15.01.2021 पॊह (पौष) ज़ूनॖ पछॖ (शुक्ल पक्ष) द्वय (देवादेव) (द्विती) (देवादेव) शॊकुरवार (शुक्रवार/जुम्मा) श्री सप्तर्षि सम्वत 5096, राश कुम्भ (शामन 5.5 बजि प्यठॖ) तॖ द्रठॖपऻन्च़क (पंचक) शुरु ॳज़्यकि प्यठॖ, ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव
**************************
महामऻरी नाश - मंत्र
जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते
**************************
लल वाक्
(पराग पुस्तक-182)
हा मनशि क्याज़ि छुख वुठन स्यकि लवर
अमि रटि हमालि पकिय नॖ नाव
ल्यूखुय यि नारऻन्य कर्मॖनि रॖखि
ति मालि ह्यकिय नॖ फिरिथ कांह
अर्थात
अरे मनुष्य! तू क्यों बटता है रेत से रस्सी अर्थात व्यर्थ प्रयास कर रहा है? इस (रेत की रस्सी) को पकड कर तेरी जीवन नाव चलाई नहीं जा सकती। तेरी कर्म रेखा में जो नारायण जी ने लिखा है उसे कोई भी बदल नहीं सकता। सारांश यह कि उपायों से कर्म की गति को टाला नहीं जा सकता है। अर्थ यह कि मनुष्य शुभ अशुभ कर्म करने में स्वत्रंता है और इनका फल भोगने में विवश है। कितने ही प्रयास करे किंतु कर्मभोग अटल है। अत: अब पुरुषार्थ द्वारा शिव को प्रसन्न करने का प्रयास करना चाहिए।
**************************
पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित
**********
1. सऻर (A stroll)
2. सऻर करुन (To go for a walk)
3. सऻराब करुन (To irrigate/To water)
4. सऻराब गछ़ुन (Be irrigated/Be happy/Be fresh)
5. साज़गर (Beautician)
मुहावरॖ
1. मु: नागस नाग छिकॖ छक
अ: बऺडिस मॊहनिविस सॗत्य
पकुन बजर हावनॖ खऻतरॖ
बराबरी करॖन्य
2. मु: नागॖरादॖच न्यॆन्दॖर
अ: शिहॖज न्यॆन्दॖर, या, आराम
3. मु: नार तॖ कार च़ापुन
अ: ट्यॊठ मॊदुर च़ालुन
(पनॖन्य शुर्य ह्यॆछॖनऻव्यूख)
**************************
पंचान्ग :- ॳस्य ॴस्य व्वंय त्रे दोस्त, याने ब्रिज नाथ, मोहन लाल तॖ बॖ। अख ॳक्यसुन्द गरॖ रूद युन गछ़ुन। कुनि कुनि सातन ॴस्य यिकॖवटॖ बिहान तॖ स्कूलॖच कऻम ति करान रोज़ान। म्यॆ गऺयि कल गनान ज़ि बॖ वुछहऻन ब्रिज नाथुन ब्यॆमॖ युस दपान ॴस्य ज़ि सु छु डाक्टर। म्यॆ ओस नॖ दिल मानान कतऺय ज़ि सु गछ़ि डाक्टर आसुन मगर बऺहरान ओसुस नॖ प्रॖछ़नस ब्रिज नाथस तऺमिस मुतलक कॆंह। हालांकि म्यॆ प्रुछ़ मोहन लालस द्वयि च़ोरि लटि मगर तऺम्य ति द्युत प्रथ लटि वऺलिथ मऺलिथॖय जवाब। तऺम्यसॖन्दिस वनॖनस मंज़ ओसुम बासान आंकार ति तॖ नकार ति। मंज़्य ओसुस बॖ पानस सॗती सोंचान ज़ि मुम्किन छु ज़ि सु मा आसि कम्पौंडर वम्पौंडर। तमि सातॖ ॴस्य ॴस्य कम्पौंडरन ति वनान डाक्टरॖय। म्यॆ छु याद ज़ि कऺशीरि मंज़ ओस प्रथ मऺहलस मंज़ अख ज़ॖ दवा वान आसान तॖ सु दवा दिनॖवोल ओस ल्वकच्यन म्वकच्यन ब्यमार्यन पानय यलाज करान रोज़ान। ति ज़न गव ज़ि च़ास, ज़ुकाम, तफ, तॗर, कलॖ दोद, यड दोद, कब्ज़ी, दस्तॖ बेतरी बापथ ओस यि दवा वोल यलाज करान रोज़ान। दवा पिल या बोतलि मंज़ ओस मिक्सचर बनऻवॖथ दिवान तॖ ब्यमार ओस बलान। न ओस मशवरॖ ह्यनॖ बापथ कुनि कॖस्मुक फीस आसान द्युन तॖ न ओस यिमन ल्वकच्यन ब्यमार्यन बापथ प्यवान अस्पतालॖ वानन गछ़ुन। यि दवा वोल ओस शायद कम्पौंडरॖय आसान, ती मऻनिथ ॴस्य लूख अथ दवा वानस प्यठ यिवान रोज़ान। तऺमिस कम्पौंडरस ति ॴस्य सऻरी डाक्टर वनान तॖ डाक्टरस ॴस्य डाक्टर वनानॖय वनान। अज़कल छि नॖ तिम कम्पौंडर नऺनी कुनि तॖ न सु मिक्सचर मेलान कुनि। अज़कल यॊदवय प्वंद ति द्वयि त्रॆयि लटि यिवान छि यकदम छु प्यवान डाकटरस गऺछ़िथ ग्वड पऻछ़ सथ हथ रॊपियि फीस बरुन तॖ अदय करि सु यलाज तॖ सॗती छस प्यवान ट्यस्ट बलाया करॖन्य तॖ तरान छु सासि द्वयि सासि। द्वह गऺयि नेरान तॖ अकि द्वह आव ब्रिज नाथ म्यॆ निश तॖ दॊपुन ओरय ज़ि पख अज़ गछ़व ब्यॆनगाशि हुन्द। म्यॆ आयि नॖ पछ़ कुनि यि बूज़िथ। यि गऺयि कॊबिस लथ कारगर। म्यॆ सूंच ज़ि अमि ख्वतॖ बॊड मोकॖ कति मेलि। बॖति गोस तयार गछ़नॖ बापथ। म्यॆ लगोव शऻर्ट पैंट। हता शऻर्ट पैंट कॊत लगोवुथ, वॊन ब्रिज नाथन, ब्यॆन्यगाशि हुन्दॖय ताम छु गछ़ुन। ब्रिज नाथ ति बास्योम ज़ि ओस पनॖन्यन गरिक्यन पलवन मंज़ॖय मगर चूंकि म्यॆ ओस ग्वडनिचि लटि गछ़ुन ब्रिज नाथनि ब्यॆनि हुन्द वऻरिव म्यॆ ज़ोन मुनऻसिब पलव बदलऻविथॖय गछ़ुन। ख़बर कुस कुस आसि तति। ब्यॆयिसुन्द गरॖ गछ़ि जान पऻठ्य गछ़ुन ती ओस असि पनॖन्यन ज़िठ्यन निश ह्यॊछमुत। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी
**************************
कऻशुर ह्यॆछव कऻशुर परव
कऻशिर्य पऻठ्य पानॖवॖन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ podcast दऺस्य ति)
https://anchor.fm/bldeep
(यि सबक़ ह्यॆकिव तोह्य वुछिथ
koshursabak.blogspot.com प्यठॖ ति)
No comments:
Post a Comment