06.06.2019

06.06.2019, ज़्यॆठॖ (ज्येष्ठ)ज़ूनॖ पछॖ (शुक्ल पक्ष) त्रय (देवादेव) (तृतीय) ब्रसवार (वीरवार/ब्रहस्पतवार),श्री सप्तार्षि सम्वत 5095, राश कर्कट (दुहचि 2.50 बजि प्यठॖ), ऋतु ग्रीष्म (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: शुर कति शुर कति
         माजि नखस प्यठ
   अ: चीज़ नखॖ ॴसिथ ओरॖ
         योर छ़ऻन्ड दिन्य
2. मु: शुप्य कानि वछस ज़री
         नऻल्य
    अ: युस नॖ यथ लायक़
         आसि सु ति छ़ारान
3. मु: शालॖ ह्यन्ग च़रि द्वद तॖ
         मऺह्य ॳडिज
    अ: नामुम्किन तॖ नायाब
          चीज़
4. मु: शाला बॊड कुस?
        दॊपनख यॆलि युस आव
    अ: यसॖय बऺड जाया अथि
        आयि तऺस्य वॊनुख बॊड
5. मु: शालस लॊट ज़्यूठ
         पानस वुरुन वलुन
    अ: प्रथ कऻन्सि छु पनुन
         पनुन चीज़ पनॖनि
         आसऻयशि बापथ तॖ
         ब्यॆयिस क्याह
**********************
1. यिथ कऺन्य....Like this/
                       This way
2. यिथऻय..... Little/Very
            little/The least
3. यिथय.....Free/With-
                   out cost
4. यिथय प्यॊन...To get
                         free
5. यत्रुन....To bear/To
                endure
6. अपऻर्य...To that side
7. अथॖ पंजॖ...Gloves/
           Covering of lea-
           ther/wool for
           hands
8. अथवास...Handshake
9. अथ वथ...Plan/Hit on
          a plan/A design/
          Way out
10. अथॖ......Hand
**********************
      गीता ज्ञान :अध्याय-13
सारिनॖय ज़ीवन न्यॆबरॖ ॳन्दरॖ परिपूरनॖ, सूक्षम आसनॖ ज़ानॖनस तल नॖ यिवन
छु नऺज़दीक सोरुय दूर बासान
वॊन भगवानन गीता ज्ञान
**********************
राथ ओस गोपी नाथ जी आश्रमॖ हवन। यि हवन चल्यव प्रथ तथ आश्रमस मंज़ यॆति यॆति गोपी नाथ जी मूर्ती स्थापना आमॖच़ छि करनॖ माने वैशाली, उत्तम नगरॖ, पम्पोश कालोनी, ज्यॆमि, पूने, वगैरा वगैरा जायन। गरमॖ क्रायि मंज़ ॴस्य लूख नऺवीद करनि वऻत्यमॖत्य प्रथ जायि। म्यॆ यॊत ताम ज़्वन छु कऺशीरि मंज़ ओस यि आश्रम ॳक्यसॖय जायि सु गव क्रालॖ खॊडॖ तॖ लूकन ॴस नॖ अमि आश्रमच ब्वयी। मगर यनॖ बटॖ च़ऺलिथ आयि कुनवुह शथ तॖ नमतस मंज़ कऺशीरि प्यठॖ जाय जाय आयि आश्रम बनावनॖ तॖ गोपी नाथ जीयिन मूर्ति स्थापना करनॖ। ॳथ्य देखा देखी मंज़ आयि बनावनॖ आश्रम बाकयन कॆंच़न सत-प्वरुशन हन्दि ति मसलन क्रालॖ बब, मस्तॖ बब, नन्दॖ बब, पोशॖ बब तॖ बेतरी तॖ सॗत्य सॗत्य मीज्य जाय कुनि कुनि जायि साईं बाबाहस ति। यि करान करान छु म्यॆ बासान ज़ि ॳस्य ज़न दूरेयि राम जीयस निशि, कृष्णॖ जीयस निशि या शंकर जीयस निशॖ।सान्यन शुर्यन छु नॖ गीता जी कुन कांह वथ हावनस, महिम्नापारस कुन ज़्वन पावनस, पंचस्तवी कुन या भवऻनी सहस्रनामस कुन पकनावन वोल। वखतॖ अकि आसॖ यिम किताबॖ सान्यन ज़िठ्यन ज़्यॆवि प्यॆतिस प्यठ याद।रामायण, भगवद् गीता वगैरा वगैरा। मगर अज़कल छु म्यॆ बासान यिम किताब ह्यच़न रोज़नि लबि ताकस।
कोर कुन छि ॳस्य पकान तॖ सऻन्य शुर्य कोरकुन वातन कति प्यठॖ तॖ कऺमिस भगवानस दिन वऺन्य वति वति, दय ज़ानि।
**********************
"यो गुरु स शिव: प्रोक्तो य: शिव: स गुरु स्मृत:।
उभयोरन्तरं नास्ति गुरोsपि शिवस्य च।।"
पऺरिव यि मंत्र ति
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)