08.09.2020

08.09.2020, ॴशिद (आश्विन/ॳसूज) गटॖ पछॖ (कृष्ण पक्ष) शॆयम (षष्ठी) बॊम्वार (मंगलवार) श्री सप्तर्षि सम्वत 5096, राश वृष (दुहचि 3.9 बजि प्यठॖ), ऋतु वऺहरात (वर्षा/बरसात) (चलान), कांबॖर्य पछ (पितृ पक्ष) (चलान)

**************************

कंबॖर्य पछॖ शॆयम (षष्ठी) हुन्द श्राद्ध यी अज़

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

अंदरीय आयस च़ंदरॖय गारान

गारान आयस हियन हि

च़ॖये नारान च़ॖये नारान

च़ॖये नारान यिम कम विह

         *********

अर्थात:- मैं ने अपने गहन अभ्यास से सहस्रार में चन्द्रमा (शिव) को देखा और इसके समान का जोडा तलाश करने लगी, किंतु नहीं मिला। अपितु इन ही को सर्वत्र पाया। फिर कहने लगी कि हे परमात्मा। आप ही सर्वत्र व्याप्त हो फिर आपकी यह उत्पत्ति, पालन और संहार का नाटक क्यों हे। यह सब कैसा व्यवहार है

*************************

नव ग्रहन हॖन्द्य कऻशिर्य पऻठ्य नाव छि -

सिरयि (सूर्य), च़न्द्रमॖ (चन्द्रमा), बोम् (भौम), ब्वद (बुध), ब्रहस्पथ (ब्रहस्पति), शॊकुर (शुक्र), शनिश्चर (शनि), राहु (राहु), केतु (केतु)

राश छि बाह यिहॖन्द्य नाव छि -

1. मेष (Aries) 2. वृष (Taurus) 3. मिथुन (Gemini) 4. कर्क (Cancer ) 5. सिंह (Leo) 6. कन्या (Virgo) 7. तुला (Libra) 8. वृश्चिक (Scorpio) 9. धनु (Saggittarius 10. मकर (Capricorn)11. कुम्भ (Aquarius) 12. मीन (Pisces)....पनॖन्य शुर्य ह्यॆछॖनऻव्यूख

**************************

पंचान्ग:- चूंकि न्वश ॴस सानि ज़ॖ द्वह ब्रोंठ याने दऺहमि आगस्तअस्पताल वऻच़मॖच़, ॳमिस दिछ़िख छुटी कुनवूहमि अगस्त यि वऺनिथ ज़ि पान्च़ि द्वह पतॖ युन ब्यॆयि तॖ कोवीट ट्यस्ट दुबारॖ करनावुन। बाकय सिम्पटमज़ बास्यॆयि डाक्टरन न्वशि मंज़ ठीख। ॳम्यसॖन्दिस खानदारस तॖ म्यॆ दॊपुख वुनि क़रार करुन ब्यॆयि कॆंच़न द्वहन। यॆलि म्यॆ बूज़ ज़ि न्वश वऻच़ गरॖ, भगवानस कॊरुम मनॖ अंदरी लाख लाख शुखुर ज़ि मऻज्य वऻच़ पनॖन्यन पूत्यन निश ब्यॆयि वारॖ कारॖ वापस। शुर्यन ति बूज़ुम ॴस नॖ पछ़ आमॖच़ कुनि पनॖन्य मऻज्य पानस ब्रोंह कनि गरस मंज़ ठीख ठाख वुछिथ। व्यॆच़ेमॖत्य ॴस्य नॖ कुनि। कऻन्सि शुरिस गछ़ि नॖ मऻज्य छ़्यनॖ गछ़ॖन्य मगर तऺम्यसॖन्दिस (ईश्वर) करनस कुस रुकावि। आई सी यू-अस मंज़ ब्यैडस प्यठ बिहित द्युत अकि द्वह ख़यालन फ्युर ह्यु तॖ बॖ वोतुस कऺशीरि पनॖनिस ल्वकचारस कुन याने 1950 या 1951 ईस्वी, तॖ प्योम तत्युक हैडुन शफाखानॖ याद। ब्यॆयि प्योम याद द्र्वगजन शफाखान। म्यॆ छु याद ज़ि म्योन प्यॆतॖर ओस दऻखॗल द्र्वगजनॖ शफाखानस मंज़ तमि वख्तॖ ति क्याज़ि तऺमिस ॴस सीनॖच ब्यमऻर्य नवेमॖच़। द्र्वगजन शफाखानस ओस नाव आमुत दिनॖ च्यस्ट डिज़ीज़ ह्वास्पिटिल। यि शफाखानॖ ओस डलगेटॖ शंक्राचारिकिस पहाडॖ दामनस तल आमुत बनावनॖ तॖ यिम कॆंह खास ब्यमार दमहॖक्य या टी बी-हिक्य ॴस्य आसान, तिमन ब्यमारन ॴस्य ॳथ्य शफाखानस मंज़ करान दऻखॖल। मानॖनॖ ओस आमुत दपान ज़ि चूंकि अथ शफाखानस अंद्य पऺक्य ओस साफ शफाफ फिज़ह आसान अकि तरफॖ डल जील, डलुक साफ़ सुथरॖ च्यनॖवोल पोन्य, ब्यॆयि तरफॖ शंक्राचार मंदॖर युस पहाडस प्यठ बऺनिथ छु, ब्रुंहकिन्य शहर ग्रज़वुन, दपान अथ शफाखानस मंज़ बऺर्ती गऻमॖत्य ब्यमार ॴस्य जल जल सेहतियाब सपदान। यि ॴस ब्याख कथ ज़ि दवाहऻन हॖन्ज़ कमी ॴस खलान सख तॖ टी बी या दमहॖक्य मऺरीज़ ॴस्य कमॖय पाहन वापस फ़ेरान मगर डाक्टर ॴस्य कऻबिल, तजरुबॖकार, नामावार मगर मजबूर दवहऻव मूजूब। कोरोनावयरसस च़ऺलरावनॖ बापथ छु नॖ वुनि ति कांह इन्जक्शन बन्योमुत, हालांकि दावा छि करान जलदॖय यी बाज़रस मंज़ मगर ॳस्य छि वुनि ति अथन लदॖन्य लायक़ यथ महामऻरी हॖन्दिस सऺत्यमिस ऱयतस मंज़ ति। मरन वाल्यन हॖन्ज़ ग्रन्द छि द्वह पतॖ द्वह हुर्रानॖय कम गछ़नॖच नाव छॆ नॖ ह्यवान। राथ सपुद सानि समाज्युक अख नामावार शखॖस, श्री बी एल साधु चन्डीगडस मंज़ स्वर्गवास। यिति ओस रॊटमुत कोवीट-19-हन। समाजुक अख अहम् कारकुन ओस यि साधु सऻब। कथ छि जऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)