02.09.2020

02.09.2020 बऻद्रप्यथ (भाद्र) ज़ूनॖ पछॖ (शुक्ल पक्ष) पुनिम (देवादेव) (पूर्णिमा) ब्वदवार (बुद्धवार), श्री सप्तर्षि सम्वत 5096, राश कुम्भ (चलान), द्रठॖपऻन्च़ुक (पंचक) (चलान) ऋतु वऺहरात (वर्षा/बरसात) (चलान)

**************************

ॳज़्यकि प्यठॖ छु कांबॖर्य पछ (पितृ पक्ष) शुरु। कांबॖर्य पछ ऒकदुहुक (प्रतिपदा) श्राद्ध यी अज़

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

लल बो लूछ़ॖस छ़ान्डन तॖ ग्वारन

हल म्यॆ कॊरमस रसॖनि शिति

वुछुन ह्यॊतमस तऻन्ड्य डींठमस बरन

म्यॆति कल गनेयम ज़ि ज़ोगमस तती

            *************

अर्थात:- मैं लल उसे ढूंढते ढूंढते थक गई किंतु मैं ने भी गहन यत्न के लिए कमर कस ली। उसका नाम जींह्वा से सैंकडों बार पुकारा। जब उसे देखने की बारी आई तो पाया कि उसके दरवाज़ों में ताले लगे थे। मेरी भी जिज्ञासा तीव्र हो गई और दर्शन के लिए ताक में बैठकर मैंने वहीं दरवाज़े पर डेरा जमा लिया

**************************

वऺरियिक बाहन ऱयतन हॖन्द्य नाव कऻशिर ज़बऻन्य मंज़ छि - चिथ्थॖर (चैत्र), वह्यक (बैशाख), ज़्येठ (ज्येष्ठ), हार (आषाढ), श्रावुन (श्रावण/सावन), बऻद्रप्यथ (भाद्रपद/भादों), ॴशिद (आश्विन/ॳसूज), कार्तिक (कार्तिक/कतक), मॊंजहोर (मार्ग), पॊह (पौष), माग (माघ), फागुन (फाल्गुन)....शुर्य पनॖन्य ह्यॆछनऻव्यूख

**************************

पंचान्ग:- बासान छुम तफ ह्यु, न्वशि वॊन म्यॆ कुन। परवाय छु नॖ "डोलो" ख्यॆयिव या ख्यॆयिव "पैरासिटमाल" द्युत म्यॆ जवाब न्वशि। नेरुन अच़ुन ओस नॖ कुन, सऻरी छि पनॖन्य कऻम करान। शुर्य ज़ॖ छि गरस मंज़, अख छु रोज़ान व्यस्त आन लाईन स्कूल/ट्यूशन क्लासस सॗत्य, दॊयिम छि कमिताम ईम्तिहानॖच तयऻरी करनस मंज़ मस्त। न्वशि हुन्द खानदार ति छु पनॖनि कथ ताम कामि सॗत्य पनुन पान आवुर थऺविथ तॖ बॖ छुस रिटायर गछ़नॖ पतॖ दिवान थपॖ गरा ॳकिस किताबि तॖ गरा ब्यॆयिस किताबि, मंज़्य गछ़ान टी वीयस कुन तॖ वुछान ख़बर अतर या कांह ख़ास प्रोग्रामा तॖ नेरान सारिनी ओस द्वह द्वह तॖ दिवान सॗत्य सॗत्य बारव कोरोनावयरसस ज़ि ज़ानि दय कर च़लि यि महामऻरी तॖ ॳस्य ति मुच़रावहऻव यिमन क्वकर मुर्यन दरवाज़ॖ। फऺट्य ज़न अंदर अंदरॖय बिहिथ। बस ख्यना च्यना करान तॖ पकनावान गरॖ नाव ब्रोंह कुन। दॊयिमि द्वह वुछ न्वशि, तफ छु खसानॖय तॖ वसान नॖ कॆंह। दवा रूद चलवुन मगर व्वं ह्यॊतुन मसलॖ हना संजीदॖ बनुन। फोनॖच सहूलियत छि, अमि न्वशि य्यॊस गरि प्यठय दफतरॖच कऻम करान ॴस, कॊर दफ्तरकिस डाक्टरस सॗत्य मशवरॖ ज़ि यि तफ क्याजि छु नॖ वसनुक नावॖय ह्यवान। तऺम्य दिच़ राय ज़ि कोरोना ट्यस्ट करनावुन। पगाह यी अख नफ्रर योर, न्वशि वॊन म्यॆ कुन, युस कोरोना ट्यस्ट करि म्यॆ। हाय हे, ॳस्य नय छिनॖ कुनुय गछ़ान, न्यबर नॖ न्यॆरान, न कांह योर यिवान तॖ ट्यस्टस लायक़ क्याह गव। म्यॆ वॊन न्वशि जवाबस मंज़। ज़ॖ त्रॆ द्वह तफ आसॖनॖ म्वखॖ छु म्यॆ बासान ज़रूरी ज़ि म्यॆ पज़ि यि ट्यस्ट करनावुन। चलो भगवान करि श्वबॖय। सोरुय आसि ठीखॖय। यीन पगाह तॖ कऺरिन ट्यस्ट। गव म्वखसरॖ यी फऻसलॖ। बॖ ह्यॊतनस सोंचस प्यॊन ज़ि ॴखॖर ट्यस्टस ताम क्याज़ि वऻच़ नोबत मगर सोंचानॖय रूदुस तॖ ब्यॊयि कॊरुम नॖ कॆंह। कथ छि जऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)