06.01.2021

06.01.2021 पॊह (पौष) गटॖ पछॖ (कृष्ण पक्ष) ॴठम (अष्टमी) ब्वदवार (बुद्धवार) श्री सप्तर्षि सम्वत 5096, राश तुला (रऻच़ हॖन्ज़ॖ 4.28 बजि प्यठॖ), ऋतु हेमन्त (चलान)...अज़ छु महाकऻली वॊहरवोद (महाकाली जयन्ती)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

             लल वाक्

      (पराग पुस्तक- 173)

मूढो क्रय छय नॖ दारुन तॖ पारुन

मूढो क्रय छय नॖ रछिन्य काय

मूढो क्रय छय नॖ दीह संदारुन

सहॖज़ व्यच़ारुन छुय व्वपदीश

               अर्थात

ऐ मूर्ख! पदार्थों को संचय करना, केवल काया को ही सम्भालना तथा सज्जाना वास्तविक क्रिया नहीं है। वास्तविक क्रिया तो सहज अर्थात स्वात्म का विचार करते रहना है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           ********

1. छ़्यवुन (Be extinguished/Put out/Bring to an end (health etc.))

2. छ़्यफ (Hiding)

3. छ़ॆय (Roof/Grass roof)

4. छ़्यटुन (Be impure/To be unclean)

5. छ़्यॆटरावुन (To make unclean

              मुहावरॖ

1. मु: मऻज्य गऺयि स्वनसॖन्ज़ यॆट

         रॗन्य गऺयि ब्वकॖवऺट

    अ: ख्वदग़र्ज़ी हुन्द हद, या,

          लोलस अंदर तफ़ावत, या,

          माजि ख्वतॖ ज़नानि लोल

          बरुन

2. मु:  मऻर्यमन्द्यन ब्रऻर्य ज़ागि

    अ: खानॖमाल्यन छि आसान 

          हथ बलायि पतॖ

3. मु: मालि मुफुत दिल बे-रहम

    अ: ब्यॆयि सॖन्दि चीज़ुक 

        बे-रहमी सान इस्तिमाल 

        करुन

          (पनॖन्य शुर्य ह्यॆछॖनऻव्यूख)

**************************

पंचान्ग:- ब्यॆयिस ॳकिस वुछन वऻल्यसुन्द कॖसॖ प्यव म्यॆ याद अज़ युस बॖ त्वहि सॗत्य शिरकत यछ़ान छुस करुन। असली मक्सद म्यानि वनॖनुक छु ज़ि सानि तथ कऺशीरि मंज़ कमि कमि ज़ऻच़ हॖन्द्य साध, संत, पीर, फ़कीर आमॖत्य छि रोज़ान। यिहॖन्ज़ॖ करामऻच़ वुछान वुछान ओस इन्सान हऻरान ह्यु गछ़ान। यॊदवय सम्सारस मंज़ छि यिछ़ हिशि करामऻच़ सपदान रोज़ान मगर सऻन्य कऺशीर ति छॆ नॖ ॴसमॖच़ पथ कॆच़न व्यखुत हऻदिसन मंज़। यि वुछन वोल ओस शीनगरॖ हब्बॖकऺदलॖ शील्यटेंगॖ मऺहलस मंज़ बसान। दपान ॳमिस ओस नाव हुसैन किनॖ हसन पीर। अथ कॖसस ति गऺयि तकरीबन पऻच़वनज़ाह शुवनज़ाह वऺरी। असि ओस गरि कुस ताम बॊड द्वह चलान यथ मंज़ म्यानि माजि ओस साल कॊरमुत कॆंच़न अंगन ॴश्यनावन। सालस प्यठ प्यव म्यॆ याद जि कऺशीरि मंज़ ॴस्य साल कऻशिर्य बटॖ यसलॖ करान रोज़ान। ति ज़न गव ज़ि अगर शुर च़ूर्यमि जमऻच़ ति पास ओस नेरान, शीर्य चायि प्यठ ॴस्य मऺहलस साल करान। वॊहरवऻदिस प्यठ ॴस्य पानस अंद्य पऺक्य मऺहलॖवाल्यन बतस प्यठ साल करान। खान्दरॖ ब्रोंह ओस आसान त्वमुल छ़टुन, शैरुन, त्वमुल च़ारुन, वॖरॖ दिन्य, वगेरा वगैरा तॖ यिम ति यिमन काम्यन तॖ कारन ॴस्य अंद वातनावान तिमन ॴस्य ख्यावान, च्यावान रोज़ान तॖ यिथ्य कॖसॖ ति ॴस्य हफ्तस पंदहऻन दॊहन चलानॖय चलान। नऺव न्वश यीहे तॖ साल, शिशुर आसिहे आसान लागुन तॖ साल, मतलब यि ज़ि सारिनी ल्वकट्यन बड्यन दॊहन प्यठ ॴस्य कऻशिर्य बटॖ साल खलि करान रोज़ान। दपनबतॖ, दॖर्यबतॖ, फिरॖ साल, सलामि द्वह साल, यि साल हु साल, सालॖय साल ॴस्य खयवान रोज़ान वखतॖ अकि। यिमव सारिनी रसूमातव तॖ बरतावव निशि गऺयि ॳस्य वारॖ वारॖ छ़्यनॖ। यि रूद अख स्वपनाह व्वंय तॖ नवि पुयि छॆ यिमन कॖसन हॖन्ज़ ब्वॊयी। न असि वनॖनस वार तॖ न तिमन बोज़नस सॊम फरागथ। बॖति वोतुस कथ कथ करान कति प्यठॖ कॊत। कुस ताम बॊड द्वह ओस गरि तॖ सालर ति ॴस्य आमॖत्य तॖ ॴस्य करान डलहसनयारॖ द्वन मकानन मंज़ हॆरि ब्वन तॖ ब्वनॖ ह्यॊर। आंगनस अकि तरफॖ ओस च़ु पूर मकानॖ तॖ आंगनस दॊयिमि तरफॖ याने दऺर्याव बऺठिस प्यठ ओस त्रु पूर मकानॖ। अथ्य जटॖ जोशस मंज़ रऻव म्यानि मंज़्यमि बऺयकाकनि स्वनॖसॖन्ज़ चेन य्यॊस तमि हटि मंज़ कऺडिथ पनॖनि ल्वकटि कुठि हचवि अलमारि हॖन्ज़ि पॆंजि प्यठ थऻवमॖच़ ॴस।कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव म्योन ॳज़्युक सबक़ podcast दऺस्य  https://anchor.fm/bldeep)

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)