23.01.2021

23.01.2021 पॊह (पौष) ज़ूनॖ

पछॖ (शुक्ल पक्ष) दऺहम (दशमी) बटॖवार (शनिवार/शनिश्चरवार) श्री सप्तर्षि सम्वत 5096, राश वृष (चलान) ऋतु शिशर (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

         (पराग पुस्तक-190)

समसार नोम तऻव तऺच़ॖय

मूढन किच़ॖय तावनॖ आय

ज्ञान मुद्रा छि ज्ञऻनियन किच़ॖय 

स्व यूगॖ कलि किन्य प्रज़नॖ आय

            अर्थात

संसार मूढों के लिए ऐक तपता तवा है किंतु ज्ञान मुद्रा वालों के लिए नहीं। वह ज्ञान मुद्रा उन को योग अभ्यास से प्राप्त होती है

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ********

1. शाह (Breath/Sigh/Respiration/Breathing/King/Monarch/Chief/Great/Eminent/Notable)

2. शाहानॖ (Royal/Regal/Splendid)

3. शाहतीर (Beam)

4. शाह रग (Jugular vein)

5. शाहज़ादॖ (Prince)

             मुहावरॖ

1. मु: वानस फालव दिथ गछ़ुन

    अ: सोरुय पथ कुन त्रऻविथ 

         च़लुन

2. मु: वऻनिस छि ग्राहख वनि

    अ: वानॖवऻलिस छि पनॖन्य

         ग्राहख वनि आसान

3. मु: वऻनिस नॖ ॴस च़ूरस नॖ 

         च़ास

    अ: पनॖन्य कऻम छ़ॊपॖ दम 

          कऺरिथ करॖन्य

        (पनॖन्य शुर्य ह्यॆछॖनऻव्यूख)

**************************

पंचान्ग:- ट्यॆकिनि छि अज़कल ति कऻशिर्य बटॖ मिलनावान रोज़ान अल्बतॖ मिलनावन वऻल्य रुद्य कम तॖ मिलनावनॖक्य तोर तरीकॖ ति छि बदलेमॖत्य। कम्प्यूटरॖ दऺस्य छि ट्यॆकिनि यिवान मिलनावनॖ, यिम पर-ज़ऻच़ मंज़ व्वंय खान्दर करान छि, तिहॖन्दि बापथ छु ट्यॆकिन्य मिलाप बे-मतलब तॖ बे-माने। वर वधु छ़ान्डनुक तरीकॖ ति छु बदल्योमुत। मऺन्ज़िमयऻर्य चूंकि छि स्यठाह कम नज़र यिवान, मैगज़ीनन मंज़, अख़बारन मंज़, मोबाईलन मंज़ छि इश्तिहार यिवान दिनॖ तॖ मऺन्ज़िमयऻर्य सॖन्ज़ कमी छि पूरॖ सप्दान अज़कल। कॆंह खान्दर छि इन्टरन्यटॖ दऺस्य, फेसबुकॖ दऺस्य, वगैरा वगैरा सादनव दऺस्य ति यिवान करनॖ। यिथ्यन कॖसन मंज़ छु ट्यॆकिन्यन हुन्द कमॖय पाहन हाजथ प्यवान। बोज़नस तल छु यिवान ज़ि अज़कल छि खान्दरॖ पतॖ कॆंच़न दम्पतियन पानॖवुन्य तनाव बंडान रोज़ान तॖ तलाकॖच रफ़तार छि स्यठाह तेज़ेमॖच़ तॖ आदालॖच़ वानन ताम छि यितॖ गछ़ करान रोज़ान। ग्वडॖ ॴस्य प्रछ़ॖगऻर करान क्वलावऺली वुछिथ अज़कल छॆ नॖ क्वलावली मंज़ तिम इस्तर्यन हॖन्द्य पिस्तऺर्य ॴश्यनाव नज़रि तल गछ़ान। पर-ज़ऻच़ मंज़ खान्दर करनस प्यठ छॆ नॖ क्वलावली वुछानॖय व्वंय। वुछिथ ति क्याह नेरि। मिया बीवी राज़ी तो क्या करेगा काज़ी। यि बदलाव यिनॖ सॗत्य छा कऻशुर बटॖ व्वंय फऻयदस मंज़ किनॖ न्वकसानस मंज़ यि वनुन छु हना मुश्किल पाहन मगर प्यॆठ प्यॆठ यॊदवय वुछव तॖ बासान छु ज़ि न्वकसान छु ज़्यादॖ तॖ फऻयदॖ छु कम। पानस ति तॖ समाजस ति। अमि नतीजुक छु असि स्यठाह ग़म। मगर कऺरिथ छि सऻरी छ़ॊपॖ दम। वुछान छि ज़ि कुस रटि अथ यीरवॖन्य नावि नम। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)