07.09.2020

07.09.2020, ॴशिद (आश्विन) ॳसूज गटॖ पछॖ (कृष्ण पक्ष) पऻन्च़म (पऺचमी) च़ऺन्दॖरवार (सोमवार), श्री सप्तर्षि सम्वत 5096, राश मेष (चलान) ऋतु वऺहरात (वर्षा/बरसात) (चलान) कांबॖर्य पछ (पितृ पक्ष) (चलान)

**************************

कांबॖर्य पछ पऻन्च़म हुन्द श्राद्ध छु अज़

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ। आय बत्तॖ। वुद्यूग करव तॖ मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

पॊत ज़ूनि वऺथिथ मॊत बोलनोवुम

दग ललनऻवॖम दय सॖन्ज़ि प्रहे

लऺल्य लऺल्य करान लाल वुज़ॖनोवुम

मीलिथ तस श्रूच़्योम देहे

        ************

अर्थात:- मैं प्रात: काल जाग कर मन से नाम स्मरण करने लगी तथा प्रभु के प्यार की खातिर पीडा सह ली। मैं लल हूं, मैं लल हूं, ऐसा कहते प्रियतम को जगाया और तब उन से मिल कर (लीन होकर) मेरा सारा देह अर्थात अस्तित्व शुद्ध तथा पवित्र हो गया

**************************

रंगन हॖन्द्य नाव कऻशिर्य ज़बऻन्य मंज़ छि - वान्गॖन्य या जामुन (बैंगनी) (Violet), गूड न्यूल (गहरा नीला)  (Indigo), न्यूल (नीला) (Blue), सबॖज़ (हरा) (Green), लॆदुर (पीला) (Yellow), स़ंगतऺरी (संतरी) (Orange), व्वज़ुल (लाल) (Red)

यिम सथ रंग छि आसान राम राम बऺद्रनि दूनि याने इन्द्र धनुषस मंज़। यिमन सतन नावन छु छ़ॊट याने संक्षपित शब्द अंग्रीज़स मंज़ यिवान वनॖनॖ "VIBGYOR"...अमि अलावॖ ब्यॆयि कॆंच़न रंगन हॖन्द्य नाव कऻशिर्य ज़बऻन्य मंज़ छि - तोतॖ (रानी) (Magenta), गुलऻब्य (गुलाबी) (Pink), क्रुहुन (काला) (Black), सफ़ेद (सफ़ेद) (White), गगॖर्य (आसमानी) (Grey), मॆरून (बूरा-लाल) (Maroon)...पनॖन्यन शुर्यन ह्यॆछनऻविव

**************************

पंचान्ग:- द्वह द्वह गव नेरान, ॳस्य त्र्यनवय बऻज़ ति ह्यॆतिन सॆहतियाब सपदॖन्य वारॖ वारॖ। चूंकि बॖ ओसुस आई सी यू-अस मंज़ॖय, अत्युक खर्चॖ छु पज़नॖ प्यॆठी आसन तॖ ओसुस भगवानस मंगान ज़ि जलदॖय गॊछ़ म्यॆ अति म्वकजार म्यॆलुन। इन्शोरन्स वाल्यन हॖन्ज़ मनज़ूरी यीतिस कालस मंज़ यिहे, म्यानि न्वशि ॴस्य क़रीबन च़ोर साड च़ोर लछ रॊपियि जमाह करिमत्य। द्यमऻगी तनाव रूद सख़, मोसूम शुर्य ज़ॖ गरस मंज़ कुनी ज़ऺन्य, ॳस्य पानॖ अस्पतालस मंज़ त्र्यन जायन त्रॆ ब्यमार। ख़बर अतर रूज़ चलान फोनस प्यठॖय। यपऻर्य आयि ख़बर ज़ि म्यऻनिस दॊयमिस न्यॆचविस युस गुडगांव ओस पनुन अयाल याने पानॖ, आश्यन तॖ मोसूम कोरि ज़ ह्यथ बिहिथ, तिमन ति आव यि कोरोनावयरस वलनॖ। तिमन सारिनी बऻच़न द्राव ट्यस्ट रिपोर्ट पोज़िट्यु, मगर दयन बचऻव्य अस्पतालॖ बऺर्ती गछ़नॖ निशि। तिम रूद्य गरस मंज़ॖ ब्यॊन ब्यॊन कमरन मंज़, दवा रूदुख चलवुन, ख्यनस च्यनस वरतोवुख पूरॖ पूरॖ ए्हतियात। दूरि दूरी वोत अख ॳकिस हाल चाल प्रॖछ़ान। विडम्बना वुछ्य म्यॆ ज़ि शुर्य कऺट्य ब्रोंह कनि ॴसिथ ति रूज़ व्यछ़य तॖ ह्यॆक्य नॖ अख ॳकिस तीमारदऻरी कऺरिथ। यॆमि महामऻरी होव व्यॊख्तॖय मनज़र। त्राहि त्राहि छि सऻरी करान। बॖ यथ ब्यडस प्यठ आई सी यू-अस मंज़ ओसुस, म्यॆ दऺछनि तरफॖ ॴस अख मऺर्यदियादम ब्यमार ज़नान य्यॊस, बोज़नस तल आम ज़ि  वारियाह कालॖ प्यठॖ ॴस।ॴसमॗच़ आई सी यू-अस मंज़ॖय। ॳमिस ब्यमारस ओस दोहय कुस ताम मर्द तॖ ज़नान आई सी यू-किस दरवाज़स ताम यिथ दजि गऺन्डिथ क्याह ताम चीज़ नऺर्सिहॖन्द्य अथॖ पिलनावान तॖ नमस्कार कऺरिथ नेरान। यि ब्यमार वुछुम यि पिलनोवमुत चीज़ मुच़ॖरावान तॖ अमि मंज़ॖ ॴस अख पनॖदाव कड़ान हऺटिस गन्डॖनॖ बापथ ब्यॆयि अख ल्वकुट स्टीलुव डब्बॖ मुच़रऻविथ अमि मंज़ॖ ट्योक कऺडिथ पानस ड्यकस लागान तॖ सॗत्य सॗत्य शायद कांह मंथॗर परान। यि वुछिथ बास्यव म्यॆ ज़ि इन्सानस पज़ि नॖ दय तॖ दय सॖन्ज़ दय गऺच़ मऺशरावॖन्य कुनि वि़ज़ि ति तॖ कुनि जायि ति। यि कथ मनस मंज़ थऺविथ रूदुस बॖति ब्यैडस प्यठ बिहतॖय हनुमान चालीसा परनि तॖ ब्यॆयि ति कॆंह मंत्र रूदुस परान मनस मंजॖय तॖ बास्यॊम ज़ि तऺम्यसॖन्ज़ मेह्रर छि अपरम्पार। रुत कांछन वाल्यन तॖ ईश्वर सॖन्ज़ ॴशिर्वादॖ सॗत्य आस बॖ गरॖ नॊव ज़न्म ह्यथ न्वशि न्यचिविस सान। कथ छि जऻरी

*************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"  

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)