01.06.2019

01.06.2019 ज़्यॆठॖ (ज्येष्ठ)गटॖ पछॖ (कृष्ण पक्ष)त्रुवाह(देवादेव) (त्रयोदशी) बटॖवार (शनिवार/ शनिश्चरवार),श्री सप्तार्षि सम्वत 5095, राश मेष (चलान) ऋतु ग्रीष्म (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: श्यॆर्यकातॖच ल्यॆज छि
         ख्यॆमॖच़ होन्यव
    अ: शिर्यकऺतिस मंज़ छि
         सऻरी ग़ऻर-ज़िमदऻरी
         हावान
2. मु: शॆ तॖ त्रॆ नव तॖ काह
    अ: कुनि पऻठ्य बराबऺरी
         अनॖन्य/टाल मटोल
         करुन
3. मु: शीनॖ शर्त
    अ: न रोज़वुन शर्त
4. मु: शंकरॖन्य मकॖज़ न
         फालन तॖ न गालन
    अ: ॳक्यसॖय कथि प्यठ
         डऺटिथ रोज़ुन
5. मु: शियस सॗत्य शी मियस
         सॗत्य मी
    अ:ज़ुव बचावनॖ खऻतरॖ प्रथ
         कऻन्सि सॗत्य पानियार
         लागुन
**********************
1. यछ़ पछ़..Belief/Hope
           Trust/Support/
           Reliance/Confi-
        dence/Assurance
2. यीच़....Much more/
            Abundant/Plen
            tiful
3. यच़काल....For a long
                    time
4. यसलॖ....Innumerable
          Countless/Often
          Fully
5. यहसास कमतऺरी...Infe-
          riority complex
6. ॴस छऺलिथ कथ करॖन्य
          To be careful in
          speaking
7. ॴसस आब युन...To
          have earnest
        desire for a thing/
      Watering of mouth
8. ॴसस मज़ॖ तॖ यऺड दज़ॖ
     दज़ॖ..... Something
     tasty to eat but very
     bad for stomach
9. ॴसॖ बब नेरॖन्य...To
           lose income/To
           lose benefit
10. ॴसॖ बॊड...One who
           eats a lot/One
           who talks more/
           Talkative
**********************
     गीता ज्ञान :अध्याय-13
म्यॆ ईश्वरस भक्ति यूगॖ स्वरिथ
तनहा पवॆत्र जायि रूज़िथ
विशय बूगी मनुश दूर रोज़ान
वॊन भगवानन गीता ज्ञान
**********************
क्वदर्यतन छु यि इन्सान बनोवमुत अख अजब नमूना। ज़्यनॖ प्यठॖ मरनस ताम ॳमिस इन्सानस कऻत्याह छि ज़िन्दगी हॖन्दिस सफरस मंज़ मेलान यिम ॳमिस इन्सानस बनान ॳड्य यार दोस्त ॴश्यनाव रॖश्यनाव तॖ कॆंह दुशमन। तऻजिब छु ज़ि ॳमिसॖय इन्सान सॖन्दिस ॳछन तल छि ॳम्यसॖन्द्य यिम यार दोस्त अंग ॴश्यनाव या दुशमन ॳछ वटान तॖ वातान दोयिमिस दुनियाहस मंज़ मगर यि इन्सान कॊताह बेबस छु ज़ि यि छु नॖ ह्यकान किहीं कऺरिथ। अथ ज़िन्दगी हॖन्दिस सफ़रस मंज़ नऺव्य समखान प्रऻन्य प्रानान, ॳड्य याद रोज़ान ॳड्य मशान तॖ यि इन्सान छु पनुन सफ़र तय करान रोज़ान। क्वदर्यतन छि ॳमिस इन्सानस अंदर भाव कॆंह दितिमॖत्य यिम पऻन्य पानय प्रकट सपदान छि ॳछव किन्य या वुठव किन्य मोकॖच नज़ाकत वुछिथ। ॳश्य समंदर छु ॳमिस इन्सानस सऺन्द्यन ॳछन मंज़ यि कति छु यिवान, क्याज़ि छु यिवान, कॊताह छु यिवान या असन भण्डार छु ॳमिस इन्सानस अंदर यि कथ कूनस मंज़ छु रूज़िथ पतहॗय छॆ नॖ मगर वख्तॖ विज़ि कति प्यठॖ छु यि असुन वुठव किन्य नेरान इन्सान छु हऻरान। हऻरान छु इन्सान क्वदर्यतच्यन यिमन कारनामन प्यठ नज़र यॆलि प्यवान छि। इन्सानस ॳन्द्य पऺख्य यि कॆंछ़ा अमलान छु अथ पऺत्यकिन्य कऺम्यसुन्द ताक़त छु यि छु अख राज़ म्यॆ बासान।
**********************
"स्वतन्त्राय दया क्लृप्त विग्रहाय परमात्मने।
परतन्त्राय भक्तानाम् भव्यानां
भव्यरूपिने।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

