22.01.2021

22.01.2021 पॊह (पौष) ज़ूनॖ पछॖ (शुक्ल पक्ष) नवम (नवमी) शॊकुरवार (शुक्रवार/जुम्मा), श्री सप्तर्षि सम्वत 5096, राश वृष (रऻच़ हॖन्ज़ॖ 1.24 बजि प्यठॖ) ऋतु शिशर (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

        (पराग पुस्तक- 189)

 सहज़स शम तॖ दम नो गछ़ि

यछ़ि नो प्रावख म्वखती द्वार

सलिलस लवन ज़न मीलिथ गछ़ि

तोति छुय द्वरलब सहज़ व्यच़ार

               अर्थात

केवल शम तथा दम से ईश्वर नहीं मिलता तथा केवल इच्छा करने से ही मुक्ति नहीं मिलती है। इन में कॊई यदि पानी में नमक की तरह गुल जाए तो भी सहज विचार दुर्लभ है। सारांश यह कि केवल इच्छामात्र से मुक्ति नहीं मिलती अपितु अंथक प्रयत्न से ही ऐसा होने की सम्भावना है। 

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. शानॖ (Back/Shoulder)

2. शांद (Pillow/A shelter/A support)

3. शांद गॊन्ड (Pillow/Cushion)

4. शांश (Suffocation/Asthma)

5. शाह खसुन (To breathe)

               मुहावरॖ

1.मु: वऻरान बोनि हुन्द काव

   अ: बेकस तॖ बे-मददगार,या,

        यस नॖ कांह च़ुक्यदर आसि

2. मु: वऻन्लिजि दऻदिस रोहनॖ 

         च़्यॊट

    अ: दऻदिस मुतऻबिक दवा

3. मु: वऻन्टिस हय ख्यॆयज़ि कॆंह

         छ़ॊछ़िस क्याह ख्यॆयज़ि

    अ: कॊन्जूसस निश न्येरि कॆंह

          न्यदऻरिस निश नॖ कॆंह

      (पनॖन्य शुर्य ह्यॆछॖनऻव्यूख)

**************************

पंचान्ग:- यॆमि वखतॖच बॖ कथ करान छुस याने 1959-60-च, मन्ज़िम यार्यन हुन्द बोल बाला ओस स्यठाह तॖ ओस तिमन मन्ज़िमयार्यन स्यठाह चिकॖ थाव। क्वलॖ ब्रह्मुन ओस अक्सर ट्यॆकिनि रलावान रोज़ान तॖ मऺन्ज़िमयऻर्य ॴस्य ट्यॆकिनि बंडल ह्यथ वातान हाजथमंन्दन निश तॖ हावान ज़ि क्वस ट्यॆकिन लगि तॖ क्वस लगि नॖ। यॊताम म्यॆ ज़्वन छु, मुसलमानॖय ॴस्य यि कार ति करान। बटॖ मऺन्ज़िमयऻर्य ॴस्य ब्रह्मन तबकॖ मंज़ॖ कॆंह गिने चुने लूख आसान। कॆंह मुसलमान मऺन्ज़िमयऻर्य ॴस्य खऻलिस यिहऻय कऻमॖय करान रोज़ान तॖ यिहऻय ओसुख पनॖनि कमायि हुन्द ज़रियि बनोवमुत। मुसलमानन मंज़ ओस नॖ ट्यॆकिन्यन हुन्द रवादोर। न ओस सिख समाजस मंज़। यि रिवायत ॴस्य कऻशिर्य बटन मंज़ॖ कऺशीरि मंज़। नरस खर तॖ खरस नर । यि कऻशिर्य दऺपित याने यि मुहावरॖ ति छु आज़मावनॖ आमुत कऻशर्यन मंज़ॖय। ति ज़न गव ज़ि छ़ॊटिस लऺडकस ज़्यीठ कूर, छ़ॊचि कॊरि ज़्यूठ लऺडकॖ। जान स्वन्दर कोरि कुरुप लऺडकॖ या स्वन्दर लऺडकस वुकॖर तॖ त्रकॖर कूर। दपान ॴस्य ज़ि यि गऺयि कर्मॖ लीखा यॆमिस  युथ लानि आव। लऺडकन तॖ कॊर्यन हॖन्ज़न ट्यकिन्यन ॴस्य मिलावान याने द्वश्यवॖन्य हॖन्द्य ग्रॖहॖद्य ॴस्य वुछान मेलान छा तॖ तमि हिसाब ॴस खान्दरन हॖन्ज़ कथ बाथ यिवान करनॖ। वुछनस तल छु आमुत ज़ि तमि वखतॖ ओस मोल मऻजी तय करान क्वलावली मंज़ कॆंच़न चीज़न हुन्द नाप तोल कऺरिथ ज़ि कथ छा ब्रोंह कुन पकनावॖ किनॖ न। लऺडकस या कोरि ताम ओस न आसान कॆंह तॖ न ओस रिवाज लऺडकस कोरि पानॖवॖन्य अख ॳकिस सॗत्य जान पहचान करनुक द्वहवादन तॖ ऱयतॖवादन। वुछान ॴस्यं अख ॳकिस मगर मसऻवी तोर पऻठ्य। क्वलावली प्यठ ओस हना स्यठाह गहरऻयी सान सोच विचार यिवान करनॖ, मसलन मातामाल किथ्य छिस, कतिक छिस,माम कऻत्याह छिस, मासॖ, प्वफॖ, वगैरा। यिथय पऻठ्य ॴस्य कॊरिवऻल्य ति प्रॖछ़गऻर करान रोज़ान ज़ि गरॖ क्युथ छु, कतिक छि, गामॖक्य छा, शहरॖक्य छा, गरॖ कोताह बॊड छुस, द्रिय ज़ऻम कऻत्याह छिस, हश ह्युहुर छुसा वगैरा वगैरा। तमि पतय ओस क़दम यिवान ब्रोंहकुन तुलनॖ। अज़कल रूद मन्ज़िमयोर लबिताकस, क्वल ब्रह्मुन वोत आसमानस, कूर लऺडकॖ लऺग्यमॖत्य पानय अख ॳकिस परखॖनावनस। पर-ज़ऻच़ मंज़ छ़ऻन्ड दिवान रोज़ान तानस, बदलाव आव खान्दरिकिस कारखानस, ॳज़िच पुय करान नॊन डानस तॖ निवान चानस मंज़ कुनि ति मॊयखानस। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)