02.05.2019

02.05.2019, वह्यक (वैशाख) गटॖ पछॖ (कृष्ण पक्ष), त्रुवाह (त्रयोदशी) ब्रसवार (वीरवार/ब्रहस्पतवार)श्री सप्तार्षि सम्वत 5095, राश मीन (चलान)ऋतु बसन्त (चलान), द्रठपऻन्च़ुक (पंचक) (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: गर गुन्डॖ
    अ: पनॖनिस गरस मंज़
         बऺडीमी हावॖन्य अमा-
         पॊज़ न्यॆबॖरॖ नॖ कथ ति
         फोरॖन्य
2. मु: गर गव च़कॖ नाव दकॖ
         दी दी पकॖनाव
    अ: गरॖ चलावुन छि ज़ीठ
         तॖ मुश्किल कऻम
3. मु: गरि ति हाख परि ति
         हाख नाहकय ज़ुवॖ
         गरी द्राख
    अ: यॆलि नॖ ब्यॆयिसॖन्दिस
         गरस मंज़ खऻतिर वाति
4. मु: गरा द्युतमय हऻविथ
         लरा ब्यूठुख त्रऻविथ
    अ: यॆलि कऻन्सि सॗत्य ज़ान
         पहचान गछ़ि तॖ पतॖ
         तुल्यस नॖ थफॖय
5.मु:गरस गरॖ छा वाठ दिवान
   अ: गुज़ारॖवोल गरॖ छु नॖ
        ग़रीब गरस फ़ऻयदॖ
        वातनावान
**********************
1. शमा....Candle/Lamp
2. शुमार...Count/Esti-
         mation/Enumera
         tion/Account
3. शुमारॖ....Issue of
          periodical/
          Number
4. शमादान.... Candle
          holder/Lamp
          stand
5. शमस.....Sun
6. शमुन....To concen-
           trate/To subdue
           To restrain
7. शिनाख़त... Recogni-
           tion/Identify/
           Identification
8. शुमुर....Miser
9. शूब.....Grace/Loveli
          ness/Decoration
          Splendour/Ele-
          gance
10. शौकीन....Fond of/
            Eagre for/Lust-
            ful
**********************
      गीता ज्ञान :अध्याय-12
       अर्ज़न दीव वनान
युस भक्त च़्यॆ साकार रूपॖ बजान,
दॊयिम निराकार रूपॖ सुमरान
यिमन मंज़ कुस च़्यॆ यूगवान बासान
वॊन भगवानन गीता ज्ञान
**********************
मरहब्बा छु तऺमिस पंडित सऻबस यॆम कमर कॊस तॖ पनुन न्यॆचुव ह्यथ वोत कऺशीरि  तॖ खुलोवुन दुकान पनुन दपान कुनत्रॖह्य वॖहिर थख दिथ। दपान ॳम्य पंडित सऻबन मा छि कुवहशथ तॖ नमतस मंज़ पनॖनिस सीनस प्यठ गोलि ख्यॆमच़ॖ मगर बचोमुत छु। दस्तार-बंदी आयस करनॖ ततिक्यव रोज़न वाल्यव मुस्लमानव दऺस्य। ॳम्यसॗन्दिस साहबज़ादस आयि दस्तारबंदी करनॖ। ख्वश ॴस्य बासान मऻल्य पॊथॖर। वुछव हय तॖ कऺशीर्य बनि कति। मगर कॖमन हालातन मंज़ आयि च़ऺलिथ अज़ त्रॖह वऺरी ब्रौंठ यि छि ॳमिस पंडित जियस ति ख़बर ति क्याज़ि ॳम्य छु तिमन ज़ख्मन सीनॖ दोरमुत। क्याह छु ॳमिस पंडित जीयस बासान ज़ि तति रोज़न वाल्यन हॖन्ज़ नियथ तॖ नज़र छा बदल्यॆमॖच़। तिहॖन्द्यन ख़यालन छा कॆंह बदलाव आमुत। तिहॖन्दिस व्यवॖहारस छा फ़रॖख आमॖच़। यि पंडित सऻब छु अज़ ति मॊहताज तिमनॖय यिमन निशॖ यि च़ऺलिथ आव अज़ त्रॖह वऺरी ब्रौंठ। वखॖत करि फऻसलॖ ज़ि ॳमिस पंडित सऻबुन कऺशीरि गछ़नुक तॖ तति कारोबार सम्बालनुक फऻसलॖ कोताह रुत रोज़ि। क्याह यि पंडित सऻब बन्या कऺशीरि गछ़नुक वतॖ हावुक बाकयन बटन बापथ किनॖ यि क़दम मा ज़ॆठरावि वथॖय। वुछान रोज़व ॳस्य ति कति वॊथि तॖ कति ब्यॆहि।
**********************
"आधीनाम् अगदं दिव्यं व्याधीनां मूल कृन्तनम्,
उपद्रवाणां दलनं महादेवं उपास्महे।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
    भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)