08.10.2018

08.10.2018 ॴशिद(आश्विन/असूज)गटॖ पछॖ (कृष्ण पक्ष), च़्वदह (चतुर्दशी), च़न्दॖरवार (सोमवार),श्री सप्तार्षि सम्वत 5094, राश कन्या (चलान), ऋतु हरुद (शरद) (चलान)...अज़ छि पित्रामावसी ति
*************************
जे के विचार मंचॖ तरफॖ छुस बॖ त्वहि सारिनीय यछ़ान
     ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु : बिछिस प्रछ़ुख "वन्दस
         कोनॖ छुख न्यबर नेरान"?
        दॊपनख, "रयतॖकऻलिस क्या
        कॊरुम हऻसिल"
   अ: यॆमिस लगातार मुसीबतस
        आसि
2. मु: बतॖ पावि तल छि ॴबॖ
         खार व्यपान
    अ: ख्यावनॖ च्यावनॖ सॗत्य छि
         वारियाह खरऻबी पूशीदॖ
         रोज़ान
3. मु: बतॖ मंज़ॖ टऻठ तऺहर
         ॴशनावव मंज़ॖ टोठ हऺहर
   अ: ख्यनस मंज़ छि तऺहर मज़ॖ
        दार आसान तॖ ॴशनावव
        मंज़ॖ छु टोठ आसान हऺहर
4. मु: बुथ वुछिथ बोग च़कॖज
         वुछिथ च़ऻन्गिज
    अ: मक़दूर मुतऻबिक हिसॖ या
         क़दॖर
5. मु: बतॖ मिलॖवन गऺयि रतॖ
         मिलवन
    अ: इकॖवटॖ ख्यनॖ-च्यनॖ सॗत्य
         छि माय तॖ मोजथ बडान
*************************
1. वॖठ.....Lips/To twist
2. वाठ.... Connection/
              Combination/
          Addition/Match/
       Link/Relation/Joint
3. वातलनावं...Cobbler's
            shop/Dirty place/
       Disorganized  place
4. वाटॖदार.....With joints/
               Seamy/Joined
5. वाटॖनावुन....To get fixed/
               To connect/To
               affix/To unite
6. वाटनगॊर..One who joins
               bones/Orthope-
              dition/Bone-fixer
7. वाद..... Argument/Arro-
              gance/Insolent
              talk
8. वाद वाद.... Arguments/
              Haughtiness/
              Impudence
9. वादॖ....Promise
10. वादॖ थावुन...To keep a
                        promise
*************************
     गीता ज्ञान  : अध्याय-7  :
सासॖ बऺद्य म्यॆ प्रावनुक यत्न करान
तिमवॖय यूगयव मंज़ॖ म्यॆ कांह प्रावान
छु असल रूप कांछ़ा महयॆ ज़ानान
वॊन भगॖवानन गीता ज्ञान
*************************
हवनस प्यठ लूकन हुन्द समुन सुति सिरिफ पूर्णॖ आहूति विज़ि तॖ नवीद करनॖ विज़ि छु यि सऻबित करान ज़ि ॳस्य छि बतॖ-ब्वछ तॖ ब्यॆयि नॖ कॆंह। यॆत्यन ख्यना-च्यनाह आसि कऻशुर बटॖ आसि तति हऻज़िर मगर यॆत्यन ॳमिस कऻशिर्य बटसॖन्ज़ हऻज़्यरी छि ज़रूरी तत्यन छु नॖ यि बटॖ नज़रि यिवान। यि वोत म्यॆ वारियाह कालॖ प्यठॖ वुछान तॖ मॊहसूस करान। ऊतरॖ ओस इन्द्रागान्धी
आर्ट सेन्टरॖ दिल्लि मंज़ अख कल्चरल प्रोग्राम यथ मंज़ दीपाली वातल जी ओस पनॖनि मॊदुर हटि कॆंह बऻथ ग्यवॖन्य। अथ आडिटोरियमस मंज़ बोज़नवाल्यन हॖन्ज़ कुल संख्या ॴस मसा दऺह या पंदाह लूकन हॖन्ज़। ग्यवनवोल आसिहे सौंचान ज़ि यीतिस बऺडिस हालस मंज़ बोज़न वाल्यन हुन्द यि हाल, यि छु वाकॖय कमाल। कऻशुर न ज़ाननवऻल्य ॴस्य तति बेशुमार यिमव दीपाली जीन्यन बऻतन मतलब फिकिरी तरनॖ रॊस ति तम्यसॖन्दिस ग्यवनस दाद द्युत मगर पनॖन कऻशिर्य बटॖ हॖन्ज़ संख्या ॴस नदारथ। यूतुय योत नॖ, कुनि जायि ति योतन बटस दॊपुख वातनॖ बापथ क्रख-चिख दिनॖ बापथ, बटॖ सॖन्ज़ हऻज़्यरी छि आसान गिनी-चुनी।मगर यॊदवय  ॳमिस बटस वनव ज़ि कुनि मऺजिलिसस मंज़ या कुनि महफिलि मंज़ हा छु ख्यन-च्यन ति, हथ कामि त्रऻविथ वाति तॖ ख्यॆयि-च्यॆयि टास कऺड्य कऺड्य। ज़ानि दय यि किछ़ फितॖरथा छि असि कऻशिर्य बटन। ख्यनॖ विज़ि न वुछन मटन तॖ न वुछन पटन।
मन छु करान ज़ि पऻर्य लगहऻ पनॖन्यन बटन युस वातान छु बस केवल हवनन।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)