20.09.2020

20.09.2020, ॴशिद(अधिक) (आश्विन/असूज)(अधिक), ज़ूनॖ पछॖ (शुक्ल पक्ष) च़ोरम (चतुर्थी) आथवार (रविवार/ऐतवार), श्री सप्तर्षि सम्वत 5096, राश तुला (चलान), ऋतु हरुद (शरद) (चलान)....त्रय छि रावान

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

      (पराग पुस्तक - 65)

ज़न्म प्रऻविथ कर्म सोवुम

धर्म पोलुम सॊय छम सथ

न्यत्रन अंदर प्रेयम दोरुम

च़ोरुम तॖ मोनुम यिहोय अख

         *********

अर्थात :- जन्म लेकर कर्मों के बंधन में नहीं फंसी मैं, किन्तु स्वधर्म पर अडिग रही।  वही तो परिपूर्ण सहारा है तथा उसी का तो विश्वास है। अपने नेत्रों कौ मैं ने प्रेम से भर दिया और चुन कर केवल प्रेम को ही साधन मान कर चली।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

1. ॳज़ॖयत (Oppression/Torment/Trouble/Suffering/Woe/Distress

2. ॳसीर (Fed up/Prisoner/Captive)

3. ॳश बुख (Flow of tears)

4. ॳश टोर/ॳश टऻर्य (Eyes full of tears)

5. ॳश ददॖराय (Flow of tears/To shed tears/To weep)

              मुहावरॖ

1.मु: अथॖ छ़ॊट तॖ ज़्यव ज़ीठ

   अ: युस वनि स्यठाह तॖ करि 

        कम या अथव सॊत तॖ कथव

        तेज़

2. मु: अथस मंज़ ओंगजि पांछ़

          तिम नॖ हिशय

    अ: द्वन छि नॖ ह्यिवी आदत 

         आसान या कांह छु नॖ 

         कऻन्सि ह्यु आसान

3. मु: अथॖ शलखॖ ख्वतॖ छु कथॖ

         शलख ज़्यादॖ

    अ: बेज़ती छि लायनॖ ख्वतॖ 

         सख़

    (पनॖन्यन शुर्यन ह्यॆछनऻविव)

**************************

पंचान्ग :- मन सपुद ख्वश यॆलि बूज़ ज़ि न्वशि हुन्द दुबारॖ कऺर्यमॖत्युक ट्यस्ट रिपोर्ट ओस नगेट्युव। न्वशि त्रोव व्वश ह्यु तॗ बुथिस ति फ्यूरुस रंग ह्यु। शुर्यव ज़न लॊब क्याहतम ज़्यूत ह्यु। यिम शुर्य आयि पनॖनि माजि अलनॖ तॖ वलनॖ तॗ प्रॖछ़ुख बार बार ज़ि व्वं ह्यकना तिम कूनव मंज़ॖ नीरिथ बॆ-फ्रूक पऻंठ्य फीरिथ। न वुनि छु नॖ इजाज़थ जवाब द्युतनख माजि ति क्याज़ि बॖ ओसुस वुनि दर अज़ाबस मंज़ॖय। हालांकि म्यऻनिस लऺडकस ओस डाक्टरन वॊनुमुत ज़ि दुबारॖ ट्यस्ट करॖनावनुक छु नॖ कांह हाज़थ मगर तऺम्य तॖ न्वशि करनोव इन्द्रापुरमस मंज़ ब्यॆयि ट्यस्ट तॖ नन्योख ज़ि तिम द्वशवय छि नगेट्यु।  न्वशि ओस करनावनुय तॖ तऺम्यसॖन्द्य खानदारन करनोव अमि म्वखॗ ति क्याज़ि यि संस्था ॴस सारिनी लूकन मुफुत ट्यस्ट करान। व्यवस्था ॴस यि ॳकिस गुरुद्वारस मंज़ आमॖच़ करनॖ तिहॖन्ज़ि प्रबंधक कऺमीटी तरफॖ। न तॖ ओस प्यवान डाई सास रॊपियि दिन्य ट्यस्ट करनावनस। हालांकि बोज़ान ॴस्य ज़ि कॆंच़व लैबाट्री वाल्यव छु अपुज़ पॊज़ वऺन्य वऺन्य ग़लत कारोबार शुरु कॊरमुत तॖ पौंसॖ कमावनुक अख ज़रियि बनोवमुत। पॊज़ क्याह तॖ अपुज़ क्याह, दय ज़ानि मगर यि छि हकीकत ज़ि नक़ली व्यनटॶलेटर, नक़ली सैनिटायज़र, नक़ली मास्क आयि यथ महामऻरी हॖन्दिस दौरानस मंज़ बनावनॖ। खऻर, शुर्य ॴस्य व्वं भगवानस मंगान ज़ि म्यॆ ति गॊछ़ रिपोर्ट नगेट्यु आसुन। तमि बापथ प्यव तिमन कॆंह द्वह ब्यॆयि ताब करुन। गरस मंज़ रूदुस बॖय योत ऱवंगॖ मंज़ॖ क्वंगॗ फॊल। त्रॆयि दॊह्य पतॖ गोस बॖति पनुन पान हावनॖ बापथ अस्पताल पनॖनि गाडि मंज़ लऺडकस सॗत्य। ऐक्सरे ति ओस म्यॆ तुलनोवमुत ति क्याज़ि डाक्टरन ओस वॊनमुत ऐक्सरै तुलनावनॖ बापथ। नवि सरॖ प्यव अख सास रॊपियि जमाह करनावुन डाक्टर सुन्द कनस्लॖटेशन फीस। सास रॊपियि छु अज़कल बासान ज़न हथ रॊपियुन नोठा ह्यु। कति तिम द्वह यॆलि पांछ़ रॊपियि ॴस्य दिवान डाकटरस तॖ ओस सु मऺरीज़स वुछान। पांच़ि पतॖ दऺह, दहि पतॗ पॖन्च़ॖह, पतॖ पऺच़ाह तॖ हथ। हथ गऺये बऺड कथ। मगर पतॖ कपऻर्य तॖ किथॖ पऻठ्य वोत यि फ़ीस सासन ताम वुछान वुछान, यि छि हऻरऻन्यगी हॖन्ज़ कथ। इन्सान छु आसमानॖ प्यवान यि बदलाव वुछिथ। कथ छि जऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)