16.01.2021 पॊह (पौष) ज़ूनॖ पछॖ (शुक्ल पक्ष) त्रय (देवादेव) (तृतीय) (देवादेव) बटॖवार (शनिवार/शनिश्चरवार) श्री सप्तर्षि सम्वत 5096, राश कुम्भ (चलान), द्रठॖपऻन्च़ुक (पंचक) (चलान) ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव।
**************************
महामऻरी नाश - मंत्र
जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते
**************************
लल वाक्
(पराग पुस्तक- 183)
शिव शिव करन हमसॖ गथ स्वरिथ
रूज़िथ व्यवहऻर्य द्यन क्यॊह राथ
लागि रुस अद्वय युस मन कऺरिथ
तस न्यथ प्रसन्न सुर ग्वर नाथ
अर्थात
शिव ही मेरा रूप है, ऐसा मान कर दिन रात व्यवहार में रहते हुए द्वैत भाव को त्याग कर अलिप्त होकर कार्य जो करेगा, ऐसे व्यवहारी मनुष्य पर परमेश्वर सदा प्रसन्न रहते हैं।
**************************
पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित
*********
1. साज़ रटुन (To play music)
2. साज़ बाज़ (Conspiracy/Connection/Good relations with)
3. साज़ सामान (Equipments/Belongings)
4. सऻज़िश (Conspiracy/Plot)
5. साज़गार (Conducive/Appropriate/Favourable/Agreeable)
मुहावरॖ
1. मु: नारॖ मंज़ॖ गुलज़ार
अ: नाकऻमी मंज़ काम्यऻबी
वनि यिन्य
2. मु: नावॖ गऺया नीरिथ
अ: च़ेर न गछ़ुन
3. मु: नऻल्य गोम तॖ नाल वॊलनम
अ: कुनि चीज़स या मुसीबतस
मंज़ वलनॖ युन
(पनॖन्य शुर्य ह्यॆछॖनऻव्यूख)
**************************
पंचान्ग:- ब्यॆन्यगाशि हुन्द वऻरिव ओस नऺज़्यदीखॖय। रोज़ान ॴस्य शालॖकऺदलस तॖ करफऺल्य मऺहलस मंज़। तमि दूर ॴस्य ॳस्य अनान रोज़ान गरॖ खऻतरॖ कान्दरस निशि सुब्हस च़ॊट तॖ गूरिस निशि ओम द्वद या ज़ामुत द्वद। कऺशीरि मंज़ ॴस्य ज़्यादॖ तर मुसलमानॖ गूरी ओम् द्वद, ज़ामुत द्वद या च़ामन कॖनान रोज़ान। बटॖ हलवऻय वान ॴस्य स्यठाह कम कऺशीरि मंज़ तॖ पंज्यॆब ह्यॆन्द्य हलवऻय ति ॴस्य इके दुके मगर तिम ॴस ह्यॆरम्यन अलाकन याने ॳमराकऺदलॖ, हज़ूरीबाग, हरीसिंह हाई स्ट्रीट, तुलसी बाग़, जवऻहिर नगरॖ वगैरा। अख चीज़ ओस साफ़ नज़रि यिवान ज़ि मुसलमान ॴस्य नॖ बटॖ हलवऻयिस निश द्वद या मिठऻय अनान। तिमन ॴस्य पनॖन्य मुसलमान हलवऻय या मुसलमान कान्दर आसान। गूर ओस मुसलमानॖय आसान। बटन मंज़ ओस नॖ कांह गूर आसान। शहरस मंज़ ओस नॖ कांह बटॖ गुपन रछान। तति ॴस्य मुसलमानॖय गुपन रछान अल्बतॖ गामन मंज़ ॴस्य बटॖ ति गुपन रछान। मगर कठ छ़ावजि ॴस्य मुसलमानॖय रछान बटॖ ॴस्य नॖ रछान यॊत ताम म्यॆ ज़्वन छु। मुसलमान ॴस्य शहरस मंज़ गरॖ गरॖ तीर ह्यथ याने कठ, गब्बि या छ़ावजि ह्यथ फ़ेरान रोज़ान तॖ ॴस्य छिर याने छ़ावजि या गब्बि द्वद कॖनान रोज़ान। दपान ॴस्य ज़ि छिर छि ब्यमारन खऻतरॖ फऻयदॖमंद आसान। छिर ॴस स्यठाह द्रोज आसान। खऻर ॳस्य वऻत्य ब्यॆन्यगाशि हुन्द वऻरिव। दुपूर मकान ओस यि ॳकिस कोचस मंज़। ल्वकॖट आंगनहऻन ति ॴस। अंदर च़ायि तॖ ब्यॆन्यगऻश गऺयि ख्वश बऻयिस वुछिथ तॖ म्यॆ कुन वुछिथ ति द्युतुन म्यऻनिस नमस्कारस नमस्कार सॗती जवाब। दुहुल्य वख ओस तॖ ब्यॆन्यगऻश ॴस वटिस अंदर कुनी ज़ऺन्य बिहिथ सलयन प्यठ क्याहताम वोनान। बऻयिस प्रुछ़ॖन शॆछ ख़बर तॖ फीर म्यॆ कुन वनॖनि च़ॖ बॊज़नावु भूषण लाला गरि छिवा वारय, मऻज्य छया वारय। अज़ किथॖ पऻठ्य आख यारस सॗत्य, यि कति लॊबथन। ज़ॖ त्रॆ सवालॖ कऺरिन्य तॖ बॖति गोस जवाब दिवान सॗत्य सॗत्य। गरॖ बास्योम छ़ॊरुय ह्यु। अमा ॳमिस छुना सना हश ह्युहुर या द्रुय ज़ाम या पानस शुर कॊट। पानसॖय सॗत्य रूदुस बॖ सवालॖ करान। ब्रिज नाथन प्रुछ़ ब्यॆनि ज़ि जिजा जी कति छु। सु छु दोरस गोमुत। तऺमिस गऺयि ज़ॖ त्रॆ द्वह गऻमॖतिस। ब्यॆन्यगाशि द्युतनस जवाब। कथ अलाकस सना छु अज़कल, ब्रिजनाथन प्रुछ़ ब्यॆनि ब्याख सवाल। दपान ओस वरॖमुल छुम गछ़ुन। अच्छा। तॖ बिटू जी आसि स्कूलॖ? आहनु सु छु यिवान साडि च़ोरि स्कूलॖ प्यठॖ। बिहिव पत्थर बॖ वनावोव चाय। नाय चाय वाय छॆ नॖ च्यॆन्य। वॊन ब्रिजनाथन। हा क्योहो छुख करान। अज़ छुथन भूषण लाल ऒनमुत ब्यॆनि हुन्द वऻरिव तॖ यॆति प्यठॖ नेर्याह चायि रॊस। यि वनान वनान वऺछ़ ब्यॆन्यगऻश थॊद सलयि तॖ यॆरॖ डींज्य पथर थऺविथ तॖ च़ायि चोकस मंज़ चाय बनावनि। ॳस्य ति बीठ्य पथर तॖ तुल मैगज़ीना अख तॖ बीठ्य अथ मंज़ शक्लॖ वुछनि तॖ छि प्रारान चाय यिनस। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी
**************************
कऻशुर ह्यॆछव कऻशुर परव
कऻशिर्य पऻठ्य पानॖवॖन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ podcast दऺस्य ति)
https://anchor.fm/bldeep
(यि सबक़ ह्यॆकिव तोह्य वुछिथ
koshursabak.blogspot.com प्यठॖ ति)
No comments:
Post a Comment