07.01.2021

07.01.2021 पॊह (पौष) गटॖ पछॖ (कृष्ण पक्ष) नवम (नवमी) ब्रसवार (वीरवार/बृहस्पतिवार) श्री सप्तर्षि सम्वत 5096, राश तुला (चलान) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

             लल वाक्

       (पराग पुस्तक-174)

यवॖ तॗर च़लिय तिम अमबर ह्यता

क्ष्वद यवॖ गलि तिम आहार अन

च़्यता स्व परा व्यच़ारस प्यता

च़ेनतन यिह दीह वान कऻ वन

               अर्थात

ललेश्वरी कह रही है कि ठंड से बचने के लिए उचित कपडे पहन। भूख जिस से मिटे वही आहार कर। ऐ मेरे चित्त! स्व की परा का विचार तो कर, अर्थात स्वात्मा की परा अवस्था के बारे में सोच। इस शरीर को समझ ले। तुम्हे इस बात को समझाने के लिए अति विस्तार से कौन सी वाणी का प्रयोग किया जाए।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *******

1. छ़ॊट (Short/Little/Small)

2. छ़ॊटिन्य (Pigmy sized woman/Small sized woman)

3. छ़ॊप (Who talks less/Silent one)

4. छ़ॊर (Void/Vacant)

5. छ़्वॊख (Pride/Vanity)

              मुहावरॖ

1. मु: मान मऻन्य छि गऻमॖच़ 

         राज़दऻन्य फ़ना

    अ: मान मऻन्य सॗत्य वुजारॖ 

         गछ़ुन

2. मु: मरॖ हऻ गरि कुस थवन

    अ: फुर्सथ नॖ आसॖन्य, या,

         इन्सानस छु शुर्यन बऻच़न

         हॖन्द्य किन्य तीच़ ज़िम्मॖवऻरी

         कलस प्यठ आसान ज़ि

         मरनॖकिस दमस ताम ति 

         छस नॖ तिमन हॖन्ज़ फिकिर

         त्रावान

3. मु: मऻज्य करान कूर कूर, कूर

         करान रऻन्य रऻन्य

    अ: ख्वदग़र्ज़ी हुन्द इज़ॖहार,या,

          बे मायि आसुन याने

          खान्दरॖ पतॖ सिरिफ रॗन्य

          सॖन्ज़ माय रोज़ॖन्य

         (पनॖन्य शुर्य ह्यॆछॖनऻव्यूख)

