13.01.2021

13.01.2021 पॊह (पौष) गटॖ पछॖ (कृष्ण पक्ष) मावस (देवादेव) (अमावस्या)(देवादेव) ब्वदवार (बुद्धवार) श्री सप्तर्षि सम्वत 5096, राश मकर (दुहचि 12.5 बजि प्यठॖ) ऋतु हेमन्त (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

        (पराग पुस्तक- 180)

व्यथ रेन्या अरचुन सखर

अथि अल पल वखुर ह्यथ

यॊद वनय ज़ानख परम पद अक्षर

हिशिय खॊश खोवुर क्यथ ख्यथ

               अर्थात

ललेश्वरी संबोधित करते हुए कहती हैं कि उठ ऋणिया (भगवद् भक्ति का ऋण चुकाने के लिए) पूरी तयारी के साथ। पूजा के लिए अर्थात प्रभु से मिलने हेतु प्रस्तुत हो जा। मै तो कहती हूं कि यदि परमपद (परमात्मा) अक्षर अर्थात ओमकार को जानोगे तो तुझे किसी प्रकार की क्षति नहीं होगी अत: लाभ ही होगा। फिर दायें बायें, टेढे चलें या सीधे कोई क्षति नहीं होती है। अर्थात भोग भोगने या न भोगने से कोई अंतर नहीं पडता है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *******

1. सादगी (Simplicity/Plainness/Simple mindedness/Frankness)

2. सादना (Regulate exercise/To practise)

3. सार (Substance/Consequences/Abstract/Extract/A lane wherefrom the water is taken to small beds)

4. सारुन (To carry/To collect/To feel (with hands)/To observe)

5. सारंगी (A kind of string musical instrument)

              मुहावरॖ

1. मु: नारॖ द्राव स्वन

    अ: स्यठाह प्वख्तॖ आसुन

2. मु: नारॖ विज़ि क्रूर खनुन

    अ: गऻर वख्तॖ या नामुनऻसिब 

         वख्तॖ कऻम करॖन्य

3. मु: नारॖय छु जन्नत तॖ नारॖय छु

         जहनम

    अ: नारॖक्य ज़ॖ बुथ्य, तॊत ति तॖ 

          तुरुन ति

    (पनॖन्य शुर्य ह्यॆछॖनऻव्यूख)

**************************

पंचान्ग:- यॆलि ति बॖ ओसुस ब्रिज नाथुन गरॖ गछ़ान म्यॆ ओस ॳजीब ॳजीब तऺम्यसॖन्दि गर्युक माहोल वुछनस तल यिवान सु ज़न गव ज़ि ब्रिजनाथॖन्य मऻज्य ॴस्य त्रॆयमिस पोरस प्यठ कऻनी हॖन्ज़ि डबि प्यठ बिहिथ कॆंह न तॖ कॆंह करान आसान मतलब यॆन्दॖरस सॗत्य यॆन्द्रॖतुल ठीख करान, फम्ब कतान रोज़ान, छ़्यॆनमॖत्यन पलवन त्रॊप दिवान रोज़ान या पनॖनिस फ्यरनॖकिस दामानस डूर लागान, तरंग शेरान, पूच़ि या डुपट्टस मायि करान वगैरा वगैरा, मोल ओस ॳथ्य कऻनी हॖन्दिस ॳकिस कूनस मंज़ ज्यॆजीराह रऺटिथ आसान, ज़्यिठ्य बऻय ति ॴस्य आसान ॳथ्य कऻनी मंज़ॖ उर्दू अखबारा रऺटिथ वरख फिरान रोज़ान। ब्रिज नाथुन बॊड बॊय याने मिलट़्री वोल ओस गरि कमॖय पाहन आसान ति क्याज़ि तस ॴस गामन गुटन मंज़ ड्युवटी आसान। ब्रिज नाथॖन्य बऺड ब्यॆनि ॴस पनॖनिस वऻरिव गरस मंज़ॖ तॖ ॴस मंज़ॖ मंज़ॖ यिवान मऻलिस माजि ख़बरा अतरा ह्यॆनि। ब्रिज नाथ ओस अकसर बऺन्यमिस पोरॖकिस मंज़्यमिस कुठिस मंज़ परान लेखान तॖ ॳम्यसॖन्ज़ ल्वकॖट ब्यॆनि फूलॖ ति ॴस तथ्य कुठिस मंज़ पनॖनिस किताबॖ सोंदकस ब्रोंहकनि बिहिथ आसान। ब्रिज नाथॖन्य ज़िठ बऺयकाक्यन ॴस चोकॖ सम्बऻलिथ आसान तॖ दॊयिम बऺयकाक्यन ॴस न्यॆबरिम कऻम करान रोज़ान याने डुवुन शेरुन, पोन्य सारुन या सब्ज़ी च़ारॖन्य बेतरी। ऒत ताम ओस ठीख मगर गरस मंज़ बिहिथ बऻय बारॖन्य ज़ॖ वुछ न म्यॆ ज़ांह ति पानवुन्य अख ॳकिस सॗत्य कथ बाथ करान या असान गिन्दान।  दॖरकाकिनि दॊशवय ति आसॖ पानस पानस मंज़ॖय आसान। ब्रिज नाथ ति ओस कमॖय पाहन पनॖन्यन बायन सॗत्य म्युल थऺविथ। गरॖ ओस ब्वरुत मगर ओस छ़ॊर बासान। यिकॖवटॖ ॴस्य सऻरी मगर ॴस्य ॳकिस ब्यॆयिस निशि ब्यॊन ब्यॊन। यॆलि त्यॆलि ति बॖ गोस ब्रिज नाथुन गरॖ, यिहोय मंज़र ओसुस बॖ वुछान प्रथ विज़ि। ज़िठ हिश बऺयकाक्यन ॴस जान स्वभावॖ किन्य मगर तसॖन्ज़ दॖरकाक्यन्य ॴस स्यदॖ चऻर हिश बासान। दूत्य बॆडंगॖ कऺरिथ, अकि अंदॖ ग्वडव ह्यॊर तॖ दॊयिमि अंदॖ ब्वॊन ज़न ति त्रेशि वऺछ़मॖच। मस परेशान। दपान स्व ॴस अकसर पां नऺट्य सारान रोज़ान न्यॆबरॖ सरकऻर्य नलकॖ प्यठॖ ति कयाज़ि तस ओस नॖ वार यिवान आंगनॖकिस नलकॖ सॗत्य। तऺम्यसॖन्ज़व हरकच़व मूजूब ॴस्य अहलॖक्य मऺहलॖक्य लूख वनान तस इशॖ क्वकॖर तॖ ॳम्यसॖन्दिस रॗनिस ॴस्य वनान वासॖकाकॖन्य गासॖ नाव। असली नाव ओस तस वासुदेव। सु ति ओस बुथि तलॖ बासान स्यदॖ चोराह ह्यु न ऒर तॖ न यॊर। अति ओस फस्यॊमुत मंज़बागॖ ब्रिज नाथॖय योत बिचोर युस यिमन सारिनी बऻच़न निशि बिल्कुल ब्यॊन ओस प्रथ रंगॖ। तोर तऺरीकस मंज़, परनस लेखनस मंज़, व्वथनस बॆहनस मंज़, कथि हॖन्ज़ि तुल त्रावि मंज़। यि दऺपज़ि ति ब्रिजनाथॖय यॊत ओस बासान अथ गरस मंज़ अख इन्सान। यॆमिस सॗत्य म्यॆ गऻमॖच़ ॴस ज़ान पहचान। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ 

koshursabak.blogspot.com प्यठॖ ति)