23.06.2019

23.06.2019 हारॖ (आषाढा) गटॖ पछॖ (कृष्ण पक्ष) शॆयम (षष्ठी) आथवार (एतवार रविवार) श्री सप्तार्षि सम्वत 5095, राश कुम्भ (चलान), ऋतु ग्रीष्म (चलान)...द्रठॖपऻन्च़ुक (पंचक) (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: च़ठिथ ह्यन्दॖवन्दॖ तॖ
         पृछ़िथ सौदा
    अ: सोदा गछ़ि वुछिथ तॖ
         चुकऻविथ करुन
2. मु: छ़ावल्या प्वलावॖ हा
       दॊपनस म्यानिनॖय नाटन
    अ: ब्यॆयि सॗन्दिस ख़ूनस
         मश्कॖ करनि
3.मु:च़िथ्थॖर हय द्वशि वऺरियस
       पोशि
   अ: च़िथ्थरस मंज़ छु रूद
        सज़वुन आसान
4. मु: च़ॖ तॖ बॖ  तॖ लॖतॖ बब
    अ: स्यठाह कम त्येदादॖ
         नफ़री/छ़ॊट अयाल
5. मु: च़ऻन्गिस तल अनि-गॊट
    अ: यॆति कांह चीज़ मॊह्या
         आसि तति नॖ तम्युक
         फ़ऻयदॖ वातुन
**********************
1. हिबॖ....Gift/Present
2. हिबॖ नामॖ....Deed of
           gift/Gifted deed
3. हिबॖ करुन.To execute
           a deed of gift
4. हु......That/He
5. हपुन....To wait for/
               Anticipate
6. अच़ॊप....Unchewed/
            Not munched/
            Not chewed
7. अछ़ॊल...A simple
           minded/Gentle/
           Straightforward
8. अच़ुन....To enter
9. अस्वन्दर....Ugly
10. अस्तॖ....Measure-
           ment about feet
**********************
     गीता ज्ञान :अध्याय-13
तिक्याज़ि युस सऻर्यसॖय मंज़ डेंशान, दऺरिथ सम भावॖ ब्रह्म वुछान
सु पानय पानस छु नॖ नष्ट करान
वॊन भगवानन गीता ज्ञान
**********************
आल के पी आरगनयज़ेशनज़ महासम्मेलन आव राथ पम्पोश कालोनी, दिल्लि हॖन्दिस शिव मंदरस मंज़ आयोजित करनॖ। नॊव वलॖ वलॖ नॊव जोश नॊव क़दम नऺव वथ नॊव तदबीर आव छ़ान्डनॖच़ कूशिश करनॖ ज़ि किथ पऻठ्य तॖ कम तऺरीकॖ ह्यकव ॳस्य कऻशिर्य बटॖ ब्यॆयि कऺशीरि वऻतिथ तॖ पनॖनि तथ कऺशीरि मंज़ ब्यॆयि तिथय पऻठ्य रिहऻयिश कऺरिथ यिथॖ पऻठ्य अज़ त्रॖह वऺरी ब्रौंठ रूज़िथ ॴस्य। यॆलि तति आतंकवाद्यव च़ऺलॖरऻव्य कुनवुह शथ तॖ नमतस मंज़ कॆंह सऻन्य बऻय ब्यॆनि मऻरिथ छ़ॖनिख तॖ दहशथ फऻलऻवुक तॖ बटॖ च़ऺल्य पनुन पान बचावनॖ बापथ, पनॖन्यन शुर्यन कट्यन हुन्द यज़थ बचावनॖ बापथ तॖ आयि कऺशीरि न्यबर छऺक्करनॖ अख लार तॖ अख दार। अथ सम्मेलनस मंज़ आयि कॆंच़न संस्थायन हन्द्य  व्यच़ार थवनॖ, कॆंच़न हॖन्ज़ राय तदबीर थवनॖ तॖ कॆंच़न हॖन्ज़ॖ शिकवे शिकायतॖ थवनॖ। नतीजि द्राव ज़ि अख क्वाडिनेशन कऺमटी काहन नफ़रन हॖन्ज़ बनावनॖ यिम यिमन सारिनॖय ख़यालन अख रंग रूप दिनॖच्य कूशिश करन तॖ यि मुहिम ब्रौंहकुन पकनावन। श्री रमेश जी ज़ाडू तॖ श्री डी के गॊंजू छि अलम थऺज़ थविथ सम्पूर्ण संगठन संस्थायि हॖन्दिस दामनस थफ कऺरिथ द्रामॖत्य कमर कऺसिथ कॆह हल छ़ान्डॖनि कऺशिर्य बटन हॖन्दि बापथ। वुछव ॳस्य ति कति व्वथि तॖ कति ब्यॆहि।
**********************
"वन्दे लम्बोदरं देवं वन्देsहं गुरुपादुकाम।स्वस्थं साक्षात शिवं वन्दे गुरुदेवं भवार्तिहम्।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)