08.01.2021

08.01.2021 पॊह (पौष) गटॖ पछॖ (कृष्ण पक्ष) दऺहम (दशमी) शॊकुरवार (शुक्रवार/जुम्मा) श्री सप्तर्षि सम्वत 5096 राश तुला (चलान) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

             लल वाक्

        (पराग पुस्तक-175)

यिहु यिह करम करॖ प्यतरुन पानस

अरजुन बरजुन ब्यॆयिस क्युत

अनति लागि रुस पुशरुन स्वात्मस

अदॖ यूर्य गछ़ॖ तॖ तूर्य छुम ह्यॊत

             अर्थात

अपना कर्म फल मुझे स्वयं ही भुगतना है। लोगों का काम केवल बातें बनाना है। कर्म में लिप्त हुए बिना ही ईश्वर अर्पण करके (अकर्तृत्व भाव से) कर्म करना है तो फिर जिधर भी जाऊं उधर मेरा हित है

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              ********

1. छ़ॊच़ (Hollow/False)

2. छ़ॊम्ब (Trick)

3. छ़ठ (Cold breeze/Chill)

4. छ़ठॖ बटॖ कडुन (To raise someone)

5. छ़टॖ रस (Mutton soup)

                 मुहावरॖ

1. मु: माजि ख्वतॖ कूर बऺड

    अ: मसलुक व्यखच़ार आसुन,

         या, ताजॖ मसलॖ छि व्यॆखती

         आसान

2. मु: माजि हुन्द नॖ माल्युन शुर्यन

         हुन्द मातामाल

    अ: ज़ोरॖ लदनि ज़गॖ,या,पान्यार

         ज़ोरॖ हावुन

3. मु: मऻज्य वॊहवान छुम नॖ कांह

         प्वत्रॖ वति प्यठ बॆह

    अ: हंगॖ मंगॖ न्यायन मंज़ पान

         त्रावुन,या, ज़ोरॖ लडऻय मऺल्य

         ह्यॆन्य

       (पनॖन्य शुर्य ह्यॆछॖनऻव्यूख)

**************************

पंचान्ग:- अथ ओस कुण्डॖ फुटनस तयार। वॊन प्यारी जी पनॖनिस खानदारस कुन। तवय थऺवॖम यि चेन अल्मारि हॖन्ज़ि पॆन्जि प्यठ। म्यॆ सूंच ज़ि अथॖ म्वकलि तॖ यि थवन सम्बऻलिथ। म्यॆ कति ॴस पताह अथ ख्यॆयि चिव मंज़य। कथ बाथ रूज़ चलवॖन्य, बऺहसॖ बऺहस ति गव, तू तू मैं मै ति गव, मगर चेन रऻव हंगॖ तॖ मंगॖ। माजि म्यानि दिच़नख राय ज़ि वुछन वऻलिस निश प्यॆयि गछ़ुन। दपान शीलटेंगॖ छु कुस ताम वुछन वोल करान यि कऻम। पगाह गऺछ़िव तऺमिसॖय तॖ द्यवॖ कॆंह न्याल नेरि। आंकार कॊर सारिवॖय तॖ वऺथ्य सऻरी तॖ लऺग्य पनॖनिस लॊह लंगरस सॗत्य। दॊयिमि द्वह ओस गछ़ुन व्वंय वुछन वऻलिस निश। कुस कुस गछ़ि, फऻसलॖ आव करनॖ। म्योन नाव ति आव ह्यनॖ। बता वता ख्यथ दॊपुख वऺथिव गछ़व वुछन वऻलिस निश। शीलटेंग वऻत्य, द्वन त्र्यन प्यव प्रुछ़ुन तॖ मॊखसरॖ वऻत्य ॳमिस पीर सऻबस निश। ज़्यूठ कमरॖ, वगविस प्यठ सतरन्ड वाहरऻविथ। अकि अंदॖ ॴस्य नमदॖ ति आमॖत्य वाहरावनॖ। पीर सऻब ओस दरवाज़ॖ अच़वुनुय बुथि ॳकिस ज़ॖ डाय फुट थऺदिस चॊबूतरस प्यठ बिहिथ। ब्रोंहकनि अख ज़्यूठ हच्युव सॊन्दुक यथ प्यठ लेखनॖ बापथ मील़ॆन्दॖर्य जोरा तॖ तऺथ्य सॗत्य नरकऻन्य कलम ज़ॖ, त्रॆ, अख फोंटैन-प्यन, खऻली काग़ज़, ब्यॆयि कॆंह किताबॖ ति आसॖ अथ सॊन्दकस प्यठ नज़र यिवान। कमरस मंज़ सानि अच़ॖनॖ ब्रुंहॗय ॴस्य कॆंह लूख ग्वडय आमॖत्य पीर सऻबस निश। कॆंह बुर्कॖ लगऻविथ मुसलमानि, कॆंह बुज़ुर्ग लूख ति तॖ मगर बटाह गव नॖ नज़रि कांह असि बगऻर। खऻर, कुठिस मंज़ ॳच़िथ बॆहनऻविख ॳस्य अच़वुनॖय दऺछनि तरफॖ। कुस ताम मुसलमान लऺडकॖ आव प्रुछ़ुन नाव सोन तॖ प्रॖछ़ुन मुद्दा सानि यिनुक याने कमि बापथ ॴस्य गऻमॖत्य। यि सोन यिनुक मक्सद वातनोवुन ॳम्य लडकन पीर सऻबस ताम तॖ असि होवुन ज़ि पनॖनि वारि प्यठॖ यी असि आवाज़ दिनॖ। ॳस्य छि बिहिथ वुछान गाह पीर सऻबस कुन तॖ गाह बोज़ान यिनॖ वाल्यन हॖन्ज़ दऻद्य कांगॖर। वुछान रूद्य यि तमाशि ज़ि पीर सऻब किथॖ पऻठ्य छु आमॖत्य लूकन पानस ब्रोंह कुन बुलावान तॖ प्रॖछ़ान क्याहताम क्याहताम। अख अंध विश्वासा ओस लूकन मंज़। पुलसस गछ़नस ॴस्य नॖ बऺहरान। पीरन तॖ फऺकीरन प्यठॖय ओस यकीन् ज़्यादॖ।  कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

(https://anchor.fm/bldeep)

(यि सबक ह्यॆकिव तोह्य वुछिथ

koshursabak.blogspot.com  प्यठॖ ति)