... Brinjal
8. वावॖज.....Hand-fan
9. वान्दुर....Black faced
           monkey with long
           tail
10. वांगॖज.... Tenant
*************************
     गीता ज्ञान  :अध्याय-7  :
सिर्यि च़न्द्रमस मंज़ प्रगाश म्योनॖय
आकाशस मंज़ आवाज़ छुस बॖय
वीद मंत्र ओमकार म्यॆय ज़ान
वॊन भगॖवानन गीता ज्ञान
*************************
अहम् छु इन्सानस हनि हनि मारान। क्रूद ति इन्सानस कऻन्सि हुन्द नॖ थावान। हसऺद छु इन्सानस वथ रावरावान। यि ज़ऻनिथ ति इन्सान यिमन चीज़न लोर रोज़ान तॖ पनुन व्यकार रावरावान। मगर युस प्वरुष यिमन चीज़न निशि दूर रोज़ान सु गछ़ि ज़ानुन छु भगवानसुन्द अख रूप। युस प्वरुष काम वासनायि निशि ब्यॊन रोज़ि सु गछ़ि ज़ानुन छु यूगी। लालच यानि मॊह थऻवुन ति छु इन्सानस विज़ि विज़ि शऺगनावान
तॖ कऻन्सि बुथ हावुन लायक नॖ रोज़ान। युस यिमन चीज़न मंज़ वलनॖ छु यिवान तऺमिस छु ज़िन्दगी हन्दिस सफ़रस मंज़ हमेशि तनाव रोज़ान, मन अशांत रोज़ान, पान परेशान रोज़ान। इस्लिये छु स्यठाह जान ज़ि इन्सानस पज़ि काम, क्रूद, लूब तॖ मॊह तॖ अहंकार निशि पनुन पान ब्यॊन थवुन तॖ स्वखॖ सान पनॖन्य ज़िन्दगी हॖन्ज़ नाव पकनावॖन्य।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)