28.09.2020

28.09.2020, ॴशिद(मलमास)(आश्विन/ॳसूज) ज़ूनॖ पछॖ (शुक्ल पक्ष) बाह (द्वादशी) च़ऺन्दॖरवार (सोमवार), श्री सप्तर्षि सम्वत 5096, राश कुम्भ (दुहचि 9.40 बजि प्यठॖ), ऋतु हरुद (शरद) (चलान)..द्रठॖपऻन्च़ुक (पंचक) शुरु

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुतै

**************************

               लल वाक्

         (पराग पुस्तक-73)

मनस सॗतिय मनॖय गॊंडुम

च़्यतस रऺटॖम च़्वपऻर्य वग

प्रकृच़ सॗतिय प्वरुश नो वॊलुम

सरॖह म्यॆ कॊरुम लऺबॖम वथ

          अर्थात

मैं ने मन से मन को बांध लिया। प्रकृति से पुरुष को अलग रखा। चित को चारो ओर से लगाम लगाई अर्थात थाम लिया। ऐसा अनुभव करके मैं ने गंतव्य का रास्ता पा लिया।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ********

1. पाबंद (Bound/Committed/Habituated/ Restrained/Detained/Imprisoned/Checked/Controlled)

2. पाबंदी (Restraint/Restriction/Detention/Check/Control/Commitment)

3. पाफ (Wickedness/Crime/Villain/Guilt)

4. पाफ खसुन (To commit a crime/To become guilty)

5. पाताल (The lower (infernal regions hell - According to Hindus lower region of world infested by fiends and serpents)

              मुहावरॖ

1. मु: पौंसॖ गव पारुद तॖ म्यकराज़

    अ: पौंसस छु हदॖ ख्वतॖ ज़्यादॖ

          ताक़त

2. मु: पौंसस निश छु पौंसॖ वातान

    अ: पौंसॖवऻलिस निश छु पौंसॖ 

          वातान

3. मु: पौंसॖ थऺव्यज़ि म्वर्दस प्यठ 

         सु ति गछ़ि ज़िन्दॖ

**************************

पंचान्ग :- श्री बी के शायर याने पंडित ब्रिज कृष्ण शायर, यसुन्द देहान्त सपुद कॆंह द्वह ब्रोंठ, ओस अख गायक तॖ ब्यॆयि रेडियो कलाकार। ल्वकचार प्यठय ओस ॳम्य लुकॖ-बऻथ ग्यवॖन्य ह्यॆछमॗत्य। ॳम्य ॴस तरबियत नीमॖच़ पंडित  रामेश्वर गिगू सऻबस निश। ॳम्य ओस एम ऐ कॊरमुत ग्यवनस मंज़ अल्हाबादॖ प्यठॖ तॖ ॴसॖन डिग्री हऻसिल कऺरमॖच़ इन्डियन क्लासिकॖल म्यूज़कस मंज़। संगीत रचनाकार अलावॖ ओस ब्रिज कृष्ण अख नामावार कलाकार रूदमुत रेडियो स्टेशन, श्रीनगरॖ तॖ दूरदर्शन कऺशीरि मंज़। श्री बी के शायिर सऻबन ओस ज़ऻनदार मऺहलॖ, श्रीनगरॖ, कऺशीरि मंज़ पनुन अख इन्सटिच्यूट खूलमुत, यथ नाव दिन आमुत ओस अर्विंद म्यूज़िक इन्सटिच्यूट। हारमोनियमस प्यठ ओस ब्रिज कृष्ण जियन वारियाहान कलाकारन सॗत्य साथ द्युतमुत।ब्रिज कृष्णन छि वारियाह कलाकार ह्यॆछिनऻवमॖत्य संगीत तॖ सऺगीतुक व्याकरण। ॳम्यसॖन्दि अथॖ ह्यॆछिथ यिमव कलाकारव पनुन अख थोद मुकाम प्रोव गायकी पेशस मंज़, तिमन मंज़ छि कॆंह मशहूर नाव स्व. विजय मल्ला, इन्दु भूषण कौल, दीपाली वातल तॖ रवी भान। यि नामावार तॖ कदावार हऺस्ती गऺयि यि संसार त्रऻविथ बस कॆंह द्वह ब्रोठ। विष्णुबवनस ॴस्यनस जाय।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक म्यानि ज़्यॆवि ति)

(koshursabak.blogspot.com ति वुछिव)