04.05.2019

04.05.2019 वह्यक (वैशाख) गटॖ पछॖ (कृष्ण पक्ष) मावस (अमावस्या) बटॖवार (शनिवार/ शनिश्चरवार),श्री सप्तार्षि सम्वत 5095, राश मेष (चलान), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: गरि नॖ बर तॖ पॆंजि
         काठकर
    अ: बे-शोज़-बोज़/यस
         शख्सस नॖ पानस सॊंब
         ति गुज़ारॖ आसि तस
         कथ प्यठ छु फ़यऻज़ी
         हावनि नेरुन
2. मु: ग्रटॖ कडुन तॖ परिनि
         छानुन
    अ: सख़ मॆहनत करॖन्य
3. मु: गुर्य छु वॊनुमुत खसवॖ-
         निस खारथ वसवॖनिस
         वालतम
    अ: युस सऺहल छु बासान
      सुय छु मुश्किल आसान/
       वुतॖरायि वसुन छु मुश्-
       किल आसान
4. मु: गुरिस सवऻर्य तॖ बछेरस
         अतॖ गथ
    अ: यस नॖ पज़ि तस छि
         ख़दमत प्यवान करॖन्य
5. मु: ग्रॗस्य कार गव जिनॖ
         कार
    अ: ज़मीन कमावनस छि
         स्यठाह मॆहनत लगान
**********************
1. बुडिबब....Grand
                    father
2. नान्य...Grand mother
3. मोल....Father
4. मऻज्य....Mother
5. बॊड बोय...Elder
                    brother
6. ल्वकुट बोय...Younger
                      brother
7. ब्यॆनि......Sister
8. सारिवी ज़्युठ बोय...
              Eldest brother
9. सारिवी कून्स बॊय....
        Youngest brother
10. सारिवी कॗन्स ब्यॆनि...
          Youngest sister
**********************
     गीता ज्ञान :अध्याय-12
युस प्वरुष यऺन्द्रयन वश छु करान, म्यॆ सर्वॖ व्यापक निराकार ज़ानान
म्यॆ परम ब्रह्मस प्रेमॖ बावॖ बजान
वॊन भगवानन गीता ज्ञान
**********************
समय छु बलवान। समय छु बदलान रोज़ान। समयस सॗत्य सॗत्य इन्सान ति बदलान। ॳस्य सौंचान ज़ि असी ज़्यून समय मगर हक़ीकतस मंज़ ज़ेनानॖय ज़ेनान। ॳस्य क्याह सूंचिथ आयि ज़न्मस, ॳस्य क्याह रूद्य करान, असि हऻसिल आव क्याह, असि गाटॖ कोताह गव, क्याह ह्यथ गऺयि सऻन्य तिम पनॖन्य, क्याह ह्यथ असि गछ़ुन छु। यी सौंचान स्वरान कडान ॳस्य ज़िन्दगी। मगर यि वुछिथ तॖ डींशिथ ति छि तोति हलम दऻरिथ मंगान रोज़ान सुबॖ प्यठॖ सुबहस ताम। मावा सऻब वोत कऺशीरि तॖ दपान लॊग तति कारॖबार करनि, नाथू सऻब छु यॆति प्यठॖ वीलॖज़ार करान ज़ि मावा सऻबन कॊर नाथू सऻबनिस जायदादस कब्ज़ॖ। मावा सऻबन दपान ख्यॆमच़ॖ कर ताम आतंकवाद्यव दऺस्य कऺच़ताम गोलि ति मगर तोति छॆ नॖ ग्रेन कऻन्सि। मुसलमान ख्वश तति दपान लॊग न तॖ जॊग आव पॊत फीरिथ। कऺरहऻस दस्तार बंदी पानस तॖ न्यॆचविस ति। यपऻर्य छि कॆंह मावा सऻबनिस यथ तुल्यमॖतिस क़दमस प्यठ वखनय करान जान ति तॖ नाकारॖ ति। कऺमिस क्याह कऻच़ाह फ़रख छि प्यवान वख्त करि फ़ऻसलॖ।मगर तऻजुब छु यि ज़ि यथ जायि मावा सऻबस ज़िन्दगी मीज्य नविसरॖ कॆंह गोलि ख्यथ ति सुय मावा सऻब किथॖ पऻठ्य छु मॊह मायायि लोर ज़ि ब्यॆयि गव तऺथ्य जायि पनॖनि ज़िन्दगी हॖन्द्य बकाया द्वह कडनि। आफ़रीन छु मावा सऻबस। यॆमि लॆम्बि मंज़ द्राव अथन फ्वख दिवान तऺथ्य लॆम्बि मंज़ च़ाव पम्पोश छ़ारॖनि। वख्तुक तकाज़ तॖ ब्यॆयि नॖ कॆंह
**********************
"नमो  धर्मनिधानाय नम: स्वकृतसाक्षिणे, नम: प्रत्यक्ष देवाय श्री भास्कराय नमो नम: ।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com. ति वुछिव)