05.09.2020

05.09.2020, ॴशिद (आश्विन/ॳसूज) गटॖ पछॖ (कृष्ण पक्ष) त्रय (देवादेव) (तृती) बटॖवार (शनिवार/शनिश्चरवार) श्री सप्तर्षि सम्वत 5096, राश मेष (रऻच़ हॖन्ज़ॖ 2.20 बजि प्यठॖ), द्रठॖपऻन्च़ुक (पंचक) (समाप्त), ऋतु वऺहरात (वर्षा/बरसात) (चलान), कांबॖर्य पछ (पितृ पक्ष) (चलान)..अज़ छि संकट च़ोरम (संकट निवार्न चतुर्थी) ति

**************************

अज़ छु नॖ कांह श्राद्ध...अज़ छु थख

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           लल वाक्

ओमुय अकुय अछुर पॊरुम

सुय हा मालि रॊटुम व्वन्दस मंज़

सुय हा मालि कनि प्यठ गॊरुम तॖ च़ॊरुम

ॴसॖस सास तॖ सपनॖस स्वन

          ************

अर्थात:- मैं ने एक ही अक्षर ओम् पढकर उसे हृदय में धारण किया और उसे सुन्दरता से स्लेट पर सजाकर लिखती भी रही। ऐसा करने से ही मैं राख या भस्म से सोना बन गई। अर्थात मेरा लक्ष्य पूरा हुआ।

सारांश यह कि केवल ओमकार का नितांत अनुसरन करने से मैं परिपक्व हो गई और मैं अपने लक्ष्य को प्राप्त हुई।

**************************

म्यवन याने फलन हॖन्द्य नाव कऻशिर ज़बऻन्य मंज़ छि - च़ूंठ, टंग, बबॖगोशॖ टंग, ॴर, च़ेरॖ, च़ॖनॖन्य, त्रेलॖ, गिलास, डबल गिलासॖ, दऻन, तुल, शाह तुल, बम्बॖच़ूंठ, ह्यन्दॖव्यन्दॖ, खरबुज़, ॴल्यचि, ग्वरदऻल्य, संगतरॖ, अम्बॖ केलॖ, अमरुद, किन्नू, दछ, बादाम, डून, खज़ॗर, किवी, नारजील...पनॖन्य शुर्य ह्यॆछिनऻव्यूख

**************************

पंचान्ग:- ग्वडनिच राथ द्रायि तॖ दॊयिमि द्वह आव नफ़र असि बाकय बऻच़न ट्यस्ट करन बापथ। ट्यस्ट कऺरिथ दॊपुन ज़ि रिपोर्ट वाति च़ॊवुहन गन्टन अंदर अंदर। यपऻर्य ओस अस्पतालस मंज़ न्वशि सॗत्य फोनस प्यठ कथ बाथ चलान। यलाज ओस शुरु गोमुत तॖ अस्पताल वाल्यव दॊप ज़ि ब्यॆयि पन्च़ाह सास कऺरिव जमाह। हालांकि न्वशि ओस म्यॆडिकॖल इन्शोरैन्स, मगर यीतिस कालस स्व कारवऻई गछ़िहे पूरॖ, तीतिस कालस दोप अस्पताल वाल्यव ज़ि पनॖनि चन्दॖ प्यॆयि पौंसॖ बरुन तॖ ॴखरस मंज़ यी हिसाब किताब करनॖ। यिमव रऺट्य रॖखि प्यठ। यिथॖ तिथॖ कऺर्य अमि द्वह ब्यॆयि पन्च़ाह सास रॊपियि जमाह। बाकय बऻच़न हुन्द ट्यस्ट रिपोर्ट आव तॖ नन्यव ज़ि म्यऻनिस न्यचविस ओस नग्यॆटिव मगर म्यॆ तॖ ल्वकट्यन द्वन शुर्यन ओस पोज़िटि्यू रिपोर्ट। मसलॖ गव ब्यॆयि खड़ा ज़ि गरि कुस रोज़ि तॖ अस्पताल कुस गछ़ि। पानॖवुन्य मशवरॖ कऺरिथ, डाक्टरस सॗत्य कथ बाथ कऺरिथ गव यि फऻसलॖ ज़ि शुर्य ज़ॖ रोज़न गरि, होम कोरोटायन, तॖ म्यॆ तॖ म्यऻनिस न्यॆचविस प्यॆयि अस्पताल दऻखॖल गछ़ुन। नगेट्यू रिपोर्ट आसनॖ पतॖ ति प्यव म्यऻनिस न्यॆचविस अस्पताल दऻखॖल सपदुन ति क्याज़ि तफ ओस चलान ॳमिस ति तॖ लऻज़्यमी ओस बनान अस्पताल बऺर्ती गछ़ुन। भगवान सुन्द नाव ह्थ थऺव्य शुर्य गरस मंज़ पुरॖ पऻठ्य ह्यॆछनऻविथ तॖ समजऻविथ ज़ि क्याह कऺर्यज़्यवॖ क्याह नॖ कऺर्यज़्यवॖ, वऻत्य ॳस मऻल्य पॊत्र ति यशोदा अस्पताल, कोशम्बी त्रॆयिमि द्वह न्वशि हॖन्दि पतॖ। बॖ वातनोवहोस स्यॊदुय आई सी यू-हस मंज़ तॖ म्योन न्यॆचुव थोवुख वार्डस मंज़। अच़ुवुनुय वॊनुख ज़ि अख लछ रॊपियि करुन ब्यॆयि जमाह। यि वऺनिथ ति ज़ि अकी गरॖक्य बऻच़ छि, अख लछ रॊपियि छु ग्वडय जमाह कऺरिथ मगर तिमव गॊन्ड नॖ सु सऻनिस हिसाबस सॗत्य। व्वथ वलथ कऺरिथ प्यव अख लछ रॊपियि ब्यॆयि जमाह करुन। गरस गऺयि ज़ॖ हिसॖ, ज़ॖ शुर्य रूद्य गरस मंज़ तॖ त्रॆ बऻच़ वऻत्य अस्पताल। मोबाईल ओस बस अख ज़ऺरियि यॆमि सॗत्य ॳस्य ॴस्य ॳकिस ब्यॆयिस सॗत्य राबतॖ कऻयिम कऺरिथ।आसुन छु वथ हावान, न आसुन छु मंदॖछावान। कथ छि जऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)