11.01.2021

11.01.2021, पॊह (पौष) गटॖ पछॖ (कृष्ण पक्ष) त्रुवाह (देवादेव) (त्रयोदशी) (देवादेव) च़ऺन्दॖरवार (सोमवार) श्री सप्तर्षि सम्वत 5096, राश धनु (दुहचि 9.8 बजि प्यठॖ) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

         (पराग पुस्तक-178)

लज़ कासिय शीत न्यवारिय

त्रन ज़ल करि आहार

यि कऺम्य व्वपदीश कॊरुय हूटॖ बटा

अच़ीतन वटस सच़ीतन द्युन आहार

              अर्थात

"राज़ॖ कठ" अर्थात पत्थर की मूर्ती के सामने भेडू का बलिदान देने वालों को फटकारते और अहिंसा मार्ग पर ज़ोर देते हुए ललेश्वरी कहती है कि अपने को भट्ट कहने वाले अग्निहौत्री पंडिता यह भेड तो केवल घास खाता है, तेरे बदन को एन से ढांप कर लज्जा की रक्षा करता तथा सर्दी से बचाता है। ऐसा उपदेश आपको किस ने किया कि इस सजीव को मारकर बेजान पत्थर को मांस गिला दे। यह खेद की बात है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *********

 1. साबिकॖ (Former/Prior/Fore/Previous/Prefix/Earlier)

2. सात (Opportunity/Auspicious time/Omen)

3. सात रटुन (To start at an auspicious time)

4. सातॖ सातॖ (At time/Now and again/On all times)

5. साद (Saint/A religious or holy man/A hermit/Taste/Flavour/Relish/Deliciousness/Pleasure)

               मुहावरॖ

1. मु: नाटॖ गंज़रिथ रस मीनिथ

    अ: यॆति प्रथ कांह चीज़ हदस

          मंज़ आसि

2. मु: नाटि फॊल छु नफसुख 

          ब्येमॖ

    अ: म्यूठ चीज़ छु प्रथ कऻन्सि 

          टोठ

3. मु: नादानस नसीहत करॖन्य 

          गव पंज़्यन नून द्युन

    अ: बेवकूफस छॆ नॖ नसीहत

          व्यपान

      (पनॖन्य शुर्य ह्यॆछॖनऻव्यूख)

**************************

पंचान्ग:- राथ ताम आस बॖ कथ करान सादन, संतन हॖन्ज़, महाप्वरुषण हॖन्ज़ॖ, पीरन हॖन्ज़ यिम तऻवीज़ॖ दी दी ॴस्य कॆंच़न लूकन हॖन्ज़न आमॖच़ बलायन  दूर करनस मंज़ मदद करान रोज़ान तॖ वुछन वऻल्यसॖन्ज़ कऻम ति करान। यिथय पऻठ्य ॴस्य कॆंह पीर कऺशीरि मंज़ यिम दपान जिन्नॖ मऻथॖर ॴस्य परान तॖ लूकन मंज़ च़ामुत जिन्न या तसरुफ च़ऺलरावान। यि तसरुफ कऺमिस तॖ किथ पऻठ्य ओस लूकन मंज़ अच़ान यि वनुन छु हना मुश्किल। त्यूतुय मुश्किल छु यि वनुन ति ज़ि क्याह वाकऺय ओसा कांह जिन्न या तसरुफ नावुक चीज़ आसान ति किनॖ न। कऺशीरि मंज़ ओस बटमाल्यनि रोज़ान अख पीर सऻब युस ज़ानॖनॖ ओस यिवान नबॖ पीरनि नावॖ सॗत्य तॖ दपान ॴस्य ज़ि ॳमिस पीरस ॴसमॖच़ ॴस ख़ास महीरियत जिन्न या तसरुफॖ च़ऺलरावनॖच। अमि अलावॖ ओस यि तऻवीज़ॖ या रऺछ्य ति दिवान रोज़ान परवॖन्य लऺडकन क्यो कोर्यन इम्तिहानस पास गछ़नॖ बापथ या ब्यॆयि ति कॆंह मसलॖ हल गछ़नॖ बापथ। जिन्न कऺमिस ओस अच़ान, किथॖपऻठ्य ओस अच़ान, कमन जायन गछ़नॖ सॗत्य ओस इन्सानस हमलॖ करान, अथ प्यठ छि अज़ताम ब्यॊन ब्यॊन राय, खयाल तॖ व्यच़ार आमुत करनॖ। ब्यॆयि अख अहम दोद ओस यि नबॖ पीर सऻब बऺलरावान, सु गव नाफ, काम्बल तॖ मलदर। क्वस ताम मऻथॖर पऺरिथ ओस यि नबॖ पीर सऻब लूकन हॖन्द्य गम्भीर मसलॖ हल करान रोज़ान तॖ तिहॖन्ज़ यछ़ पछ़ हऻसिल कऺरिथ ओस ॳम्य पीर सऻबन जान नाव कमोवमुत तॖ ॳमिस पीर सऻबस निश ओस लूकन हुन्द आव गव चलान रोज़ान। नबॖ पीर सऻबॖन्य जॖ च़ोर कॖसॖ छि म्यॆ याद प्यवान यिम बॖ त्वहि ताम वातनावुन छुस यछ़ान। मगर नबॖ पीर सऻबॖन्य कथ बोज़नावनॖ ब्रोंठ करनावोवॖ तुहुन्द तोरुफ ॳकिस ख़ास इन्सान सुन्द युस न पीरऻज़ी करान ओस तॖ न फ़कीरी मगर लूकन ओस आवुर थवान तॖ पनॖन्य कमऻय करान तिहॖन्दि दऺस्य पनॖन्य व्यॊखतुय करामऻच़ हऻव्य हऻव्य। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)