17.01.2021

17.01.2021 पॊह (पौष) ज़ूनॖ पछॖ (शुक्ल पक्ष) च़ोरम (देवादेव) (चतुर्थ) (देवादेव) आथवार (रविवार/ऐतवार), श्री सप्तर्षि सम्वत 5096, राश मीन (रऻच़ हॖन्ज़ॖ 1.15 बजि प्यठॖ), द्रठॖपऻन्च़ुक (पंचक) (चलान), ऋतु शिशर (चलान)...अज़ शामन 5.50 बजि प्यठॖ गछ़ि गुरु अस्त 

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

              लल वाक्

        (पराग पुस्तक- 184)

शिशरस वथ कुस रटे

कुस ब्वके रटे वाव

युस पऻन्छ़ यॆन्द्रिय च़्यलिथ च़टे

सु रटे गटे रव

            अर्थात

झाडे को आने से कौन रोक सकता है? वायु को अपनी मुट्ठी में कौन बंद कर सकता है? यह दोनों काम अति कठिन हैं। जो पांछ इन्द्रियों को नियन्त्रण में रखने वाला है, वही प्रकाश रूपी स्वात्म को पा सकता है। अर्थात झाडे में सूर्य मेघ से ढका रहता है। इसी प्रकार अंतर प्रकाश विषय भोगों के कारण गौण हो जाता है। जो इन्द्रियों के विषयों पर नियंत्रण पाता है वही प्राण वायु को रोक कर अज्ञान रूपी बादलों को हटा कर ज्ञान रूपी सूर्यप्रकाश का साक्षात्कार करेगा।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            **********

1. सागवान (Teak tree)

2. सास (Thousand)

3. सावुन (To put to sleep/Lull)

4. सावन (Name of a month)

5. सासॖबऺद्य (Thousands)

               मुहावरॖ

1. मु: नऻल्य नॖ ज़ऺट मऻल्य नाव

    अ: ह्वॊखुय बजर, या, लूकन

         थ्यकॖनावुन

2. मु: नागॖ गाडॖ वुछनि हलाल

         ख्यॆनि हराम

    अ: तिम चीज़ यिम इन्सान 

         ह्यॆकि नॖ वरतऻविथ

3. मु: न करनस त्रॆ करॖन्य

    अ: बॆकारस त्रॆ कार, या, पानॖ 

         नॖ करुन, पॖर पॖर करुन

        (पनॖन्य शुर्य ह्यॆछॖनऻव्यूख)

**************************

पंचान्ग:- ब्यॆन्यगाशि ॳन्य म्वगॖल्य चाय तॖ सॗत्य द्युतुन कान्दॖर्य वानुक कत्लमाह। चाय च्यवान च्यवान प्रुछ़ म्यॆ ब्यॆन्यगाशि ज़ि जिजा जी कर यी वापस। अज़ पगाह यी। त्रॆ च़ोर द्वह गऺयस गऻमॖतिस। वॊन ब्यॆन्यगाशि। यॆलि कशीरि मंज़ होर योर दोरस गछ़ान छु पऻंछ़ शॆ दॊह्य पतय छु यिवान। कऺशीरि न्यबर ति छा गछ़ान? म्यॆ प्रुछ़  ब्यॆन्यगाशि? आहनू यि छु ज़्यादॖ कालस न्यबरॖय आसान। न्यबरय मतलब? मतलब दिल्लि, बम्बयि, यू पी, एम पी वगैरा। क्याज़ि अस्पतालस मंज़ छु ना आसान? म्यॆ प्रुछ़मस। ना अस्पतालस मंज़ क्याह करि? डाक्ट्रीय तॖ ब्यॆयि क्याह? ब्यॆन्यगाशि वुछ हऻरऻन्यगी सान म्यॆ कुन तॖ वॊनुन यि छु नॖ डाक्टर, च़्यॆ कऺम्य वॊनुनय? म्यॆ छॆ नॖ पताह मगर म्यॆ वोत बोज़ान ज़ि जिजा जी छु डाक्टर। ब्यॆन्यगाशि त्रोव असन खंगाला तॖ दॊपुन ॳमिस छि लूख लोलॖ सान वनान डाक्टर मगर डाक्टर छु नॖ पानॖ। ब्रिज नाथन छ़ॊटरऻव कथ त तुलनस बॖ थॊद तॖ दॊपुन च़्यॆ तरी नॖ फिकिरी यि कथ पख बॖ वनय वति। यि वनान वनान द्रायि ॳस्य ब्यॆन्यगाशि हॖन्दि गरि प्यठॖ मगर म्यॆ रूद वॖज़ान अंदरॖ ज़ि यि माजरॖ क्याह छु। लूख वनान गिरधऻरी लाल डाक्टर मगर तऺम्यसॖन्ज़ आश्यन्य याने ब्यॆन्यगऻश वनान डाक्टर छु नॖ। कथ क्याह गछ़ि आसॖन्य। म्यॆ प्रुछ़ व्वंय ब्रिज नाथस अमि कथि हुन्द मतलब। ब्रिज नाथन वॊन ज़ि तऺम्यसुन्द जिजा जी छु हिकमथ करान मगर तऺमिस छि कॆंह गरेलू न्वसखॖ तॖ तिमनॖय सॗत्य लूकन तबाबथ करान रोज़ान तॖ तवय छि तऺमिस डाक्टर वनान लूख। ऒडाह तॊरुम फिकिरि तॖ ऒडाह तॊरुम नॖ कॆंह तॖ तऺम्य ति च़ऺट कथ ॳडी तॖ म्यॆति द्युत नॖ ज़्यादॖ ज़ेछर कथि कॆंह। अल्बतॖ अख कथ गऺयी वाज़ॆह ज़ि गिरधऻरी लाल ओस नॖ डाक्टर वाक्टर कॆंह। लूकॖ मॊत गव अनिगॊट। बॖति गयोस ती वनान यि बॖ बोज़ान आस। मगर वाठ ख्यव कथि ति ज़न गव ज़ि ब्रिजनाथनि गरिक्य हालाथ वुछिथ ओस नॖ म्यॆ मन मानाय ज़ि ब्रिजनाथुन ब्यॆमॖ गछ़ि डाक्टर आसुन। वुकॖर्य बानन ह्यिवॖय ठानॖ। म्यॆ गऺयि यि शंका दूर मगर दॊयिम शंका बडेयम यि ज़ानॖनॖ खऻतरॖ ज़ि अमा ॳम्य सॖन्दिस ब्यॆमस कम ह्यि गरेलू न्वसॖखॖ छि तिम यिमव दऺस्य यि लूकन हुन्द यलाज या हिकमथ या तबाबथ करान छु रोज़ान। यि ज़ानॖनॖच यछ़ा बडेयम। दोस्ती रूज़ चलवॖन्य, समय गव नेरान। म्यॆ बासान अमि पतॖ वारियाहि कऻल्य यॆलि बॖ कालॆजस मंज़ ओसुस परान। ब्रिज नाथन पॊर नॖ ब्रोंह कुन तॖ न पॊर मोहन लालनॖय। अति ओसुस बॖय रॊंगॖ मंज़ॖ कॊंगॖफॊल युस कालेजस मंज़ ओस परान। ब्रिजनाथस लऺज्य नोकरी यूनऻनी कालेजस मंज़ तॖ मोहनलाल गव पटवऻर्य ट्रेनिंग करनि। तिमन दॊहन ॴस्य मैट्रिक पतय तऻलीमि हॖन्दिस नऺविस नावस कुन लमान। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव म्योन ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)