05.01.2021

05.01.2021 पॊह (पौष) गटॖ पछॖ (कृष्ण पक्ष) सतम (सप्तमी) बॊम्वार (मंगलवार) श्री सप्तर्षि सम्वत 5096, राश कन्या (चलान) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

             लल वाक्

      (पराग पुस्तक- 172)

मूढस ज्ञानॖच कथ नो वऺनिज़े

ख़रस गोढ दिनॖ राविय द्वह

स्यकि शाठस फल नो वऺविज़े

रावरिज़ि नॖ कॊम याजन तील

             अर्थात

मूर्ख के साथ ज्ञान की बात मत करो। यह गधे  को गुड खिलाने, रेत में बीज बोने तथा चावल के छिलके की बनी रोटियों में तेल डालने के बराबर हे। सारांश यह कि मूढ को कभी समझाने की व्यर्थ कोशिश नहीं करनी चाहिए।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              ********

1. छ़ान्ठ (Swimming/Floating)

2. छ़ारुन (To search/To investigate/To spot)

3. छ़ाय (Shadow/Shade/Reflected image)

4. छ़ाल (Jump/Leap)

5. छ़्यन (Break/Separation)

                       मुहावरॖ

1. मु: माजि नॖ लचक तॖ सेतारस

         गिलाफ

    अ: ग़रीबी मंज़ ॳमीरी हॖन्ज़ 

         तॆह हावॖन्य

2. मु: माजि बतॖ

    अ: स्वख तॖ सावय, या, रॖच़र

          या, जऻनियर

3. मु:  मऻज्य गव ओल मोल गव

          च़्रोल

    अ: मऻल्यसॖन्दि ख्वतॖ छु माजि

         हुन्दुय थज़र तॖ बजर 

         मानॖनॖ आमुत

        (पनॖन्य शुर्य ह्यॆछॖनऻव्यूख)

**************************

पंचान्ग:- स्वामी शंकर राज़दान सऻब ओसमुत छु दपान ज़बर्दस्त चमत्कऻरी संत। ॳम्य दपान छि अकि लटि बचऻव्यमॖत्य यात्री अमरनाथॖ यॆलि तिम ॴस्य फस्येमॖत्य ॳकिस त्रटॖबुज़स मंज़ तति याने रूदॖ त्रटन, गगरायन तॖ वुज़मलन मंज़ ॴस्य तिम यात्री ह्यनॖ तॖ वलनॖ आमॖत्य। यिथय पऻठ्य ब्यॆयिस ॳकिस चमत्कारस मंज़ दपान स्वामी शंकर राज़दान सऻबन ऒन ज़ुव ॳकिस बालकॖ सॖन्दिस मृत शरीरस मंज़। ॳमिस बालकॖसॖन्ज़ मऻज्य दपान ॴसमॖच़ ॴस अख व्यधवा ज़नान।  प्राण प्रतिष्ठिथ कऺरिथ ॳमिस बालकस मंज़ दपान रॊट मंगतॖ यि बालक स्वामी शंकर राज़दान सऻबन तॖ द्युतनस नाव रामजुव। यि बालुक बड्यव तॖ प्रथ्यव स्वामी जियस निशीय तॖ बऺडिथ मीज्य तस नोकरी फौजस मंज़ याने मिल्ट्री मंज़ तॖ वोत फोजकिस ॳकिस बऺडिस ऒहदस ताम याने सु बन्यऻव फोजुक सलाहकार माने एडवायज़र महाराजा अमरसिंह सॖन्दिस शासनकालस मंज़। माहाराजा अमरसिंह ओस महाराजा हरीसिंह सुन्द मोल। स्वामी शंकर राज़दान ओसमुत छु दपान शारदा लिपि ज़ाननवोल तॖ ॳम्य छि दपान शारदा लिपि मंज़ अख किताब ति लीछमॖच़। मगर यि किताब दपान छॆ नॖ आमॖच़ छापनॖ वुन्युखताम। दपान स्वामी शंकर राज़दान ओस थवान अख मकॖज् माने तबॖर हमेशि पानस सॗत्य। यि ओसमुत छु अथ मक्ज़ि याने तबरि नॆत्य माने दॊहय पूज़ा करान रोज़ान। पानस सॗत्य यि मकॖज़ थवनॖ मूजूब ॴस्य लूख वनान रोज़ान शेंकरॖन्य मकॖज़। दपान अख समाधी ति छि आमॖच़ बनावनॖ माहाराजा अमरसिंहनि दऺस्य स्वामी शंकर राज़दान सऻबनिस यज़तस मंज़ अकिस मंदरस सॗती यथ नाव छु आमुत दिनॖ रत्न ज्योत। अथ जायि निश दपान आमॖच़ छि थवनॖ ॳम्यसॖन्ज़ मकॖज़ तॖ ब्यॆयि ति कॆंह स्वामी जियिन ॳडिन्य गऺडिन्य। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव म्योन ॳज़्युक सबक़ podcast दऺस्य https://anchor.fm/bldeep)

(यि सबक़ ह्यॆकिव तोह्य वुछिथ koshursabak.blogspot.com  प्यठ ति)