10.10.2018

10.10.2018,ॴशिद (आश्विन/ असूज), ज़ूनॖ पछॖ (शुक्ल पक्ष) ऒक्दॊह (प्रथमा/प्रतिपदा), ब्वदवार (बुधवार), श्री सप्तार्षि सम्वत 5094, राश तुला (चलान) ऋतु हरुद (शरद) (चलान)..चूंकि द्वय छि रावान, द्वय हुन्द वॊहरवोद यी अज़ यानि ऒक्दॊह द्वह..नवरात्र छि शुरु ॳज़्यकि प्यठय
*************************
जे के विचार मंचॖ तरफॖ छुस बॖ त्वहि सारिनीय यछ़ान
     ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: बजि मशीदि च़ल्या कूंज
         नीरिथ
    अ: कॆंह करनॖ सॗत्य नॖ कांह
         फर्ख यिन्य
2. मु: बठ्यन लोरि तॖ बेरन चौब
    अ: कॆंह करनॖ बजाय सिरिफ
         क्रकॖ दिन्य/बेक्लस फ़ज़ूल
         मार द्युन
3. मु: बटॖ छु बुड्यथॖय ततान ति
         जल तॖ तॖरन्यान ति जल
   अ: बटस छि जल जल च़ख ति
        खसान तॖ जल जल वसान
        ति
4. मु: बटस बॊड द्वह तॖ फ़ाकॖ
         मुसलमानस बॊड द्वह तॖ
         श्राकॖ रऻफ़्यज़स बॊड द्वह
         तॖ बाकॖ
   अ: बटॖ छु बडि द्वह फ़ाकॖ दरान
        मुसलमान छु बडि द्वह माज़
        ख्यवान तॖ शीय छि बडि
        द्वह मातम करान
5. मु: बटॖ मूद शेंकि
    अ: बटस छु शक़ रोज़ान/
         बटॖ छु शकी
*************************
1. वाज़ॖ......Cook
2. विज़.....Time
3. वुज़...... Corridor
4. वुज़ुन.... To ooze/To say
                 out
5. वुज़नावुन....To wake up/
           To arouse from
           sleep/To bring to
           senses
6. वज़ुन.....To sound
           (musical instrum-
          ment)/To be struck
7. वज़न.....Weight
8. वज़ह..... Show off/For-
           mation/Manner/
        Behaviour/Conduct/
        Fashion
9. वछ़र..... Openness
10. वछ़ॖर....She calf
*************************
     गीता ज्ञान : अध्याय-7  :
दॊयिम यॆमि सॗत्य दुन्या बसावनॖ यिवान
ज़ीव ज़नतु वगऻरॖ पऻदॖ सपदान
अथ च़त्यन प्रकृच़ छि परा वनान
वॊन भगॖवानन गीता ज्ञान
*************************
वावस सॗत्य नाव पकनावॖन्य छि वख्तस प्यवान मगर पनॖन रीति रिवाज ब्यॆयन वुछिथ बदलावॖन्य या ब्यॆयन हॖन्द्य रीति रिवाज अपनावॖन्य छु मोयूब ह्यु बासान।
यिछ़न काम्यन मंज़ ति छि ॳस्य कऻशिर्य बटॖ ब्रौंह ब्रौंह पकान। सु ज़न गव ज़ि कऺशीरि मंज़ ॴस्य अगर त्वहि पूरॖ याद आसिवॖ नवरात्रीक्यन ग्वडनिक्यन च़्वन दॊहन यानि ऒक्दॊह प्यठॖ च़ोरम ताम कऺशिर्य बटॖ स्युन यानि नॆनि ख्यवान तॖ पतॖ नवम द्वह ॴस्य तऺहर तॖ च़रवन पर्बथ च़क्रीश्वर खारान। यि प्रथा ॴस पॊतकालॖ प्यठॖ चलान। मगर यी रीथ कत्यन गऺयि बंद, क्याज़ि गऺयि बंद, दय ज़ानान। ग्वड-ग्वडॖ ॴस्य सऻरी कऻशिर्य बटॖ न्यॆनि ख्यवान हफ्तकिस हफ़तस यानि बॊम्वारि तॖ ब्रसवारि ति। हां मगर ॴठम, काह, पुनिम मावस, ॴस्य नॖ कॆंह बटॖ न्यॆनि ख्यवान। ॴठम
द्वह नॖ बिल्कुलॖय। मगर यि प्रथा ति बदलेयि। कर्वाच़ौथ, बाई-तीज दन-तेरस, होली-दहन वगैरा वगैरा रीच़ॖ आसॖ नॖ कऻशिर्य बटस। यिम कति प्यठॖ आयि, क्याज़ि आयि अथ छु नॖ जवाबा कांह। ॳस्य छि नकाल यानि नकॖल करनस मंज़ ताख। कऻशिर्य ज़बान य्यॊस असि पुशतऻनी ज़बान छि ह्यॆच़ बहानॖ बनऻव्य बनऻव्य मऺशरावॖन्य। रीति रिवाज ब्यॆयन वुछ्य वुछ्य अपनावॖन्य। पनुन वजूद वारॖ वारॖ नाहवॖनावुन। यीच़ तरक्की कऺर वाकॖय कऻशिर्य बटन। मऻज्य शारिका, रऻज्ञन्या, ज्वाला, अम्बा, सरस्वती, लक्ष्मी आसॖ बटस सॗत्य कऺशिरि मंज़ सऺदियव प्यठॖ तॖ ओस कऻशुर बटॖ कऺशीरि मंज़ गामस तॖ शहरस मंज़ नविथ तॖ फॊलिथ। रीच़न रिवाजन मंज़ बदलाव यिनॖ म्वखॖ प्यव कऻशिर्य बटस स्यठाह बुरॖ असर म्यॆ बासान। ग्वडन्युक असर प्योस ज़ि पनॖन बिहिन्य जाय रऻविस। कांह मानि या न मानि छि तऺम्यसॖन्ज़ यछ़ा।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)