**************************

पंचान्ग:- रावन वऻलिस सास ग्वनाह तॖ निनॖ वऻलिस कुनुय ग्वनाह। ति ज़न गव ज़ि रावन वोल छु दऺहन प्यठॖ शक करान ज़ि हुमी न तॖ हुमी आसि चीज़ च़ूरि न्यूमुत तॖ करान छु ग्वनहऻन प्यठ ग्वनाह दऺहन प्यठ शक कऺरिथ मगर निनॖ वऻलिस छु कुनुय ग्वनाह ज़ि सु छु चीज़ च़ूरि निवान। प्यारी जी ॴसिन व्वंय स्वर्गॖय, प्रॖछ़ान रूज़ पनॖन्य किन्य ॳकिस ॳकिस ल्वति ल्वती मगर कऻन्सि ह्यॊत नॖ मटि। ॴखॖर गऺये तॖ गऺयि कॊत। ओर कुस च़ाव। अति क्याह कऻम ॴस तस। ख़बर प्यारी ति छा पूरॖ याद ज़ि कत्यन ॴसॖन थऻवमॖच़। सवालन प्यठ सवालॖ आयि करनॖ पानवुन्य अख ॳकिस सॗत्य मगर नन्यव नॖ कॆंह ति। जॆशिन ओस चलान। सऻरी ॴस्य अंसान गिन्दान मगर प्यारी जी ओस डॊलमुत मूडुय। बुथिस प्यठ ॴसॖस शिकन साफ़ नज़र यिवान। रटिहे तॖ रटिहे कस। सालर ॴस्य सऻरी पनॖनी। व्वपर बऺहर्येनॖ यिथॖ पऻठन अथ कुठिस मंज़ अच़नस ति क्याज़ि सु ओस ल्वकुट कुठ तॖ प्यारी जी हुन्दॖय सामानॖ ओस अति यथ सॗत्य नॖ कऻन्सि सरोकारॖय ओस।अल्बतॖ अख शक ओस बासान ज़ि कांह पनुनुय गछ़ि आसुन च़ामुत ति क्याज़ि अमि ल्वकटि कुठ्युक दरवाज़ॖ ओस खुलान बऺडिस कुठिस मंज़ ति। वुज़ॖ तरफुक बर ओसुय ओस मगर यि अंदरिम कुठि मंज़ कुठ्युक बर ओस कॆच़न नफ़रन प्यठ शक करनॖच गुंजऻयिश थवान। वजह ओस शक करनुक यि ति ज़ि केंह मामतॖर्य मासतॖर्य प्वफतॖर्य बऻय ॴस अथ बऺडिस कुठिस मंज़ कॆंह काल ब्रोंठॖय पानॖवुन्य तास गिन्दान तॖ बतॖ ख्यनुक मोकॖ यॆलि आव तॖ यिमन ति कॊरुख आलव बतॖ ख्यनॖ बापथ। व्वथनॖ विज़ि मा आसि कांह च़ामुत ति क्याज़ि बर ओस यलय पनॖन्यन गरिक्यन बऻच़न हॖन्दि बापथ। शक ओस ह्यवान गऺहरावुन ज़ि मुम्किन छु यिमवॖय मंज़ मा आसि कऻन्सि अथ चेनि प्यठ ज्योंटॖ मोरमुत। स्वनॖसॖन्ज़ चेनॖय ॴस, आस्यन तुज्यमॖच़ तॖ चंदस बऺरमॖच़ तॖ आसि द्रामुत कार कऺरिथ। मगर तिमव मंज़ॖ कुस? यि वनुन ओस स्यठाह दुशवार। समय गव नेरान। सालर ति ह्यॆतिन बतॖ ख्यथ नेरॖन वारॖ वारॖ। शोर ह्यॊतुन हमुन ह्यु मगर प्यारी जी बिचऻर ॴस दिल मलूल हिश बिहिथ। हालांकि गरिच कऻम रूज़ करान मगर बासान ओस ज़ि दिल फुट्यथॖय तॖ ब्यॆह्यमती सानॖय ॴस होरॖ योर करान। बऻयराज याने प्यारी जी हुन्द खानदार ओस ॴसस त्रॊप दिथ बिहिथ। वनिहे तॖ वनिहे क्याह। शरारत ओसुस ज़ि स्वनॖसुन्द चीज़ किथॖ पऻठ्य ओस प्यारी जी लापरवऻही सान अल्मारि हॖन्ज़ि प्यॆन्जि प्यठ थोवमुत। बडि वनॖनस ति ओसुस नॖ वार ति क्याज़ि पऺछ़्य ॴस्य गरस मंज़ॖय वृनि। माहोल बन्यऻव च़ॊक मॊदुर ह्यु। शाम वखॖत ह्यु ति ह्यॊतुन युन, पऺछ़्य ति द्रायि पनॖनि पनॖनि वति। व्वंय रूद्य पनॖन्य गरिक बऻच़ॖय यऻत्य तॖ ह्यॆच़ॖन चेनि च़ूरस प्यठ सवाल जवाब चलॖन्य याने कि, क्युथ, कर, कुस, कऺम्य, कपऻर्य बेतरी। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप" 

(बूज़िव म्योन ॳज़्युक सबक़ podcast दऺस्य  https://anchor.fm/bldeep) 

(यि सबक़ ह्यॆकिव तोह्य वुछिथ koshursabak.blogspot.com प्यठॖ ति)