09.01.2021 पॊह (पौष) गटॖ पछॖ (कृष्ण पक्ष) काह (एकादशी) बटॖवार (शनिवार/शनिश्चरवार) श्री सप्तर्षि सम्वत 5096, राश वृश्चिक (सुबहॖचि 6.57 बजि प्यठॖ), ऋतु हेमन्त (चलान)
**************************
नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव
**************************
महामऻरी नाश - मंत्र
जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते।
**************************
लल वाक्
(पराग पुस्तक- 176)
राजस बऻज यॆम्य करतल त्यऻज्य
स्वर्गस बऻज छुय तफ तय दान
सहज़स बऻज यॆम्य ग्वरॖ कथ पऻज्य
पापॖ प्वन्य बऻज छुय पननुय पान
अर्थात
तलवार का त्यागी राज का भागीदार है (राजा के सामने तलवार त्याग कर अथवा मित्र बन कर ही राज्य का साझी बन सकता है), तप, दान करने वाला स्वर्ग का साझी है और गुरु वाक्य का पालन करने वाला ही शिव का साथी, और पाप पुन्य का साझी अपना आप ही है।
**************************
पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित
******
1. छ़ट रूद (Windy rain)
2. छ़टॖ शिकऻर्य (A little boat)
3. छ़टॖ शीन (Windy snow)
4. छ़टॖ काह (Watering the land for ploughing)
5. छ़टॖ ग्वगॖज्य (A dish of turnips)
मुहावरॖ
1. मु: माल मस्त हाल मस्त
अ: यस यड बऺरिथ आसि सु
क्याह ज़ानि ब्यॆयिसॖन्ज़
ब्वछि
2. मु: माल वुछिथ ज़काथ
अ: बुथ वुछिथ बोग
3. मु: मासतॖर गऻव हुन्द प्वफतॖर
लॊट
अ: हंगॖ तॖ मंगॖ ॴश्यनऻवी
हावॖन्य
(पनॖन्य शुर्य ह्यॆछॖनऻव्यूख)
**************************
पंचान्ग:- आमॖ्त्य सवऻल्य ॴस्य नॖ ज़्यादॖ अल्बतॖ पीर सऻब ओस प्रॖछ़ गऻर करनस मंज़ वख लागान। पीर सऻब ओस ल्वति कथ करान, ब्यॆयिसॖन्द्यन कनन ताम ॴस्य नॖ कथ वातान मगर वुठव तलॖ ओस नज़र यिवान ज़ि सु छु सऻयलस सॗत्य प्रॖछ़गऻर करान। सऻयल तहि ओस कलस ज़ीर ज़ीर करान रोज़ान,गरा आंकार तॖ गरा नकार। पीर सऻब वुछ म्यॆ ज़ि काग़ज़ तिलमन प्यठ क्याहताम लेखान गरा अकि मीलि सॗत्य तॖ गरा दॊयिमि मीलि सॗत्य तॖ ओस करान च़ॊगुन ताह तॖ प्यठॖ गन्डान अड्यन क्रुहुन तॖ अड्यन व्वज़ुल पन तॖ ओस पिलनावान सवऻलिस। सॗती ओसुस वनान ज़ि अथ करुन क्याह छु याने नरि छा गन्डुन किनॖ नऻल्य त्रावुन। इशारव सॖत्य ओस फिकिरी तरान। पॖहॖर्य खऺन्ड्य नन्यव ज़ि पीर सऻब ओस तऻवीज़ दिवान। वारॖ वारॖ ह्यॆच़ॖन असि ताम वऻर्य वातॖन्य। ॳस्य ति ॴस्य बेतऻबी सान