04.06.2019

04.06.2019 ज़्यॆठॖ (ज्येष्ठ)ज़ूनॖ पछॖ (शुक्ल पक्ष) ऒक्दॊह(देवादेव) (प्रथमा/प्रतिपदा) बॊम्वार (मंगलवार)श्री सप्तार्षि सम्वत 5095, राश मिथुन(दुहचि 11.38 बजि प्यठॖ) ऋतु ग्रीष्म (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: शिशस ति पुशि
    अ: कम आमदनी/ना
         कऻफ़ी आसुन
2. मु: शॆशतॖरस छु शॆशतॖरॖय
         च़टान
    अ: पनॖनिस छु पनुनुय
          ददार वातॖनावान/
          दारस छु पनुनुय प्वन
          फाटॖवान
3. मु: शुर्यन सॗत्य गरॖ करुन
         गव गुर्यन सॗत्य दब
         करॖन्य
    अ: शुर्य रछिन्य छि स्यठाह
         मुश्किल कऻम
4. मु: शुर्य कॆहय छिय मऻच़ॖ-
         क्रॗल त्रॆह हऻनॖ, दॖरकाक
         नि कॆहय छिय ददॖर
         हिश कूर
   अ: ब्यॆयि सुन्द शुर छु मंदल
         व्यॊठ बासान/पनॖन्य
         चीज़ छि नॖ म्वलॖल्य
         बासान
5.मु:श्राकि तॖ माज़स छा वाठ
    अ: अख ॳकिस दुशमन/
         पानॖवुन्य दुशमनुत
**********************
1. यडॖल...One who eats
                a lot/Glutton
2. यख.....Ice/Cold
3. यखलाक...Character/
           Manners/Dis-
           position/Virtues
           Morality
4. यख्तियार....Authority/
        Power/Command
        Control/Choice/
        Option
5. यखॖन्य....Meat dish
         coocked in curds
6. ॴनॖ..... Mirror
7. ॴनॖ खानॖ......Mirror
                          house
8. ॴनॖ पॊट...A piece of
                    glass
9. ॴनॖ दऻर..Glass pane
10. ॴव्युल.... Delicate/
             Tender/Mild/
              Weak/Thin/
              Flexible/Soft
**********************
    गीता ज्ञान :अध्याय-13
प्रथ तरफ़ॖ अथॖ ख्वर रऻछ तॖ कलॖ वोल, प्रथ तरफ़ॖ कन हर तरफ़ॖ म्वखॖ वोल। सऻर्यसॖय सम्सारस छु व्याप्त आसान
वॊन भगवानन गीता ज्ञान
**********************
कऻशिर्य बटॖ छि कऺशीरि हॖन्द्य अथ मंज़ छु नॖ कुनि कॖस्मुक शख। अगर आतंकवाद्यव यिम बटॖ च़ऺलरऻव्य कऺशीरि प्यठॖ अज़ त्रॖह वऺरी ब्रौंठ तम्युक मतलब गव नॖ यि ज़ि ॳस्य मऺश्यरावव स्व जाय य्यॊस सान्यन ज़िठ्यन हॖन्ज़ जाय रूज़मॖच़ छि सासॖ बद्यव वऺरियव प्यठॖ। कऻशुर बटॖ आव अज़ ताम खोच़ान तॖ खोरान, पनुन ज़ुव तॖ जान बचावान, ति क्याज़ि यि कौम छु रूदमुत हर हमेशि अहिंसा परमोधर्मस प्यठ पकान मगर तम्युक मतलब गव नॖ ज़ि कऻशिरिस बटस छु नॖ ज़ुव तॖ जुर्रत मुकाबलॖ करनुक। कऺशीरि हुन्द यितिहास कॊताह गॊन तॖ सॊन रूदमुत छु तथ निश छु ॳज़्युक कऻशुर बटॖ स्यठाह बेख़बर। तम्युक ख़ास वजह छु रूदमुत ज़ि बटसुन्द बहोदरी हुन्द यितिहास छु आमुत विज़ि विज़ि दूर थावनॖ बटस निशि, तल तल आमुत छु यि यितिहास दबावॖनॖ तॖ बटॖ रूद बिचोर वुन्यखताम बेख़बर पनुन पॊतकाल ज़ानॖनॖ निश। अथ राज़स कॊर फ़ाश श्री आशीश कौल सऻबन ऊतरॖ ॳकिस प्रोग्रामस मंज़ गुडगांवहस मंज़ यॆम्य पनॖनि कॆंह किताबॖ लेछमच़ॖ छि तॖ यिमन थदि पायक यजाज़ छि आमॖत्य दिनॖ। कौल सऻबन छि
कऺशीरि मंज़ॖक्य तिम तिम राज़ खूल्यमॖत्य यिम बोज़नॖ तॖ परनॖ सॗत्य छि असि पानस प्यठ अकि तरफॖ पनॖनि ज़ऻच़ प्यठ फखॖर मऺहसूस सपदान तॖ दॊयिमि तरफॖ छु पनॖनिस पानस प्यठ शर्म यिवान ज़ि ॳस्य बन्यॆयि बडॖ कमज़ोर ज़ाथ तॖ खोच़ॖबॖड ज़ाथ ज़ि ॳस्य छिनॖ ह्यकान मुकाबलॖ कऺरिथ ज़ुल्मुक तॖ जहालतुक। दिदा रानी छि असि ब्रौठकनि अख मिसाल य्यॊस ग्वडनिच कऻशिर बटॖ ज़नान रूज़मॖच़ छि यॆमि पनुन यितिहास पानॖ बनोवमुत छु मगर ॳस्य छि तमि निशि बेखबर। ब्यॆयि ति छि वारियाह यिथीय चीज़ यिम सान्यव नज़रव निशि दूर छि रूद्यमॖत्य। कथ छि जऻरी
**********************
"गुरु माता पिता चैव गुरूर् देवो हि बान्धवा:।
गुरोर् देवात् परं नान्यत् तस्मै श्री गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)