09.09.2020

09.09.2020, ॴशिद (आश्विन/ॳसूज) गटॖ पछॖ (कृष्ण पक्ष) सतम (सप्तमी) ब्वदवार (बुद्धवार) श्री सप्तर्षि सम्वत 5096 राश वृष (चलान) ऋतु वऺहरात (वर्षा/ बरसात) (चलान) कांबॖर्य पछ (पितृ पक्ष) (चलान)

**************************

कांबॖर्य पछॖ (पितृ पक्ष) सतम हुन्द श्राद्ध यी ॳज़

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

              लल वाक्

अंदर ॴसिथ न्यबर छ़ोन्डुम

पवनन रगन कऺरनम सथ

ध्यानॖ किन्य दय ज़गि कीवल ज़ोनुम

रंग गव संगस मीलिथ क्यथ

         *************

अर्थात:- मेरे अंदर मौजूद होकर मैं ने उसे (शिव) को बाहर ढूंढा। फिर प्राणायाम द्वारा कुण्डलिनि जाग गई और मैं आत्मविश्वास हो गई। ध्यान द्वारा सारे जगत को प्रभू रूप ही जान लिया। इस कारण मैं भी प्रभू के रंग में ही रंग गई अर्थात उन के साथ एक हो गई।

**************************

नक्षत्र छि कुल सतोवुह, यिहॖन्द्य नाव छि - 1. अश्वनी 2. भरनी 3. कृतिका 4. रोहिनी 5. मृगशरा 6. आर्द्रा 7. पुनर्वस: 8. पुश्यामि(तिष्य) 9. अश्लेशा 10. मघा: 11. पूर्वफाल्गुनी 12. उत्तराफाल्गुनी 13. हस्ता 14. चित्रा 15. स्वाति 16. विशाखा 17. अनुराधा 18. ज्येष्ठा 19. मूला 20. पूर्व आषाढा 21. उत्तर आषाढा 22. श्रवण 23. धनिष्टा 24. शतभिशा 25. पूर्व भाद्रा 26. उत्तर भाद्रा 27. रेवति...पनॖन्यन शुर्यन ह्यॆछनऻविव

**************************

पंचान्ग:- ॳथ्य सॗत्य आम याद ह्यडुन शफ़ाखानॖ। अथ ॴस्य ॳड्य वनान ह्यडरुन हस्पताल तॖ ॳड्य ॴस्य वनान ह्यडवुन हस्पताल। अंग्रेज़व दऺस्य बन्योमुत ओस सु शफाखानॖ। बॊड बारॖ हस्पताल। कऺशीरि मंज़ छच़बल कुन गछ़ान गछ़ान ओस यि हस्पताल वति यिवान। बऺड्य डीड्य ॴस सडकि प्यठ आसान म्यॆ छु याद, डेडि प्यठॖ ओस प्यवान क़रीबन ऒड मीलाह पकुन अदॖ ॴस्य वातान हस्पतालॖकिस गेटस ताम्। अथ ॳडिस मीलस सडकि ॴस्य दॊश्यवय अंदव ज़ीठ्य ज़ीठ्य कुल्य खडा हवादार, शांत वातावर्ण ओस अथ सडकि पकान पकान बासान। अथ हस्पतालस मंज़ ओस ब्यमारन ख़बर अतर प्रछ़नॖ बापथ वख मुकर्रर याने सुबहस चायि मोकॖ, नाशतॖ करनुक समय, दॊहलि बतॖ ख्यनुक याने लंच करनुक समय,  शामॖच च़ोरि बजि हॖन्ज़ चाय तॖ पतॖ गऺयो शामुक ख्यन याने डिन्नर। ब्यमारस सॗत्य ओस आसान अख तीमारदार युस द्वह तॖ राथ ॳमिस ओस सीवा करान यिथॖ पऻठ्य डाक्टर वनिहे। सुबहस ओस डाक्टर यिवान मऺरीज़स वुछनि बापथ तॖ ॳमिस डाक्टरस सॗत्य ॴस्य आसान डाकटरन हॖन्ज़ पंगथ सॗत्य, जूनियर डाक्टर, नऺव्य बननवऻल्य डाक्टर, कॆंह डाक्टरी परन वऻल्य लडकॖ/लऺडकी तॖ यि बॊड डाक्टर ओस यिमन हावान तॖ ह्यॆछॖनावान मरीज़ सॖन्ज़ि ब्यमारि मुतलक। यीतिस कालस डाकटर ओस मरीज़न ख़बर अतर प्रॖछ़ान रोज़ान, सोरुय स्टाफ याने नर्स, कम्पौन्डर वगैरा ॴस्य आसान संजीदॖ तॖ स्तर्क। ब्यमारन हॖन्द्य सऻरी तीमारदार ॴस्य यिवान वार्डॖ न्यबर कडनॖ तॖ ब्यमारस अंद्य  पऺक्य जाय यिवान साफ़ सुथरॖ थवनॖ।  तिमन द्वहन ओस यि दऺप्यज़ि ति रामॖ राजा हस्पतालस मंज़ आसान। तीमारदार ओस निवन सतरऺन्ड, मसनन्द, शान्दगॊन्ड, स्टोव, चायि बापथ बोहगुन, नून, मऺदर्ऐर, द्वद वगैरा ह्यथ। बासान ओस ज़ि ज़न छु तीमारदार कुनि पिकनिकस प्यठ आमुत। ब्यमारस यिम खबर अतर प्रछ़नि यिवान ॴस्य तिमन ॴस्य चाय वाय यिवान च्यावनॖ। यि ओस मुनहसर मऺरीज़ सॖन्ज़ि हालऺच़ प्यठ। वारॖ वारॖ ह्यॊतुन बदलाव युन अथ शफाखानस ति। म्यानि ल्वकचारुक हस्पताल छु नॖ कुनि ति सूरतस मंज़ ॳज़्यकिस अस्पतालस सॗत्य वाठ ख्यवान।

कथ छि जऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)