19.09.2020

19.09.2020, ॴशिद(अधिक) (आश्विन/असूज)(अधिक) ज़ूनॖ पछॖ (शुक्ल पक्ष) द्वय(देवादेव)(द्विती) बटॖवार (शनिवार/ शनिश्चरवार), श्री सप्तर्षि सम्वत 5096, राश तुला (दुहचि 2.41 बछि प्यठॖ), ऋतु हरुद (शरद) (चलान)...अधिक मास चलान

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            लल वाक्

         (पराग पुस्तक-64)

ग्वरस प्रॖछ़ोम सासि लटे

यस नॖ कॆंह वनान तस क्या नाव

प्रॖछ़ान च़्रछ़ान थऺचिस तॖ लूसॖस

कॆंहनस निशे क्याहताम द्राव

          **********

अर्थात:- ललेश्वरी ने अनाम अवस्था के बारे में अपने गुरु से प्रश्न किया कि हे प्रभु! जिसका नाम ही नहीं उसका कुछ नाम तो कहिए। कहती है कि ऐसा पूछते पूछते वह थक गई किन्तु उन के गुरु मौन ही रहे। अंत में तब उन (गुरु) की ख़ामोशी से ही उस "कुछ नहीं" (अनाम पद) को मैं समझ गई।

भाव यह है कि अनाम पद को समझा जा सकता है न कि समझाया जा सकता है।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दऺपित

1. ॳडिज (Bone)

2. ॳड/ ऒड (Half/One of two equal parts of some thing)

3. ॳर्य अछर (Vowels)

4. ॳर (Good/Healthy/In good order)

5. ॳज़्य ॳज़्य (Very recently)

              मुहावरॖ 

1. मु: अथॖ दितम तॖ ब्रोंठॖ यितम

    अ: नीकी छॆ नॖ ज़ांह ति ज़ायि

          गछ़ान

2. मु: अथॖ दारुन गव पान कुनुन

    अ: मंग मंग करनॖ सॗत्य छु 

         यज़थ वसान

3. मु: अथवास गव मॊहरि सास

    अ: इतिफ़ाकस मंज़ छु ताक़त

      (शुर्य पनॖन्य ह्यॆछनऻव्यूख)

**************************

पंचान्ग :- द्वह गऺयि नेरान। द्वयि द्वह पतय ओस म्यॏनिस न्यॆचविस डाक्टरस पान हावुन, म्यॆति ओसुख पांच़न दॊहन हुन्द म्याद थोवॖमुत ब्यॆयि पनुन पान डाक्टरस हावनॖ बापथ। पांच़ि द्वह पतय गऺयि दॊशवय याने बॖ तॖ य्योन न्यॆचुव अस्पताल तॖ बऺर्य ज़ॖ सास रॊपियि कनसलटेशन फ़ीस, ॶख सास ॳकिस मरीज़स, तॖ वऻर्य यिनॖ पतय होव डाकटरस ग्वडॖ म्यऻन्य न्यॆचिव तॖ पतॖ म्यॆ। म्यऻनिस न्यॆचविस वॊन डाक्टरन प्रॖछ़ॖगऻर करनॖ पतॖ ज़ि तऺमिस छु नॖ ब्यॆयि ट्यस्ट करनावनुक ज़रुरथ, अल्बतॗ दवा द्युत डाक्टरन ख्यनॖ बापथ ब्यॆयि पांच़न दोहन खऺतरॖ। म्यॆति प्रॖछ़ डाक्टरन ख़बर अतर तॖ वुछुन स्टैटस्कोपॖ सॗत्य सीनॖस वीनस, वॖछिन ज़्यव प्यव तॖ गोस तसलाह ज़ि मऺरीज़ छु ठीख ह्यवान सपदुन। म्यॆति द्युतुन दऺहन दॊहन सॊम्ब दवा तॖ दॊपुन म्यॆ दहि द्वह पतॖ ब्यॆयि पान हावुन। अमि द्वह वुछ म्यॆ ज़ि मरीज़स ओस नॖ इजाज़त डाक्टरस नखॖ आमने सामने बेहनस बल्कि कमरस मंज़ यॆतिनस डाकटर पानॖ बिहिथ ओस, तऺथ्य कमरॖकिस दरवाज़स प्यठ ओस अख स्टीलुक स्टूल थवनॖ आमुत तॖ तऺथ्य स्टूलस प्यठ ॴस्य मऺरीज़स बेहनावान तॖ डाक्टर ओस दूरि दूरी हाल चाल प्रॖछ़ान तॖ यलाज वनान। अमि सातन ओस बासान यि पॊतकालुक अख नज़ाराह यॆलि कांह शूद्रॖ ओस ब्रह्मणस निश गछ़ान मॆलनि तॖ अख ॳकिस निशि ॴस्य दूर्यर थऺविथ कथ बाथ करान। हद गऺयि तमि विज़ि यॆलि डाक्टरन वुछ्य म्यऻन ज़्यव ॴठ फ़ुट दूरि प्यठॖ तॖ दॊपुन ओ के। ज़ानि दय यीति दूरि प्यठॖ क्याह आसि म्यानि ज़्यवि मंज़ बोज़नॖ आमुत तस। खऻर, दवाह द्युतुन म्यै दऺहन दोहन प्यठ तॖ दॊपुन दहि द्वह पतॖ ब्यॆयि युन। ॳथ्य अस्पतालस मंज़ॖय छु दवा-वान ति यॆमिस निश दवा ह्यॊत म्यऻन्य लऺडकन पनॖनि तॖ म्यऻनि बापथ। यीतिस कालस यि लऺडकॖ खडा ओस वानस निश, म्यॆ करेयो मन ज़ि बॖ चमहऻ काफी कपहऻना टी स्टालस प्यठ युस ॳथ्य नखयओस अस्पतालस यंज़ॖय मगर रानॖ दरेयम नॖ काफ़ी अतिनस च्यनॖ बापथ ति क्याज़ि रेट वुछिथ त्रऻहर्योस बॖ। युस काफ़ी कप न्यबरॖ छु दऺहन रॊपियन, सुय काफ़ी कप छु अथ अस्पतालकिस कैफ्टेरियाहस मंज़ अख हथ तॖ बाहन रोपियन। दॊयिम कॖसॖम काफ़ी ॴस अख हथ तॖ ज़ॖ रॊपियि तॖ त्रॆयिम कॖसॖम पांच़ॖनमथ रॊपियन। म्यॆ रॊट मन अंदरी, प्रार्योस यीतिस कालस लऺडकन दवा ऒन तॖ द्रायि गरॖ कुन काफ़ी च्यनॖ रॊस्तुय। अस्पतालस मंज़ ख्यनॖ सामानस यीच़ थऺज़ रेट, त्राहि त्राहि।, यि रेट गऺयि म्यॆ नज़रि हवऻयी अडस प्यठ तॖ हवऻयी जहाज़स मंज़। तोबॖ कॊरुम मनॖ अंदरीय तॖ सूंचुम ग़रीब इन्सान मरि मरनॖ ब्रोंठॖय युथ बाज़र वुछिथ ति क्याज़ि यिम छि त्रावान इन्सानस बुछिथ वुछान वुछान। कथ छि जऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)