17.09.2020

17.09.2020, ॴशिद (आश्विन/ॳसूज) गटॖ पछॖ (कृष्ण पक्ष) मावस (अमावस्य) ब्रसवार (वीरवार/बृहस्पतिवार/गुरुवार), श्री सप्तर्षि सम्वत 5096, राश कन्या (दुहचि 3.6 बजि प्यठॖ),ऋतु हरुद (शरद)(चलान) कांबॖर्य पछ (पितृ पक्ष) (चलान)

**************************

अज़ छि कांबॖर्य पछ (पितृ पक्ष) मावस (अमावस्या) याने प्यॆतरॖ मावस (सर्व पितृ अमावस्या).अज़ यी मावसि हुन्द तॖ पुनिम हुन्द श्राद्ध इकव़ट तॖ यॊदवय कऻन्सि पितृ सुन्द तिथि याद आसि नॖ, तस सुन्द श्राद्ध ति यी ॳज़्य। यिथ पऻठ्य वाति पितृ पक्षुक अंद अज़

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूक करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

         (पराग पुस्तक-62)

क्वश पोश तेल दॗफ ज़ल ना गछ़े

सदभावॖ ग्वरॖ कथ युस मनि ह्यये

शंभुहस स्वरि नित्य पनने यछ़े

सय दपज़े सऺहॖज क्रय न ज़्यये

          ***********

अर्थात:- कुशा, फूल, तिल, दीप तथा जल का पूजा में प्रयोग करने की कोई आवशयकता नहीं है। अपितु ग्वरु की बात को श्रद्धा के साथ मन में धारण कर, तथा श्रद्धा से परमशिव का नित्य स्मरण करना ही सहज क्रिया हे।ऐसी क्रिया से पुनर्जन्म नहीं होगा।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दऺपित

1. ॳछ यिनय आसनि (Immature)

2. ॳछरवाल (Eye lashes)

3. ॳछन ब्वछि (False appetite)

4. ॳछन मथुन (To accept with respect)

5. ॳछन हुन्द गाश आसुन (To be very dear)

              मुहावरॖ

1. मु: अतुल ख्योमुत हापतव

    अ: बेवकूफ छु ख्यवान हदॖ 

         रॊस, या ख्यॊन गछ़ि हदस

         मंज़

2. मु: उतनि बलायि तुत

    अ: ॳक्यसॖन्दि बलायि ब्याख

         लगुन

3. मु: ॳथ्य दऻर्य वुछनय म्यानि 

         ॳछ मॖ वुछनय

    अ: अख वॊहव, या मदद करनॖ 

         बदलॖ सखती करॖन्य

**************************

पंचांग:- नऺव ख़बर तॖ नॊव सफ़र। न्वशि रॊट कमरस मंज़ अख कूनाह बाकय बऻच़न निशि ब्यॊन। आयि दॊयिमि द्वह नफ़र जोरा ह्यल्थ मऺहकमॖ प्यठॖ तॖ कॊरुख सैनिटायज़र फ्लैटॖक्यन सारिनी कमरन, किचनस, बालकऻनीयन, वाशरूमन, यि दप्यज़ि ति प्रथ कुनस, प्रथ चीज़स, ब्यडन, फऺर्नीचर आईटमन, किताबॖ अलमारि, ठोकुर कुठिस, शुर्यन हॖन्दिस कमरस, तिहन्ज़न किताबन, शू रैकस मंज़ थऻव्यमॖत्य बूटन, चपॖन्यन, गमलन वगैरा तॖ लऺगिख गन्टॖ जोराह तॖ द्रायि यि वऺनिथ ज़ि हिरासॖ गछ़ि करुन। अथॖ गछ़ि छलान रोज़ॖन्य, गर्म त्रैश्य गछ़ि च्यवान रोज़ॖन्य बेतरी। यपऻर्य रूद्य फ़ोन यिवान तॖ पनॖनि पनॖनि हिसाबॖ छॆछ खबर रूद्य प्रॖछ़ान। फ्लैट्स मंज़ सोन पोर आव नवि सरॖ सील करनॖ ब्यॆयि च़्वदहान दॊहन प्यठ। हालांकि मार्चॖ प्यठॖ वोत असि गरस मंज़ॖय बिहिथ दारि बर त्रॊपरिथ, यि तॊर नॖ फिकिरी ज़ि यि बलाय आयय तॖ कपऻर्य आयि तॖ गरॖ सोन किथॖ पऻठ्य तॖ कपऻर्य च़ायि। अस्पतालस मंज़ प्यव असि यि पछ प्यॆठ ह्यु मगर व्वं कमरस मंज़ ब्यॆयि अलग अलग कून रटॖन्य ति रूद अख सख अज़ाब, मगर कयाह करहऻव, ॳस्य ॴस्य लाजवाब। अख हऻरऻनी हॖन्ज़ कथ छम ज़िमनी वनॖन्य। स्व गऺयि यि ज़ि म्योन ज़्युर (न्यॆचिवि सुन्द न्यॆचुव) छु अज़ वारॖकारॖ पऺदाह वुहुर तॖ तमिसॖन्दि ज़्यनॖ प्यठॖ वुन्युख ताम छु सु आमुत श्वंगान  ग्वडॖ पनॖनि नानि निश, तॖ 2016-हस मंज़ तमिसॖन्दि स्वर्गवास गछ़नॖ पतॖ म्यॆय निश। हफ़तस मंज़ कुनि कुनि सातॖ बटॖवारी द्वह ओस म्यॆ इजाज़थ ह्यवान तॖ गछ़ान ब्यॆयिस कमरस मंज़ पनॖनि माजि निश श्वंगनि। कोरोनावयरसन होव व्यॊखतॖय रूपाह ज़ि सु गव म्यॆ निशॖ अलग तॖ व्वं छु बिल्कुलॖय अलगॖय। तऺमिस ति वऻत्य यीत्य ऱ़यथ म्यॆ निशि दूर्यर थवान तॖ म्यॆति बासान क्याह ताम कऺमी हिश। यॆमि महामऻरी क्याह क्याह कऺन्डय वाहरऻव्य, कपऻर्य कपऻर्य वाहरऻविन, कम कम अनिन पनॖनिस ज़दस मंज़। बयान करुन छु स्यठाह मुश्किल।  कथ छि जऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)