प्रारान। अख चीज़ कॊर म्यॆ ग़ोर ज़ि युस ति कांह अथस मंज़ रटान ओस यि तऻवीज़्, सु ओस रटनॖ विज़ि यि पनॖन्यन ॳछन लागान। अथ चोकि याने चबूतरकिस दासस प्यठ ओस नमान तॖ अदॖ ओस नेरान। पीर सऻब ओस ॳम्यसॖन्दिस कलस प्यठ अथॖ फ़ेरान रोज़ान। कऺह्यतान्य कऺह्यतान्य आयि सऻन्य वऻर्य। लऺडकन कॊर इशारॖ असि ब्रोंहकुन यिनुक तॖ म्यऻन्य मऻज्य, प्यारी तॖ बॖ गऺयि पीर सऻबनि चोकि नखॖ तॖ छि वुछान पीर सऻबस कुन आरॖ हति। त्वहि छुवॖ क्याहताम रोवमुत? प्रुछ़ पीर सऻबन असि कुन। माजि म्यानि द्युतनस जवाब। आहन हऺज, स्वनॖ सॖन्ज़ चेन हऺज़ गऺयि गरॖ मंज़य गऻब। चेन कऺम्यसॖन्ज़ ॴस? प्रुछ़ ब्याख सवाल पीर सऻबन। यॆम्यसॖन्ज़ हऺज्, यि छि म्यऻन न्वश। अमीय ॴस थवमॖच़, पीर सऻबन रुकऻव म्यऻन्य मऻज्य वनान वनान तॖ प्रुछ़ुन प्यारी कुन, चेन ॴसा च्यऻन्य? कलॖ सॗत्य कॊर प्यारी आंकार। कति ॴसॖय थऻवमॖच़? पनॖनिसॖय कुठिस मंज़। सॊंदकॖ मंज़ॖ निया कऻन्सि कऺडिथ किनॖ ब्यॆयि कुनि जायि प्यठॖ। प्यारी ह्यॆच़ वनॖन्य सऻरी दास्तान कालॖ प्यठॖच। कऻन्सि ख़ास इन्सानस प्यठ छा शक? प्रुछ़ पीर सऻबन। न हऺज़ म्यॆ छु नॖ शक कऻन्सि प्यठ मगर चेन छि तुजमॖच़ कऺम्य ताम। गरॖ ओस पछ़्यव सॗत्य बऺरिथ। ह्यॊर ब्वन ॴस्य सऻरी करान। शक कऺमिस प्यठ करव। अमि कुठ्युक बर ओसा बंद किनॖ यलय। यलय हऺज़। मऺर्यदियादम मतलब म्योन छु ज़ि बुज़ुर्ग ज़नानॖ तॖ मर्द त्रऻविथ कऻत्याह पऺछ़्य ॴस्य, ह्यकॖकॖ वऺनिथ? प्यारी त्रऻव हशि कुन नज़र, शायद जवाब छ़ान्डनॖ म्वखॖ। म्यॆति ह्यॆच़ मनॖ मंज़्य नफ़र शुमऻरी करॖन्य, ज़ि म्यानि माजि द्युत जवाब, यिहऻय अलॖ पलॖ ॴस्य वुह पॖन्च़ॖह नफ़र। पीर सऻबन तुल काग़ज़ वरुखा अख तॖ रॊटुन फौंटेन प्यन अथस मंज़। कॆंच़न हॖन्द्य नाव वऺनिव? मर्दन हॗन्द्य? प्रुछ़ पीर सऻबस म्यानि माजि। कॊरि लऺडकॖ मर्द ज़नानॖ युस याद त्वहि छु बुज़र्गव बगऻर। ॳस्य त्र्यनवय लऺग्य अख अख नाव ह्यवान तॖ पीर सऻब गव काग़ज़ वर्क्स प्यठ त्युहुन्द नाव लेखान। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी
**************************
कऻशुर ह्यॆछव कऻशुर परव
कऻशिर्य पऻठ्य पानॖवॖन्य कथ बाथ करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ podcast दऺस्य ति)
https://anchor.fm/bldeep
(यि सबक़ ह्यॆकिव तोह्य वुछिथ
koshursabak.blogspot.com प्यठॖ ति)
No comments:
Post a Comment