02.01.2021

02.01.2021 पॊह (पौष) गटॖ पछॖ (कृष्ण पक्ष) त्रय (देवादेव) (तृतीय) (देवादेव) बटॖवार (शनिवार/शनिश्चरवार) श्री सप्तर्षि सम्वत 5096, राश सिंह (रऻच़ हॖन्ज़ॖ 8.16 बजि प्यठॖ) ऋतु हेमन्त (चलान)...अज़ छि संकट च़ोरम (संकट चतुर्थी निवार्ण) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

             लल वाक्

        (पराग पुस्तक-169)

मारुख मारॖ बूथ काम क्रूध लूभ

नतॖ कान बऺरिथ मारनय पान

मनय ख्यन दिग स्वव्यच़ार शम

विशय तिहुन्द क्याह क्युथ द्रोवू ज़ान

               अर्थात

मारो यह हिंसक - काम, क्रोध तथा लोभ रूपी भूतों को। अन्यथा तीर चढा कर यह तेरे को ही मारेंगे। मन द्वारा इन को सुविचार रूपी शम का खाना खिलाओ। यह जान ले कि इन के विषय दृढ तथा टिकने वाले नहीं हैं।

भावार्थ:- काम, क्रोध तथा लोभ का वेग कुछ पलों के लिए ही होता है तथा यह अधिक देर तक टिकने वाले नहीं होते हें। तो, साहसी इस पल को टाल कर अपने को हानि से बचा सकता है।जैसे क्रोध के समय सचेत रह कर पंद्रह तक गिनती पढने से क्रोध का वेग कम हो सकता है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

               *******

1. च़तजी (Forty)

2. च़टून (To cut/To tear)

3. च़टॖवाठ (Operation)

4. च़ऺर (Sparrow)

5. च़र (Bed bug)

                   मुहावरॖ

1. मु: लंजि पम्पोश

    अ: ल्वकटि माहोलॖ न्यबर 

         नीरिथ स्यठाह थज़्ज़र

         प्रावुन

2. मु: लॊग नतॖ जॊग आव पॊत 

         फीरिथ

    अ: कुनि चीज़स या कामि हुन्द

         पूरॖ करनुक वादॖ कऺरिथ 

         नाकाम गछ़ुन

3. मु: लूटस तॖ जोशस बऻजवठ

    अ: नाकारॖ छु नाकारस सॗत्य 

          रलान, या, बुरॖ काम्यन 

          मंज़ हिसॖदऻरी

       (पनॖन्य शुर्य ह्यॆछॖनऻव्यूख)

**************************

पंचान्ग:- कुस क्याह छु करान? ह्यॆरिम छु वुनि ह्यॆरी। बऺन्यमिस कुठिस मंज़ कॊड ॳक्य बिस्तरॖ मंज़ॖ करॖच़ तॖ वाहरोवुन तॖ ह्यॆतिन पलव दलव अथ मंज़ बरॖन्य। ताखचॖ प्यठॖक्य चीज़ ति थवॖन्य अथ करच़स मंज़ । ब्याख छु वुनि दून्य दिवान अलॖमारि मंज़। यिम छि पानॖवुन्य क्याहताम सूसरि गूसरि करान। ह्यॆरिम नफ़र वॊथ कलस प्यठ यि फुटॖज्य ह्यथ। च़ाव यिति कुठिस मंज़। ह्यच़ॖख फुटजि  गन्डॖनि। अथ आख नॖ गन्ड दिनॖ। ब्याख करॖच़ ऒनुख बिस्तरॖ मंज़ॖ कऺडिथ। ऒड सामानॖ ह्यॊतुख अथ मंज़ ति बरुन। अख ॳकिस कुन वुछिथ वॊथ अख तॖ आव न्यॆबरिमिस बरस निश। बर च़ॖरनि मंज़्य वुछुन क्याहताम तॖ च़ाव वापस अंदर कुठिस मंज़। यिम बासेयि गाबरेमॖत्य हि। जल जल वॊटुख सोरुय तॖ तुज़्यख यिम फुटजि कलन प्यठ तॖ आयि बरस ताम। शायद कॊर कऺम्यताम ठुख ठुख तवय प्यॆयि यिमन बाम्बॖर। बर च़ॖरिनि किन्य वुछुख ब्यॆयि। ॳक्य कऺर कलॖ ज़ीर ब्यॆयिस कुन। मुच़रोवुख बर तॖ द्रायि त्रॆ फुटजि ह्यथ न्यबर। बर थॊवुख यलय। कॊत गऺयि। प्रुछ़ मोलवी सऻबन। यिम वऺथ्य ब्वनकुन। ब्वनकुन कपऻर्य? यपऻर्य रॗन्यवोर कुन गछ़ान छि। च़ॖ छुखॖ यिमन सॖत्य पकान। आहन हऻज़। पकान रोज़। सडकि हॖन्ज़ उतरऻय निश च़ायि खोवॖर्य किन्य ॳकिस कॊच़स मंज़। अछ़ च़ॖति। पख यिमनॖय सॗत्य। पकान छुस। कॊत गऺयि? अति छु दऺछिन्य किन्य अख तंग कोचि। यिम च़ायि अपऻरी। च़ॖ पख सॗत्य। यिम च़ायि कथ ताम अनिगऺटिस मंज़। यि कयाह छु। बोज़नॖ छुम नॖ यिवान किंही। मकान छा दुकान छा कयाह छु?बोज़नॖ छुम नॖ यिवान। अदॖ क्याह छु? अनिगॊट। फ़ेर वापस। म्यॆ द्युतुन कलस अथॖ सॗत्य फश ह्यु। तुल कलॖ थॊद। किताब कऺरॖन बंद। च़ोंग कॊरुन छ़्यतॖ। ब्यूठ वनॖनि ज़ि त्रॆ नफ़र छि ॴस्यमॖत्य तॖ नकाशपोर वऻतिथ छि यिमव सन वऺडरऻवमॖच़। व्वंय क्याह करव ॳस्य बुथि। असि प्रुछ़ मोलवी सऻबस। पुलसस मंज़ कऺरिव रिपोर्ट दरॖज। तिमन वऺनिव ज़ि तॊह्य ॴसवि म्यॆ निश आमॖत्य तॖ सु ओस वनान यिथपऻठ्य। वारिहायि लटि छि तिमव म्यानि कथि प्यठ पछ़ कऺरिथ काम्यऻबी हऻसिल कऺरमॖच़। क्याह पताह यियख मा अथि कॆंह्। यि बूज़िथ द्युत म्यानि माजि क्याहताम मोलवी सऻबस अथस मंज़। तऺम्य ति वुछ न कॆंह तॖ थॊवुन पनॖनिस फ्यरनॖ चंदस मंज़। ॳस्य वऺथ्य तॖ द्रायि न्यबर। पीर सऻबन दिच़ पनॖन्य राय। च़ूर कति छि बिहिथ असि वनिन स्व जाय। बुथि क्याह छु करुन। व्वंय ओस ति असि सोंचुन। ॳस्य आयि पनुन गरॖ तॖ मातामालॖक्य द्रायि पनुन गरॖ। न आयि च़ूर अथि तॖ न आव अथि गोमुत माल। मगर वुछनवऻल्यसुन्द वुछ यि कमाल। दय कऺरॖन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ podcast दऺस्य ति https//anchor.fm/bldeep)

(यि सबक़ ह्यॆकिव वुछिथ koshursabak.blogspot.com प्यठॖ ति)