08.06.2019

08.06.2019 ज़्यॆठॖ (ज्येष्ठ) ज़ूनॖ पछॖ (शुक्ल पक्ष)शॆयम(देवादेव) षष्ठी बटॖवार (शनिवार/ शनिश्चरवार)श्री सप्तार्षि सम्वत 5095, राश सिंह(शामन 5.21 बजि प्यठॖ), ऋतु ग्रीष्म (चलान)अज़ छि कुमार शॆयम
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: सऺहल चीज़स प्यठ
         जहल
  अ: मोमूली चीज़स या कथि
        प्यठ शरारत खसुन
2. मु: सेरॖ वावॖ ख्वतु छु डेरॖ
         वाव सख़
    अ: ख्यन-च्यन नॖ आसनॖ
         सॗत्य छॆ नॖ तीच़ सख़ती
         गछ़ान यीच़ जाय न
        आसनॖ किन्य गछ़ान छि
3. मु: स्यॆदिस हॊल करि क्या
    अ: युस दिलॖ साफ़ आसि
         तस छु नॖ ब्यॆयि सुन्द
         हजर कॆंह करान
4. मु: स्यॊद सादॖ माहराज़ॖ
    अ: सादॖगी छु पनुन बजर
         स्यॊद सादॖ गव शाह-
         ज़ादॖ
5. मु: स्यॆज़ि ऒंगजि छु नॖ
         ग्यव खसान
    अ: युस चीज़ नॖ स्यॊद
         स्यॊद हऻसिल सपदि
         सु छु कुनि विज़ि हजरॖ
         सॗत्य हऻसिल प्यवान
         करुन
**********************
1. यऻज....A thick cup
               shaped bread
        made of rice floar
2. याजि च़ापनि....To say
          irrelevant things
3. यऻर.....Pine tree
4. यार....A friend
5. यऻरी..Kindness/Help
             Assistance
6.अजऻयब गर... Museum
7. अजदाद... Ancestors/
                   Forefathers
8. अजल...  Angel of
           death/End of
         life/Term of life
9. अजनबी.... Stranger/
        Foreign/Unknown
        Alien/Solitary
10. अजहल....Most
                       ignorant
**********************
     गीता ज्ञान  :अध्याय-13
मायायि दूर तीज़न मंज़ तीज़वान, तत्वॖ ज्ञानॖ सु ब्रह्म प्राप्त सपदान
सारिनॖय हृदयन मंज़ रोज़ान
वॊन भगवानन गीता ज्ञान
**********************मैट्रो-हन मंज़ छि शऻन्ती रोज़ान, वजह छु मोबायल। गरन मंज़ छि शऻन्ती वजह छु मोबायल। बऻच़न दॊन मंज़ पानवॖन्य छि शऻन्ती वजह छु मोबायल। कॊताह बदलाव ऒन ॳम्य मोबायलन। ल्वक्ट्यन ल्वक्ट्यन शुर्यन छु अज़कल अथस मंज़ आसान यि मोबायल। काग़ज़ क़लम रुद लबिताकस। अकि तरफ़ॖ वुछव तॖ फ़ऻयदय फ़ऻयदॖ आव मोबायल सॗतय सऻरिसॖय जहानस मंज़ अथ मंज़ कांह शक़ छु नॖ।मगर सॗती छु नज़रि गछ़ान न्वकसान ति युस मोबायलॖ दऺस्य लूकन वातान छु। टी वीयस प्यठ ॴस्य हावान ज़ि सान्यन शुर्यन छु ॳछन ख़तरॖ पऻदॖ सपदान द्यमागस बद-असर प्यवान  ल्वक्ट्यन बड्यन कमताम गेमॗ गिन्दनॖ सॗत्य यिम मोबायलन प्यठ यिवान छि अनॖनॖ। अमि मोबायलॖ कि इस्तिमालॖ सॗत्य छि वारियाह फऻयदॖ तुलान रोज़ान तॖ यॆमिस शख्सस खुराफऻती द्यमाग आसान छु सु छु अमि मोबायलॖ सॗत्य पनॖन्यन या परद्यन ज़ख ति वातनावान। कऺशीरि प्यठॖ च़लनॖ पतॖ असि कऻशिर्य बटन रूद यि मोबायल वारियाहव रंगव कऻम दिवान। सारिनी छि पताह ज़ि ॳस्य किथ पऻठ्य छि अम्युक फ़ऻयदॖ तुलान तॖ कोताह क्लेश छु व्वतलिथ यिवान सान्यव बद-कलामव सॗत्य। पनॖन्यन शुर्यन प्यठ छि नज़र थवॖन्य ज़रूरी ज़ि तिम किथ पऻठ्य छि अम्युक इस्तिमाल करान तॖ बड्यन पज़ि यहतॖराम सान तॖ समजदऻरी सान पनॖन्य कलामॖ व्हाटसाप दऺस्य अख ॳकिस सोज़नॖच कुशिश करॖन्य तॖ ॳकिस ब्यॆयिस फऻयदॖ वातनावुन न कि पनुन पान मन्दॖछावुन। त्वहि भगवान रॖच़ वथ विज़ि विज़ि हावुन
**********************
"गुरुवे नम: परम गुरुवे नम: परमेष्ठिने गुरुवे नम:
परमाचार्य गुरुवे नम: परमसिद्ध आदि गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)