13.06.2019

13.06.2019 ज़्यॆठॖ (ज्येष्ठ) ज़ूनॖ पछॖ (शुक्ल पक्ष) काह(देवादेव)(एकादशी)
ब्रसवार (वीरवार/ब्रहस्पतवार)श्री सप्तार्षि सम्वत 5095, राश तुला (चलान)ऋतु ग्रीष्म (चलान)...अज़ छि निर्जला एकादशी ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: सिरस सरपोश
    अ: राज़ पर्दस तल थवुन
2. मु : सिरस गव फाश कथि
          द्राव वाश
  अ: कुनि मसलुक हल कांह
       राज़ नॊन न्यॆरनॖ सॗत्य
       गछ़ुन
3. मु: सिरॖ सान पीरॖ माहराज़ॖ
         आव
    अ: ॴलिम तॖ कऻमिल
       इन्सान छि नॖ हाव बावस
       प्यठ यकीन करान
4. मु: श्रन्डन हॖन्ज़ लडऻय
         च़्रन्डन हॖन्ज़ शाहमत
  अ: द्वन ज़न्यन हॖन्ज़ि लडाय
       मंज़ छु बे-कॊसूर लतॖ-
       म्वंजि गछ़ान
5. मु: सऺर्य प्यॆठ्य सऻलाब
    अ: बे-अन्दाज़ॖ ज़्यादती
**********************
1. हार.....Failure/Neck-
               lace/Garland
2. हार मानॖन्य..To accept
                      defeat
3. हारॖ फॊल...A bead of
                  a necklace
4. हारॖ......Money
5. हारॖ वोल.... Wealthy
6. अदॖ कुस...Who else
7. अदॖ कति..Where else
8. अदॖ कूत..How much
9. अदा करुन...To pay/
           Repay/Execute/
           Perform
10. अदब..... Literature/
           Decorum/Civili-
           ty/Respect/
          Politeness/Man-
          ners/ Courtesy
**********************
      गीता ज्ञान  :अध्याय-13
यथ जिसमस मंज़ आत्मॖहय छु परमात्मा, वुछन तॖ रछन वोल भरता
ब्रह्मा विकन हुन्द स्वामी महीश्वर ज़ान
वॊन भगवानन गीता ज्ञान
**********************
धर्म गव क्याह? छ़ॊट्यन लफ़ज़न मंज़ मानव तॖ धर्म गव फ़र्ज़ यानि फ़र्ज़ पूरॖ करुन।ऊतरॖ ज़्येठॖ ॴठम द्वह यिम लूख कशीरि  तुलमुल गऻमॖत्य ॴस्य तिम ॴस्य माजि रऻज्ञन्या हुन्द दर्शुन करनि गऻमॖत्य, तुलमुलि नागस प्रक्रमॖ दिनि गऻमॖत्य, नागस मंज़ व्यनॖपोश छावनि तॖ द्वदॖ डुल भावॖनि गऻमॖत्य। कन्द तॖ नाब्द माजि रऻज्ञन्यायि ख्यावॖनि गऻमॖत्य। यि ओस धर्म यिवान निभावनॖ यानि फ़र्ज़ यिवान पूरॖ करनॖ। मगर अथ धर्मस मंज़ अधर्मॖच कऻम करनॖ सॗत्य गऺयि सऻरॖय मॆहनत क्वलि तिमन भक्तन यिमव द्वद कन्द तॖ पोश नागस मंज़ भावान भावान द्वदॖक्य खऻल्य लिफ़ाफॖ ति तुलमुलि नागस मंज़ त्रऻव्य तॖ नाग अपवित्र कॊर। लूख आयि अज़ताम नागुक रंग तॖ रूप वुछान ज़ि नाबॖद्य रंग छा आमुत, द्वदॖ रंग छा आमुत किनॖ गुलाब पोश आसनॖ म्वखॖ गुलाब रंग छु आमुत। सु रंग नागुक वुछिथ आयि भक्त यि सौंचान ज़ि रऻज्ञन्या कऻच़ाह ख्वश छि गऻमॖच़ तॖ तम्यसॖन्ज़ि लीलायि सॖत्य किथॖ पऻठ्य आव अज़ताम नागुक रंग बदलान रोज़ान। यॆलि कऻशिर्य बटन 1990-तस मंज़ कऺशीरि प्यठॖ च़लुन प्यव दपान तुलमुलि नागुक रंग ओस क्रुहुन गोमुत या येलि कऺशीरि सऻलाब आव तॆलि ति दपान ओस नागुक रंग बदल्यॊमुत माने मऻज्य रऻज्ञन्या आयि इशारॖ दिवान पनॖन्यव रंगव दऺस्य मगर ॳस्य नादान तॖ अज्ञान रूद्य यिमन चीज़न निशि अनज़ान। खऻल्य द्वदॖ लिफ़ाफॖ या ब्यॆयि ति कॆंह लटरम-शटरम नागस मंज़ त्रावनॖ सॗत्य वातनोव तिमव भक्तव पनॖनिस धर्मस ज़बर्दस्त ज़ख यानि पनुन फ़र्ज़ तॊगुख नॖ पूरॖ करुन।तिमन कति करि मऻज्य दीवी माफ़। येमिस नॖ पनुन धर्म तगि साफ़ थवुन, सु क्याह रऻछ करि पनॖनिस समाजस तॖ पनॖनिस पानस। यॆमिस नॖ पनुन फ़र्ज़ तगि पूरॖ निभावुन सु क्याह संस्कार दी पनॖनिस शुरिस कऺटिस। तिमन पज़ि तोबॖ करुन तॖ माजि शर्ण गछ़ुन तॖ पनॖनि ग़लती बापथ मऻफ़ी मंगॖन्य। मऻज्य दीवी रूज़्यनव सहायतस हर हमेशॖ। ह्यॆछिव पनुन फ़र्ज़ किथॖ पऻठ्य छु पूरॖ करुन सुय गव पनुन धर्म पालुन। स्वच्छ भारत थवुन छु ज़ॆहनस मंज़ थऺविथ पनॖन्यन संस्कारन रऻछ करॖन्य।
**********************
"शलोकत्रयं पठेत्प्रात: गुरुपादाम्बुजं स्मरन्।
त्रिवर्ग फलभागत्र मृतौ मोक्षपदं व्रजेत्।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
  भूषण कौल 'दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)