18.01.2021

18.01.2021 पॊह (पौष) ज़ूनॖ पछॖ (शुक्ल पक्ष) पऻन्च़म (देवादेव) (पऺचमी) (देवादेव) च़ऺन्दॖरवार (सोमवार), श्री सप्तर्षि सम्वत 5096, राश मीन (चलान) द्रठपऻन्च़ुक (चलान) ऋतु शिशर (चलान).....अज़ छि कुमार शॆयम ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

         (पराग पुस्तक-185)

शिव गुर तय कीशव पलनस

ब्रह्मा पायर्यन व्वलर्यस

यूगी यूगॖ कलि परज़ान्यस

कुस दीव अश्ववार प्यठ च़ढ्यस

            अर्थात

यह एक अध्यात्मिक पहेली है जिस में ललेश्वरी पूछती है कि शिव एक घोडा है और केशव उसका पलना (काठी) तथा ब्रह्मा रिकाव बनकर प्रतीक्षा करते हुए झूम रहा है। योगी जिस को योग रुचि द्वारा पहचानता है। कौन है वह देव जो घुडसवार के रूप में इस घोडे के ऊपर चलने वाला या बैठने वाला हो सकता है

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

               ********

1. शाबाश (Brave/Well done/Excellent/Buck up)

2. शाख (Branch)

3. शाख तरऻशी (Cutting/Pruning of branches)

4. शाद (Glad/Happy/Joyful/Cheerful/Pleasant)

5. शादमऻनी (Happiness/Rejoicing)

                   मुहावरॖ

1. मु: वातल बट्वार 

    अ: अपुज़ वादॖ करुन, या,

         अज़ तॖ पगाह करुन

2. मु: वातलस दिच़्यॊख डायन

         गर्यन राज, तऺम्य कॊड 

         दालुव  ज़रॖब

   अ: थज़र प्रऻविथ ति नज़र छ़ॊट

         आसॖन्य,या,पनॖन्य खसलथ

         नेशनावॖन्य

3. मु: वान्या मठस नय छुय कॆंह

         वुठस ति छुय ना

    अ: अथॖ नय कथि सॗती हमदर्दी

          करॖन्य 

         ( पनॖन्य शुर्य ह्यॆछॖनऻव्यूख)

**************************

पंचान्ग:- गिरधऻरी लालुन फोटु योदवय म्यॆ वुछमुत ओस ब्यन्यगाशि सॗत्य ब्रिज नाथ जी नि गरि ॳकिस कुठचि लबि प्यठ बॖ ओसुस तऺमिस सॗत्य रू ब रू यछ़ान समखुन तॖ पताह करुन ज़ि सु किथॖ पऻठ्य तॖ कमन ओस तबाबथ करान रोज़ान यॆमि मूजूब तऺमिस ॴस्य लूख डाकटर वनान रोज़ान। व्वंय गव अथ कथि समया अख तॖ म्यॆ ॴस यि दऺपज़ि ति यि कथ मऺशथॖय गऻमॖच़ ज़ि अकि द्वह ओसुस बॖ एस पी कालिजि प्यठॖ गरॖ कुन पनॖन्यन द्वन त्र्यन हमजमऻत्यन सॗत्य पकान ज़ि ॳकिस लडकस गव मन प्रताप पार्कि मंज़ ॳच़िथ वशपा ह्यु कडनस तॖ असि ति कॊर नॖ इन्कार कॆंह तॖ च़ायि प्रताप पार्कि मंज़ दिल बऺहलऻयिया करनि। अमराकऺदलॖ ॴस यि बऺड पब्लिक पार्क। अथ पार्कि मंज़ आसॖ च़्ववापऻर्य पोशॖ टूर्य यथ मंज़ ब्यॊन ब्यॊन कॖसमॖक्य पोश ॴस्य आसान।  मंज़स ति ओस अख पोशॖ टूर गोल आकारस मंज़ तॖ तथ मंज़ ओस अख फवारॖ ति आसान यथ वुछिथ मन ओस करान ज़ि ॳथ्य नखॖ बिहिथ डुलगॊनाह त्रऻविथ करहऻव ग़म दफऻया। लूख ॴस्य अथ पार्कि मंज़ ॳच़िथ पनॖन्य दिल बऺहलऻया करान रोज़ान। ॳस्य छि बिहिथ गप शप करान तॖ अकि तरफॖ वुछ असि ज़ि कॆंह नफर ह्यॆतिन जमा गछ़ॖन्य। बीरॖ गऺयि बडान तॖ नफरा अख गव नज़रि यिमन लूकन आरॖ कॊन्डुल बनावनुक इशारॖ करान तॖ ब्यॆयि अख ल्वकुट सोंदूक ओसुस पानस ब्रोंहकनि । बॖति गोस ओर कुन वुछनि ज़ि यि नफ़र करान क्याह छु। म्यॆ तोर फिकिरी ज़ि कुस ताम बऻज़्यगारा छु आमुत पनॖन्य बऻज़्यगऺरी लूकन हावनि।कऺशीरि मंज़ ॴस्य यिथ्य कॖसॖ चलान रोज़ान तॖ कुनि कुनि जायि ॴस्य जोदूगर, बऻज़्यगर तमाशॖ हावान तॖ पौंसॖ कमावान जमाह गऻमत्यन लूकन निशि। कॆंह पठान ति ॴस्य सलाजीत याने जडी बूटी कॖनान रोज़ान तॖ यिथ पऻठ्य पनॖन्य यड बरान। यि लऺडकॖ ब्यूठ डाबॖर वायिनि तॖ ओस प्रारान लूकन हॖन्दिस समनस। डाबॖर वायान वायान छु यि लऺडकॖ वनान क्याहताम क्याहताम। म्यॆति बडेयि चाहत ॳमिस लऺडकसुन्द तमाशॖ वुछनॖच तॖ गोस बॖति खडा अथ लूकॖ हॊजूमस मंज़। वारॖ वारॖ ह्यॆतिन्य लूख समॖन्य तॖ लऺडकॖ सुन्द तमाशॖ ति ह्यॊतुन रंग रटुन। ॳथ्य असनाहस मंज़ द्राव कुस ताम अमि लूकॖ हॊजूमॖ मंज़ॖ तॖ गव सॊंदकस कुन। सोंदकस मुच़रोवुन ठानॖ तॖ ह्यॊतुन क्याहताम कडुन अमि मंज़ॖ। अख ल्वकॖट गोल कानिव टूकॖर कऺडॖन तॖ थॊवुन अथ रुमाल प्यठॖ। यान्य अम्य कलॖ थॊद तुल बॖ गोस रॊबूदॖ ह्यु तॖ प्योस ज़न आसमानॖ प्यठॖ ति क्याज़ि यि नफर ओस नॖ गऻर कांह बऺल्कि ओस यि सुय युस म्यॆ ब्रिजनाथनि गरि कुठचि लबि प्यठ टंगिथ फोटुवस मंज़ वुछमुत ओस ब्यॆन्यगाशि सॗत्य याने  पानॖ गिरधऻरी लाल। माने ब्रिजनाथुन जिजा जी। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ podcast दऺसय ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)