10.09.2020

10.09.2020 ॴशिद (आश्विन/ ॳसूज) गटॖ पछॖ (कृष्ण पक्ष) ॴठम (ॳष्टमी) ब्रसवार (वीरवार/ बृहस्पतिवार/गुरुवार) श्री सप्तर्षि सम्वत 5096, राश मिथुन (रऻच़ हॖन्ज़ॖ 2.36 बजि प्यठॖ) ऋतु वऺहरात (वर्षा/बरसात) (चलान) कांबॖर्य पछ (पितृ पक्ष) (चलान)

**************************

कांबॖर्य पछॖ (पितृ पक्ष) ॴठम हुन्द श्राद्ध यी अज़

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव तॖ मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षभा शिवा धात्री स्वहा स्वधा नमोस्तुते

**************************

           लल वाक्

       (पराग पुस्तक-55)

गायत्रैय अज़पा छ़लॖ तऻजिम

सूहम सतची कऺरमस थफ 

अहमस लॊत पऻठ्य ज़ठरॖय वऻजिम

ग्वरॖ कथ पऻजिम च़ऻजिम च़ख

          *************

अर्थात:- ललेश्वरी कहती है कि मैं ने गायत्री का अजपाजाप पाठ एक विशेष विधि से सोहम शब्द द्वारा किया। अहंकार को शनै: शनै: समाप्त किया तथा गुरु की आज्ञा का पालन कर क्रोध को सह लिया।

**************************

अंगन ॴश्यनावन हॖन्द्य नाव कऻशिर पऻठ्य -

मऻज्य (माता), मोल (पिता), बोय (भाई), ज़्युठ बोय (बड़ा भाई), कून्स बोय (छोटा भाई), ब्यॆनि (बहन), ज़िठ ब्यॆनि (बडी बहन), ल्वकॖट ब्यॆनि (छोटी बहन), बऺयकाकन्य (भाभी), बेमॖ (बहनोई), बॖड्यबब (गर्युक)..(दादा), बॖड्यबब (मातामालुक)...(नाना), नान्य (गरॖच)...(दादी), 

नान्य (मातामालॖच)...(नानी), माम (मामा), मामन्य (मामी), मास (मासी), मासू (मासड), प्वफ (फुफी), प्वफू (फुफा)....पनॖन्यन शुर्यन ह्यॆछनऻविव

**************************

पंचान्ग :-  कुनवुहमि अगस्त 2020 वऻच़ न्वश गरॖ। पनॖनि नावॖच अस्पतालिच बिल वुछिथ गऺयस हऻरऻनी हिश मगर व्यस्तार ओसुस नॖ वनॖनस कॆंह। बिल ॴस बन्यॆमॖच़ अख लछ तॖ पांच़सतथ सास। शुराह सास प्यॆयि न्वशि पनॖनि चन्दॖ दिन्य तॖ बकाया म्यूल अस्पताल वाल्यन इन्शोरैंन्सॖ प्यठॖ। अकवुह अगस्त मीज्य छुटी म्यऻनिस न्यॆचॖविस ति तॖ नेरनॖ ब्रोंठ कऺरॖख तऺमिस ति बिल हवालॖ। यि बिल ति ॴस बन्यॆमॖच़ अख लछ तॖ दूहऻठ सासॖच तॖ ॳमिस ति प्यॆयि च़्वदाह सास पनॖनि चन्दॖ दिन्य तॖ बकाया पूर्ती कऺर इन्स्शोरैंन्स वाल्यव। यिति वोत पनुन गरॖ ठीख गऺछ़िथ भगवान सॖन्ज़ि मॆहरबऻनी सॗत्य। चूंकि बॖ ओसुस आई सी यू-यस मंज़ॖय, अमि द्वह याने अकवुहमि कॊडहोस बॖ अति प्यठॖ ब्यॆयि कुस ताम कुस ताम ट्यस्ट कऺरिथ तॖ वातनोवहोस बॖ कमरस मंज़। कमरस मंज़ वऻतिथ त्रोव म्यॆ फ्रख ह्यु। म्यॆ ज़न फ्यूर गाश ह्यु।आई सी यु-क नाव बूज़िथॖय छु इन्सान त्रऺहरान। दय गछ़ि पनुन अनुग्रह करुन, अथॖरॊट करुन गरि गरि। दॊयिमि द्वह आव हिस्बि मामूल डाक्टर विज़िट करनि। रिपोर्टन दिच़ॖन नज़राह तॖ गव ख्वश तॖ वॊनुन पगाह नॖ कॆंह कऻल्यक्यथ सोज़ोवॖ तॊह्य गरॖ मगर तॊत ताम छु त्वहि ज़ेरि निगरऻनी रोज़ुन युथ नॖ यि ब्यमऻर्य ब्यॆयि व्वतलिथ यी। म्यॆति कऺर बोज़नऻनाह तॖ पानसॖय सॗत्य वॊनुम ज़ि यॆति यूत, तति ब्यॆयि ज़ॖ द्वह। ॳक्य शऻयरन छि अख ग़ज़ल लीछमॖच़, यॆमुक कऻशुर तर्जमॖ छु ज़ि, ज़िन्दगी ख्वतॖ बोड सज़ा छु न कॖहीं इन्सानस, ख़ता कयाह छुस, पताह छस नॖ किहीं। आस्पतालस मंज़ वऻतिथ कम कम ख़याल छि यिवान रोज़ान, यि ह्यॆकि सुय वऺनिथ युस दर अज़ाबस लॊगॖमुत आसि। च़म ॴस म्यॆ शिहिज यि वुछिथ ज़ि न्वश तॖ न्यॆचुव वऻत्य स्यॆदि बुथि पनुन गरॖ। कऺमिस ताम सॖन्ज़ ॴही आयि यिमन बऻच़न द्वन बकार। कथ छि जऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)