13.09.2020

13.09.2020, ॴशिद (आश्विन/ॳसूज) गटॖ पछॖ (कृष्ण पक्ष) काह (एकादशी) आथवार रविवार ऐतवार) श्री सप्तर्षि सम्वत 5096,राश कर्कट (दुहचि 10.35 बजि प्यठॖ) ऋतु वऺहरात (वर्षा/ बरसात) (चलान), कांबॖर्य पछ (पितृ पक्ष) (चलान)

**************************

कांबॖर्य पछॖ (पितृ पक्ष) कऻश हुन्द श्राद्ध यी अज़)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

             लल वाक्

           (पराग पुस्तक-58)

कंद्यव करख कंदि कंदि

कंद्यव करख कंदि व्यलास

भूगॖय मीठ्य दितिथ यथ कंदे

अथ कंदि रोज़ि नॖ सूर ना तॖ सास

          ************

अर्थात :- हे मनुष्य! यद्यपि तू अपने शरीर के बारे मॆं ही सोच कर इसको पुष्ट करके इसे सुन्दर वेशभूषा पहनाए गा अथवा विलास करेगा तथा मीठे भोग खिलाए गा फिर भी इस शरीर का अंत ही होगा और इस की कहीं राख या भस्म भी शेष न रहेगा

**************************

केंच़न कॆम्यन, क्रॗलन हॖन्द्य नाव कऻशिर्य ज़बऻन्य मंज़ छि -

च़र (Bug), मॊह (Mosquito), मऺछ (Fly), ज़लुर (Spider), तुलॖर (Bee), रैय (Ant), बुमसिन (Earthworm), काग़ज़-क्यॊम (Silverfish), पनपौंपुर (Butterfly), स्यय (Aphid/Plant lice), ज़्वव (Lice), खॊडॗक्यॊम (Rice larvea moth), ॴट्य क्रॗल (Flour beetles), त्वमुलॖ क्रॗल (Rice weevil), दरॖज़ (Cabbage worm), दऺरकॖ Leeches), मुहुर (Caterpillar), हालव (Locust)......पनॖन्य शुर्य ह्यॆछॖनऻव्यूख

**************************

पंचान्ग :- त्रॊवुह अगस्त आव ज़न ति म्यॆ नोव गाश आव। अज़ नेरॖ बॖ यॆमि शफाखानॖ मज़ॖ यि दऺप्यज़ि ति महामऻरी हॖन्दि कऻदखानॖ मंज़। कोविट-19 नाव बूज़िथॖय छि तॗर फटान। कपऻर्य यिवान, कऺमिस रटान, कॗतिस कालस प्यठ यिवान, कऻन्सि तॊर नॖ वुन्यख ताम फिकिरी। म्यानि न्वशि ओसुख वॊनॖमुत ज़ि पांच़ि द्वह पतॖ युन दुबारॖ ट्यस्ट करनावॖनॖ बापथ। तमि कॊर म्यॆ फ़ोन ज़ि स्व तॖ तऺम्यसुन्द खानदार यिन गऻड्य ह्यथ म्यॆ निनॖ बापथ। सॗती ज़ोन तमि मुनऻसिब ज़ि तऺमिस छु यिनॖ युनुय तॖ पनुन दुबारॖ ट्यस्ट ति करनावि तॖ लठ यी बचथ। डाक्टर ॴव विज़िट करनि तॖ सॗत्य ॴसिस ब्यॆयि ज़ॖ त्रॆ डाक्टर। वुछुख रिपोर्ट वारॖ पऻठ्य, कॆंह सवालॖ ति प्रॖछ़िख तॖ पानॖवुन्य डाक्टरव मशवरॖ कऺरिथ वॊनुख रिस्यपशनस प्यठ बिहिथ नर्सि म्यऻन फाईल तयार करॖन्य ताकि बॖ ह्यकॖ अज़ गरॖ गऺछ़िथ। शुक्रियाह कॊरुम ॳमिस डाकटरस तॖ मनॖ मंज़्य ओसुस स्यठाह ख्वश। फाईल तयार करनस, बिल बनावनस, डिस्चार्ज सऺर्टिफिकेट बनावनस, इन्शोरैन्स वाल्यन सॗत्य हिसाब किताब करनस लोग अस्पताल वाल्यव पूरॖ द्वह। म्यऻनिस सॗत्य वऻलिस मऺरीज़स ओसुख कालॖ ब्यॆयि कॊविट ट्यस्ट कॊरमुत तॖ सु ओस प्रारान रिपोर्ट्स ति क्याज़ि तऺमिस ति ओस डाक्टरन छुटी दिच़मॖच़ अज़। परारुन प्यव प्येठ्य ह्यु। यपऻर्य आयि म्योन न्वश तॖ न्यॆचुव यिमव ओस बऺन्य किनी म्यानि बिलि हुन्द हिसाब किताब कॊरमुत तॖ सॗती करनोवुन पानस दुबारॖ ट्यस्ट। बिल वुछिथ प्योस। बॖ आसमानॖ ज़न ति क्याज़ि बिल ॴस म्यऻन्य बनेमॖच़ च़ोर लछ कुनत्रॖह सास पांच़ हथ तॖ त्रॖह।

न्वशि म्यानि ॴस म्यॆ वनॖनॖ रॊस्तुय अस्पतालॖवाल्यन हॖन्दिस वनॖ वनॖस प्यठ साढ च़ोर लछ वुन्युखताम जमाह कऺर्यमॖत्य। खऻर ॴखरस मंज़ वोनुख ज़ि ॶसि प्यॆयि करीबन पाच़सतथ सास पनॖनि चंदॖ द्युन। इन्शोरैंनसुक मंज़ूरशुदा पौंस रऺटिथ दोपुख ज़ि बकाया रक़म मॆलि असि वापस।कथ छि जऻरी

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)