22.06.2019

22.06.2019 हारॖ (आषाढ) गटॖ पछॖ (कृष्ण पक्ष) पऻन्च़म (पन्चमी) बटॖवार (शनिवार/ शनिश्चरवार)श्री सप्तार्षि सम्वत 5095, राश कुम्भ (सुबहॖचि 7.38 बजि प्यठॖ) ऋतु ग्रीष्म (चलान)..ॳज़्यकि प्यठॖ छु द्रठॖपऻन्च़ुक (पंचक) ति शुरु
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: छ़ॊप गाव गुदऻम्य खाव
    अ: ख़ामोश इन्सान छु वु-
         टॊकुर आसान
2. मु: छ़ॊर अथॖ छु नॖ ॳच़ान 
         ॴसस ति
    अ: लाचऻरी छि इन्सानस
         मारान
3. मु: छ़ॊटि बरॖ व्वटि बोर
    अ: सऺहल वथ छ़ांडॖन्य
4. मु: च़्वन पऻहरन कस दॊद
         च़ोंग
    अ: दौलथ छॆ नॖ पोशॖवॖन्य
5. मु: च़्यथ रछय तॖ वऻलिंज
         तछय
    अ: ज़बऻन्य तसल्लाह द्युन
         तॖ ॳन्दॖर्य ज़ख वातॖ-
         नावुन।
**********************
1. हऻल..Habit/Custom/
             Practice
2. हऻथी..Satisfied/Rich
              Wealthy
3. हऻन्ज़....Boat-man/
            Sailor/Sea-man
4. हऻबथ...Fear/Terror/
            Danger/Scare/
            Dread/Awe
5. हऻबथ गछ़ुन...To be
            frightened/To
            be terrified
6. अच़ॖ रछ़....Dancing
            girl/Prostitute/
            Fairies
7. अज़ताम...Till today
8. अरॖहर...Pigeon/Pea/
            A kind of pulse
9.  अरमान.... Ambition/
            Yearning/Long-
         ing/Wishfulness/
         Desire
10. अरम..... Back-teeth
**********************
     गीता ज्ञान :अध्याय-13
यिमन नाश गछ़न वाल्यन मंज़ ज़ान, अविनऻशी ब्रह्म सम भाव रोज़ान
युस यि ज़ानि सु परमगऺती प्रावान
वॊन भगवानन गीता ज्ञान
**********************
दपान ॳर्य आयि सऻरीय ऒर कुस गव। पानस ॳन्द्य-पऺख्य नज़र त्रऻविथ प्यव म्यॆ यि दॊप बदॖलावुन तॖ म्योन वनुन छु ज़ि ऒर आव नॖ कांह कांह ऒर गव नॖ कांह ज़ांह। बचॖ अख मोसूम वुछुम ट्रेनि मंज़ पानस स्यदॖस्यॊद सीटि प्यठ बिहिथ पनॖनिस मऻलिस माजि सॗत्य असान-गिन्दान। म्यॆ कुन ति प्यॆयस नज़र तॖ कलॖ फ्युर द्युतुन तॖ ब्यूठ ब्यॆयि पनॖनिस पानस सॗत्य गिन्दनि। म्यॆ प्रुछ़ ॳमिस बचस नाव तॖ ॳम्य द्युत कनॖ-डोल। ॳम्यसॖन्द्य मऻल्य होवनम इशारॖ सॗत्य ज़ि यि छु नॖ ह्यकान कथ कऺरिथ। म्यॆ लऺज्य पानस दॖनन हिश। बचॖ बास्योम पांछ़ शु वुहुर तॖ मगर कथ नॖ करुन गव मतलब यि बचॖ छु ज़ामुत कॊल। कथ कथ करान नन्यव म्यॆ ज़ि यि बचॖ ओस ॴठॖ नवॖ वुहुर मगर ॳम्यसुन्द जिस्म ओस क्रॆट्योमुत यूत ज़ि बासान ओस ति ज़न पांच़ॖ शु वुहुर। यिति नन्योम ज़ि यि बचॖ ओस नॖ कॊल ति बऺल्कि मंज़्य मंज़्य ओस वनान पापा, मम्मी मगर बडॖ मुश्किलॖ सानॖय। यि वुछिथ वोनुम पानस सॗत्य ज़ि सोन दॊप यानि मुहावरॖ छु ग़लत अल्बतॖ मुहावरॖ गछ़ि आसुन कांह कांह आव नॖ ऒर तॖ ऒर गव नॖ कांह ति ज़ांह। यि बचॖ छु व्वंय हावुन डाक्टरस ति वॊन ॳमिस बचॖ सॖन्द्य मऻल्य म्यॆ। पतॖ सूंच म्यॆ वाकॖयी कति छि ॳर्य यिवान सऻरी। कांह छु आसान कॊल, कांह छु ज़्यवान ज़ॊर, कांह ऒन तॖ कांह कोन। कांह नॖ पऺकिथ ह्यकान तॖ कांह नॖ वॊथिथ ह्यकान। दय गछ़ि रऻछ करुन प्रथ ॳकिस। मगर मन छु दुखी गछ़ान यॆलि कुनि कुनि सातॖ नज़रि यिवान छि खॊठज़द इन्सान यिम ज़न्मॖ प्यठय यिथिस हालतस मंज़ यिवान छि। ज़िन्दॖ छि तिम ति रोज़ान मगर ॳन्दॖर्य ॳन्दॖर्य आसन सासॖ बऺद्य अरमान कूरिथ थऺविथ ॳकिस ब्यॆयिस सॗत्य व्वथान-बिहान, असान-गिन्दान अड्ल्यॊक पान ह्यथॖय। दय सॖन्ज़ि दयिगऺच़ कर नमस्कार। ज़िन्दगी हॖन्दिस सफ़रस मंज़ वुछान छि कम कम चमत्कार।
**********************
"मन्नाथ: श्री जगन्नाथो मद्गोरु:
श्री जगद्गुरु:। मदात्मा सर्वभूतात्मा तस्मै श्री गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)