21.01.2021

21.01.2021, पॊह (पौष) ज़ूनॖ पछॖ (शुक्ल पक्ष) ॴठम (देवादेव) (अष्टमी) (देवादेव) ब्रसवार (वीरवार/बृहस्पतिवार), श्री सप्तर्षि सम्वत 5096, राश मेष (चलान) ऋतु शिशर (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

               लल वाक्

       (पराग पुस्तक-188)

स्वर्गस माज़ुन क्या छुय बासनो

नरकस वासुन आसुन द्वेश

च़ख रॖश नासुन शिवमय आसुनो

पानय आसुन कासुन भीद

             अर्थात

स्वर्ग से राग तथा नरक से द्वेष क्यों करते हो? राग द्वेष का अभाव ही शिवमय होने का आभास कराता है। शिवमयता स्वयं ही भेद को नष्ट करती है

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              ********

1.शऻमियानॖ (Pavilion/Canopy)

2. शान (Dignity/Splendor/Glory/Luster/Respect)

3. शानदार (Dignified/Splendid)

4. शान शौकत (Pomp and show/Glory/Splendor)

5. शानॖ बॊड (Splandour/Dignified/Honourable/Famous)

              मुहावरॖ

1. मु:  वावस नावि सऻल

    अ:  बे मोकॖ कऻम करॖन्य

2. मु:  वऻन्य दांद तॖ लऻन्य कान। 

    अ: अकि ख्वतॖ ज़्यादॖ कऻम 

          करनस मंज़ मऻहिर आसुन

3. मु: वाव वुछिथ नाव त्रावॖन्य

    अ: करनॖ ब्रोंह सोंचुन, या, 

         सूंचिथ समजिथ क़दम 

         तुलुन

      (पनॖन्य शुर्य ह्यॆछॖनऻव्यूख)

**************************

पंचान्ग:- वैसे ति ओस म्यॆ व्वंय ब्रिजनाथुन युन गछ़ुन हना कम्य पाहन ति क्याज़ि व्यस्तॖता ॴस बडेमॖच़ पनॖनि पनॖनि जायि तऺमिस ति तॖ म्यॆ ति। ब्रिज नाथ ओस नोकरी करान तॖ बॖति ओसुस कालिजिच पडायि सॗत्य सॗत्य कनिकऺदलॖ शिवाला मंदरस मंज़ ॳकिस ड्रामा पार्टी मंज़ ज़ंगॖ ज़ंग करान रोज़ान। मोहन लाल ति ओस पटवऻर्य ट्रेनिंग मंज़ आवुर तॖ तऺमिस निश ति रूद युन गछ़ुन मंज़्य मंज़ीय। गिरधऻरी लालुन डाक्टर आसनुक पज़र ति ओस व्वंय नन्योमुत तॖ यिथॖकऺन्य ओस राज़स फाश गोमुत। तोति प्रुछ़ म्यॆ द्वह अकि ब्रिजनाथस गिरधऻरी लालॖन्य कथ तॖ तमि द्वह गव ब्रिज नाथ छितॖ ह्यु, बुथिस फ्यूरुस ल्यॆदरर्यार तॖ ज़्यव ज़न गऺयस ख्वखॖर हिश तॖ वॊनुन ज़ि शोठ ओस तमि सातॖ ल्वकुट येलि ब्यॆनिगाशि खान्दर कॊरुख। वॊनुन ज़ि बॖ ओसुस  गरस मंज़ ल्वकुट तॖ तमि मूजूब ॴस नॖ  म्यॆ ताम वातान ख़बर ज़ि गरस मंज़ सपदान क्याह छु। पज़र ति छु ती। यॊदवय तॊह्य पॊत काल वुछिव, कऺशीरि मंज़ ॴस्य प्रथ बटॖ क्यो मुसलमान गरस मंज़ आसान शॆ शॆ सथ सथ शुर्य तॖ गरॖक्य मसलॖ ॴस्य नॖ ल्वकट्यन  शुर्यन ताम वातानॖय। म्यॆ छु बूज़मुत ज़ि हऻन्ज़स तॖ वातलस ॴस्य आसान शुर्य तंदल। दपान ॴस्य ज़ि हऻन्ज़स ॴस्य शुर्य बऺडिथ बाहच़ि लमनस लगान तॖ वातॖलस ॴस्य शुर्य बऺडिथ कमऻयि करनस लगान ति क्याज़ि वातलस दपान ॴस आसान कमऻय स्य़ठहॗय कम तवय ॴस्य तऺमिस ज़्यादॖ ज़्यादॖ शुर्य आसान। यिथय पऻठ्य यॆलि व्यतस्तायि मंज़ हऻन्ज़ ओस बाहच़ पकनावान  दोलॖ दिशायि मंज़ पान्युक बहाव ओस नॖ बाहच़ि ब्वनॖ प्यठॖ ह्यॊर कुन खसनॖ दिवान तॖ हऻन्ज़ ओस रज़ि सॗत्य लमान रोज़ान तॖ अदॖ ॴस बाहच़ वारॖ वारॖ पकान रोज़ान। सु नज़ारॖ ति ओस आसान वुछुन लायख। ॳड्य हऻन्ज़ तॖ हऻन्ज़ बायि आसॖ हमतुल चलावान रोज़ान तॖ कॆंह हऻन्ज़ ॴस्य बाहच़ि रज़ गऺन्डिथ पानॖ दऺर्यावॖ बठि बठि लमान रोज़ान तॖ बाहच़ि ओस सऺही दक्कॖ मेलान। यिति आसि याद म्यान्यन बायन ब्यॆन्यन ज़ि कऺशीरि मंज़ ओस शहरस मंज़ लूकन माहानॖ राशन बाहच़व दऺस्य वातान। बाहच़व दऺस्य ॴस्य ब्यॆयि ति वारियाह चीज़ यिवान सारनॖ होरॖ योर याने अकि जायि प्यठॖ ब्यॆयिस जायि ताम वातनावानॖ, मसलन म्यॆच़, कनि, स्यख, सुरिख्य, सेरि, रूड्य वगैरा वगैरा। यिथय पऻठ्य ॴस वातल कलहीर कथ ति मशहूर कऺशीरि मंज़ यॆम्युक ज़िकॖर ब्यॆयि कुनि द्वह करव। खऻर ब्रिजनाथस ओस नॖ ब्यॆयि अमि मऺज़ीद तऺम्यसॖन्दिस ब्यॆमस मुतलक प्रछ़नस कांह मतलबॖय मगर यूत लॊग पताह ज़ि अथ कथि मंज़ ओस अख मंज़िमयोर ति आमुत बारसस। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)