12.10.2018

12.10.2018, ॴशिद  (आश्विन/असूज), ज़ूनॖ पछॖ (शुक्ल पक्ष), च़ोरम (चुतुर्थी), शॊकुरवार (शुक्रवार/जुम्मा), श्री सप्तार्षि सम्वत 5094, राश वृश्चिक (चलान), ऋतु हरुद (शरद)(चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: बद बदी ख्वद गिरिफ़तऻरी
    अ: युस ब्यॆयिस बुरॖ यॆछ़ि
         तऺमिस पानस बुरॖ गछ़ान
2. मु: बजि कोरि हॖन्ज़ छ़्वपय
         छि आंकार
   अ: बालेग कोरि हॖन्ज़ खामोशी
         गऺयि तस्सॖन्ज़ रज़ामंदी
3. मु: बुजि लॊब कुजि तल च़ूंठ
         पतॖ गऺयस पऺज्य ह्यथ
   अ: अकि लटि कऻन्सि कॆंह दिथ
         तस हऻल गछ़ॖन्य
4. मु: बजि कनि तलॖय छि
         ल्वकॖट कऺन्य व्यपान
    अ: बऺड्य इन्सान छि ग़रीबस
         ह्यकान मदद कऺरिथ
5. मु: बजि कोरि हुन्द रून
    अ: हंगॖ तॖ मंगॖ कॆंह चीज़ मेलुन
*************************
1. वरनॖ...... Otherwise
2. वरज़िश... Physical exer-
             cise/Athletics/
             Gymnastics
3. वरज़िशगाह... Playing
             field/Gymnasium
4. वरग़ॖलावुन...To coax/To
             cajole/To provoke
             To incite against
5. वज़ारत......Ministry
6. विदा.... Farewell/Depar-
             ture/Adieu
7. वुदॖ......Fragrant/Aloe
8. वुदयोग.... Experience/
               Wisdom/Hurry
9. विदुर.....Widower/Oppo-
               nent/Furious/
               Rough/Violent
10. वऺडरुन....To bury
*************************
       गीता ज्ञान  :  अध्याय-7 :
म्यॆ रॊस दॊयिम छु नॖ कांह कारन
यिथॖ पऻठ्य म्वख्तॖ मालि तऻरिथ पन
तिथय पऻठ्य यि ज़गत म्यॆ मंज़ ज़ान
वॊन भगॖवानन गीता ज्ञान
*************************
पंडित चमन लाल राज़दान यिम दिलशाद गार्डॖन, दिल्लि मंज़ पनॖन्यन शुर्यन निश रोज़ान ॴस्य सपॖद्य स्वर्गवास नवरात्रॖकि ग्वडनिकि द्वह। राज़दान सऻब ॴस्य मंज़ॖ कॆंच़स कालस वैशाली ति रोज़ान। कशीरि मंज़ ओस राज़दान सऻब युनिवर्सिटी मंज़ जान पदस प्यठ मुलऻज़्यमत करान। वैशाली मंज़ ओस आसान राज़दान सऻब गोपी नाथ जी निस आश्रमस मंज़ भख्ति भावॖ सान सीवा करान। यिमव छि गोपी नाथ जियस प्यठ कॆंह शार ति लीख्यमॖत्य। म्यॆ गऺयि ज़ान पहचान राज़दान सऻबस सॗत्य तऺत्य आश्रमस मंज़ॖय। म्यॆ बास्यव यि बख्त बडॖ शांत स्वबावुक, असवुन, मॊदुर बोलवुन तॖ रलवुन मेलवुन। दपान दिलशाद गार्डनॖ मंदरस मंज़ ति ओस यि सॊय यछ़ तॖ पछ़ थऻविथ पनुन समय कडान। स्यठाह नेक इन्सान ओस। वैकुण्ठस मंज़ ॴस्यनस जाय। राथ सपुद तमिस दाह संस्कार सीमापुरी शुमशानबलॖ।
रॖत्य कर्म ॴसिन कऺर्यमॖत्य तॖ नवरात्रक्यन दॊहन मंज़ वोतुस अंत समय। बड्यन दॊहन प्यठ मरुन दपान स्यठाह जान आसान। सऻरीय छि भगवानस मंगान रोज़ान स्यॆदि-बुथि अंत युन। कमिस क्याह छु मेलान यि ज़ानि सुय यॆमिसॖन्दिस इशारस प्यठ छि ॳस्य पल-पल कडान।
रॖत्य कर्म करनस छु रुत फल मेलान। रुत सौंच थऻवनस तॖ मॊदुर ज़्यव थऻवनॖ सॗत्य छु इन्सानस ज़िन्दगी हुन्द सफ़र अंसान तॖ गिन्दान नेरान। यी छु पज़र तॖ यी आयि वुन्युखताम वुछान। बाकय गव दपान कर्मन हुन्द फल। कुस क्याह ह्यथ छु आमुत तऺमिस ती बूगिथ छु वापस गछ़ुन।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)