12.01.2021

12.01.2021, पॊह (पौष) गटॖ पछॖ (कृष्ण पक्ष) च़्वदह (देवादेव) (चतुर्दशी) (देवादेव) बॊम्वार (मंगलवार) श्री सप्तर्षि सम्वत 5096, राश धनु (चलान), ऋतु हेमन्त (चलान)...अज़ छि ख्यॆच़िमावस (यक्ष अमावस्या) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

      (पराग पुस्तक- 179)

लूब मारुन सहज़ व्यच़ारुन

द्रॊग ज़ानुन कलपुन त्राव

निश छुय तॖ दूर मो गारुन

शुन्यस शुन्या मीलिथ गव

            अर्थात

लोभ को मारना या समाप्त करना, सहज़ अर्थात आत्मा का विचार करना बहुत मंहगा है, अत: अपनाना कठिन है। ऐसी कल्पना करना छोड दे। दूर जाकर मत ढूंढो उसे। वह दूर नहीं स्वयं तुम्हारे पास ही है। ऐसा समझ कर ही उस के साथ तेरा मिलन होगा, अर्थात छुम परमशिव के साथ हो जाओगे।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           ********

1. सादॖ (Simple/Plain/Blank)

2. सादॖ ब्यडोल (Clumsy/Simpleton)

3. सादॖ प्रकरथ (Simple nature/Stupidity)

4. साद संत (Saints/Hindu ascetic)

5. सादन (To help/To assist/To reinforce/Aid)

             मुहावरॖ

1. मु: नानि रॊस शुर गव पानि 

         रॊस दानि

    अ: नान्य छि शुरिस रछनॖ

          खऻतरॖ तिछ़ॖय ज़रूरी युथ

          दान्यस पोन्य

2. मु: नार छा थवान सार

    अ: नार छु अकॖल डालान

3. मु: नार छु मार

    अ: नारॖ सॗत्य छि तबऻही गछ़ान

      (पनॖन्य शुर्य ह्यॆछॖनऻव्यूख)

**************************

पंचाऩग:- मोहन लाल तॖ बॖ ॴस्य दोस्त पानॖवुन्य। हमजमऻत ओस तॖ हमसाय ति ओस। ॳस्य ॴस्य अख ॳक्यसुन्द गरॖ यिवान गछ़ान। मोहन लालस ओस पनुन अख दोस्त ब्रिज नाथ युस तऺमिस निश यिवान गछ़ान ओस। चूंकि बॖति ओसुस मोहन लालुन गरॖ गछ़ान रोज़ान, म्यॆ बडेयि ब्रिज नाथ जियस सॖत्य दोस्ती तॖ दोस्ती गऺयि गहरावान वारॖ वारॖ तॖ लॊग म्यॆ ब्रिज नाथुन गरॖ ति युन गछ़ुन। मऺहलॖ ओस कुनुय मगर ब्रिज नाथ ओस रोज़ान डलहसनयारॖ तॖ करफऺल्य मऺहलस दर्मियान ॳकिस तंग कोचस मंज़। अगर त्वहि याद आसिवॖ, कऺशीरि ॴस्य श्रीनगरस मंज़ कॆंह कॆंह कोचि तंग, गंदॖ, ह्यॊर ब्वन याने ॳक्यसॖय कोचस मंज़ द्वन त्र्यन जायन मंज़ॖ मंज़ॖ ज़ॗज़ त्रॆ त्रॆ ह्यॆरॖ पऻयव ति आसान तॖ यिथ्यन कोचन मंज़ ओस बऻसकलॖ चलावुन ति अख व्वदरूग आसान। ब्रिज नाथ ति ओस यिथिसॖय ॳकिस कोचस मंज़ रोज़ान तॖ ॳम्यसॖन्दिस मकानस ॳन्द्य पख्य ॴस्य मुसलमान गरॖ। अथ कोचस मंज़ ॳच़िथ ओस मऺकर्यॆर नज़र यिवान  तॖ ब्रिज नाथुन गरॖ ॳच़िथ ओस ज़न दम ह्यु गुटान। चूंकि म्योन गरॖ ओस डलहसनयारॖ दऺर्याव बऺठिस प्यठ तॖ खुलॖ डुलॖ तॖ हवा दार आसनॖ म्वखॖ ॴस्य म्यऻन यार दोस्त ज़्यादॖतर म्योनुय गरॖ यिवान रोज़ान। मगर म्योन ब्रिज नाथुन गरॖ गछ़ुन ओस आसान मंज़्य मंज़्य सुति यारज़ रऺछ़रावनॖ मूजूब। ब्रिज नाथस ओस मोल मऻज्य तॖ ब्यॆयि ॴसिस पानस बऺड्य त्रॆ बऻय तॖ अख ब्यॆनि तॖ पानस वऺसिथ अख ब्यॆनि। यॆलि म्यॆ यारज़ गऺयि ब्रिज नाथस सॗत्य तमि वखतॖ ओस ब्रिज नाथनिस द्वन बायन तॖ ॳकिस ब्यॆनि खान्दर कॊरमुत तॖ बकाया ॴस्य सऻरी अनहॖरी। मोल ओसुस शायद रिटायर गोमुत ति क्याज़ि सु ओस गरस मंज़ॖय बिहिथ नज़र यिवान। गरॖ ओस सफ़ेद पूशीय। ग़रीब गरॖ ओस बासान। बॖ छुस करान कथ 1959-60-च। ज़िठ्य ज़ॖ बऻय ब्रिज नाथॖन ॴस्य पुलसस मंज़ सिपाह, पानस ज़्युठ बोय ओस फौजस याने मिलट्री मंज़ सिपाह तॖ पानॖ ओस मैट्रिक्स मंज़ तॖ कॗन्स ब्यॆनि ॴस्य सऺतिमि किनॖ ॷठ्यमि जमऻच़ मंज़ परान। ज़िठ्यन द्वन बायन तॖ ज़िछि ब्यॆनि ओस खान्दर कॊरमुत। मिलिट्री वॊल बोय ओस नोकरी करान मगर अनॖहूरुय। ब्यॆनि हुन्द रून याने ब्रिज नाथुन ब्यॆमॖ सऻब दपान ओसमुत ओस डाक्टर। ब्रिज नाथॖन ज़िठ्य बऻय ॴस्य नॖ ज़्यादॖ पऺर्यमॖत्य लीख्यमॖत्य कॆंह तॖ न ॴसॖस ज़िठ ब्यॆन्य ज़्यादॖ पऺरमॖच़ अल्बतॖ ब्रिज नाथ ओस पानॖ दऺह्यमि जमऻच़ याने मैट्रिकस मंज़ तॖ ल्वकॖट ब्यॆनि ॴस्य सऺतिमि या ॷठ्यमि जमऻच़ मंज़ परान। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविवॖ तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)