21.09.2020

21.09.2020 ॴशिद(अधिक)(आश्विन/ॳसूज)(अधिक) ज़ूनॖ पछॖ (शुक्ल पक्ष) पऻंच़म (पंचमी),च़ऺन्दॖरवार (सोमवार),श्री सप्तर्षि सम्वत 5096, राश वृश्चिक (दुहचि 3.16 बजि प्यठि), ऋतु हरुद (शरद) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

         (पराग पुस्तक- 66)

ज़न्म प्रऻविथ व्यबव ना छ़ोंडुम

लूबन बूगन बऺरॖम नॖ प्रय

सॊमुय आहार स्यठाह ज़ोनुम

च़ोलुम द्व:ख दाद पोलुम दय

            **********

अर्थात:- संसार में जन्म लेकर मैं ने ऐश्वर्य का अनुगमन नहीं किया। भोगों तथा लोब को तुच्छ समझा। सम आंहार ही पर्याप्त मान लिया तथा द्व:ख दर्द को सहन किया एवं प्रभु के नाम का ही सहारा लेती रही। 

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

**************************

1. बा-अदब (With respect/Respectfully/Well mannered)

2. बा-ख्वदा (In the name of God/Swearing of God)

3. बा-रसूख़ (Influential person/One who can talk with official head)

4. बाकऻयदॖ (Properly/Approbatory/As per rules)

5. बाब (Chapter)

              मुहावरॖ

1. मु: बऻल्य बऻल्य फ़ेरुन

    अ: आवारॖगर्दी करॖन्य

2. मु: बाह त्रख श्वंगुन तॖ खार

         व्वथुन

    अ: बॆग़म रोज़ुन

3. मु: बऻज़्य गारस बऻज़्य गरस

    अ: युस कांह बद कांछि तस छु

          पानसॖय बद गछ़ान

      (पनॖन्यन शुर्यन ह्यॆछनऻविव)

**************************

पंंचान्ग:- ॴखॖर बऺहमि अगस्त 2020, याने पूरॖ अकि ऱयतॖ पतॖ प्यव म्यॆ हावुन डाकटरस पनुन पान ति क्याज़ि दवाह यिम तऺम्य  दितिमॖत्य ॴस्य तिम ॴस्य वऻत्यमॖत्य अंद ओत ताम ख्यथ।सुय चक्कर अकि फिरि ब्यॆयि चलावुन याने अख सास रॊपियि फीस जमाह करुन तॖ ऐक्सरे तुलनावुन। खऻर! वोतुस अस्पताल लऺडकस सॗत्यन। डाक्टरस निश वातनॖ ब्रोंठ ओस प्यवान ब्यॆयिस ॳकिस कमरस मंज़ गऺछ़िथ पनुन ब्लड-प्रशर वुछनावुन तॖ सॗत्य पनुन वज़न करनावुन। शुखुर छु ज़ि तमि बापथ ओस नॖ अलग पौंसॖ प्यवान बरुन। म्यॆ करनोव बॖल्ड-प्रशर च्यक तॖ वुछुम पनुन वज़न मिशीनि प्यठ। ज़ॖ नऺर्सॖ आसॖ अमि कामि बापथ लऺगिथ यिम यि तफ़्सील ॴस्य पर्चस प्यठ लेखान डाक्टरस हावन बापथ। पनॖनि वारि प्यठ आव म्यॊन नाव ह्यनॖ तॖ ब्यूठुस तऺथ्य स्टीलकिस स्टूलस प्यठ डाक्टर सऻबनिस कमरॖ किस दरवाज़स प्यठ। बासान ओस ज़ि ज़न छु मऺरीज़ कुनि च़ूरि प्यठ आमुत रटनॖ तॗ मशवरॖ बदलॖ बासान पुलसॖच प्रॖछ़गऻर सपदान। पर्चॖ युस सास रॊपियि दिथ बनावनॖ यिवान छु तॖ पनॖन्य फाईल छि नऺर्स अमि दरवाज़ॖ प्यठॖ पानय डाकटरस पिलनावान। पानॖ छु नॖ इजाज़थ पिलनावनुक। अंदाज़ॖ कऺरिव ज़ि यूत प्रकोप छु होवमुत कोरोनावयरसन। डाकटर सॖन्दिस कमरस न्यबर यिम ति मऺरीज़ पनॖनि वारि प्रारान ॴस्य, तिम ति ॴस्य बिहिथ कुर्सियन प्यठ दूर दूर याने मंज़ॖ अख कुर्सी खऻली त्रऻविथ। डाक्टरन प्रुछ़ हाल चाल, ऐक्सरे वुछुन तॖ प्रोन न्वसखॖ ति वुछुन तॖ यॆमि लटि द्युतुन ॳकिस ऱयतस प्यठ ब्यॆयि दवाह तॖ दॊपुन सोरुय छु ठीख अल्बतॖ ऐक्सरेहस मंज़ छु वुनि कमज़्यादॖ इन्फैक्शन नज़र यिवान युस ठीख सपदि यिम दवाह ख्यनॖ सॗत्यन। अख खुशी हॖन्ज़ कथ कऺर डाक्टरन यि वऺनिथ ज़ि सऻरी सिम्पटमॖज़ मध्यनज़र थऺविथ छु नॖ म्यॆ व्वं कांह हाजथ दुबारॖ कोविड ट्यस्ट करनावनुक। ॳम्यसॖन्द्य ॳक्य लफ़ज़न खऻर म्यॆ वऻन्लिज बॊठ हिश। मनॖ अंदरी कॊरुम भगवानस शुखुर ज़ि ज़ंगि तऺल्य त्रोवनस तॖ कऺमिसताम सुन्द बत्तकाल आव बकार। लऺडकॖ ति गव ख्वश यि ख़बर बूज़िथ तॖ यक्दमॖय फीर्य गरॖ कुन वापस दवा वानॖ प्यठॖ दवा मऺल्य ह्यथ। अस्पतालॖ नेरनॖ विज़ि कॊरुम नमस्कार अस्पतालकिस गेट्स तॖ मॊंगॖमस ज़ि यिमव शफाखानव निशि थऺव्यज़ि दूर तॖ सॗती मॊंगुम मातायि ज़ि यि महामऻरी च़ऺलराव सान्यव गरव तॖ बरव निशि दूर तॖ बखॖश्य असि सारिनी आबिहयातुक नूर। कथ छि जऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)