31.05.2019

31.05.2019 ज़्यॆठॖ (ज्येष्ठ) गटॖ पछॖ (कृष्ण पक्ष) बाह(देवादेव) (द्वादशी) शॊकुरवार (शुक्रवार/जुम्मा) श्री सप्तार्षि सम्वत 5095, राश मेष (चलान) ऋतु ग्रीष्म (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: शॆयव पीरव ख्वतॖ छु
         बॆ-पीरॖय जान
    अ: दऺहन पीर माननॖ बदलॖ
       छु बॆ-पीर आसनुय जान
2. मु: शॆठ गव तॖ ब्रेठ गव
    अ: बऺडिथ छि अकॖल
         डलान
3. मु: शेठॖ वुहुर काव तॖ शीतॖ
         वुहुर काव-पूत
    अ: बेवकूफ़ मोल तॖ दाना
         न्यॆचुव/अकलि निश छॆ
         नॖ वऻन्स कांह कॗमथ
         थवान
4. मु: शेतान सॖन्द्य कन ज़ऺर्य
    अ: शेतान छु नॖ कऻन्सि
         हुन्द बोज़ान
 5.मु: शेठॖ वऺरिश ब्यॆनि छय
         ॴठॖ वुहरिस बऻयिस
         वापस आमॖच़
    अ: हरगाह कऻन्सि ज़नानि
         वऻर्यविस मंज़ गडबड
         गछ़ि/ॴखरस छि
         मालिन्यन प्यठ प्यवान
         कऻन्सि ति ज़नानि छि
         माल्यनिच पछ़ रोज़ान
**********************
1.यज़ाह द्युन..To Trouble
               someone/To
             harm/To hurt/
             To annoy
2. यज़ाज़...Degree/Title
             Honour/Award
3. यच़कऻल्य....After a
                       long time
4. यछ़..Wish/Appetite/
           Will/View/Inten-
           tion
5. यछ़ुन.....To desire/To
           wish/To want/
           To propose
6. ॴद्य....A while ago/
            Some time be-
            fore
7. ॴडरुन....Kneeding
8. ॴरच़र....Request/
            Petition/Asking
            for something
         with heart-beating
         Broken hearted
9. ॴरख...Mixture/Dis-
         tilled/Sweat/
         Perspiration
10. ॳज़्य....Only today
**********************
      गीता ज्ञान  :अध्याय-13
त्रॖय पॊथॖर गरॖ ब्यॆयि दौलत धन, अथ मॊह ममतायि मंज़
नॖ फसन
टोठ तॖ अटोठ प्रावुन यकसान
वॊन भगवानन गीता ज्ञान
**********************
वख छु पकान पनॖनि गति। ॳसीय छि नॖ रोज़ान कुनि। राथ सपुद पृथ्यवी नाथ कौल "सऻयल" सऻबस वऺरी पूरॖ स्वर्गस गऻमतिस। पतहॗय छु नॖ लगान यि वख नेरान किथॖ पऻठ्य छु। म्यॆ मा माय मश्यम किताब वुछिम यथ मंज़ वारियाह शऻयरन हॖन्द्य बऻथ आमॖत्य छि सॊम्बरनॖ तॖ यि किताब छि आमॖच़ छापनॖ सऻयिल सऻब्यनि अर्धान्गनी वीणा जीहॖन्दि स्मृनि मंज़। व्वंय न रूद सऻयिल सऻब तॖ न रूज़ वीणा जी, रोज़ पथकुन किताबॖ तॖ किताबन मंज़ शऻयर सॖन्द्य ख़याल। यिथय पऻठ्य मेजि म्यॆ नामावार तॖ कदावार शऻयर स्व पंडित दीना नाथ नादिम सऻबॖनि ज़ॖ किताबॖ यिम नऻदिम सऻबॖन्य फर्ज़न्दन श्री अहिंसा कौल सऻबन तॖ तऺम्यसॖन्ज़ि अर्धान्गनि श्रीमती विजय जी म्यॆ ताम वातनावि।बॖ छुस त्युहुन्द स्यठा मश्कूर। यिमन द्वन किताबन मंज़ छि आमॖत्य लेखनॖ नऻदिम सऻबॖन्य नज़म, ऒपेरा, अफ़सानॖ वगैरा वगैरा। नऻदिम सऻबुन ज़िकिर कॊरुम अमि म्वखॖ ज़ि यिहन्द्यव थद्यव शऻयरन हॖन्ज़ि किताबॖ आयि छापनॖ तिहॖन्दि मरनॖ पतॖ। द्वनवय ॴस्य पानॖवुन्य गुरु श्यॆश्य। नऻदिम सऻबनॖय ओस द्युतमुत पृथ्यवी नाथ कौल सऻबस सऻयिल लकब। अज़ छि नॖ दॊनवय तिम असि मंज़ मगर तिहन्ज़ सारि वऻन्सि कऺरमॖच़ क़लम कऻरी रोज़ि असि सॗत्य ता उम्र याद। सोन नमन यिमन दॊनवनी हऺस्तियन। शत् शत् प्रणाम म्योन नऻदिम सऻबस तॖ सऻयल सऻबस
**********************
"नमस्ते नाथ भगवन शिवाय गरुरूपिणे। विध्यावतारसंसिद्ध्यै स्वीकृतानेकविग्रह:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
  नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

30.05.2019

 30.05.2019 ज़्यॆठॖ (ज्येष्ठ) गटॖ पछॖ (कृष्ण पक्ष) काह(देवादेव) (एकादशी),ब्रसवार (वीरवार/ ब्रहस्पतवार)श्री सप्तार्षि सम्वत 5095, राश मेष (रऻच़ हॖन्ज़ॖ 11.3 बजि प्यठॖ), ऋतु ग्रीष्म (चलान) द्रठॖपऻन्च़ुक (पंचक) म्वकलि अज़
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1.मु:ॴबो ॴय्यो बलाय मंद
       छि पतॖ छय खजालथ
    अ: अख ॴब छु वारिया-
        हन ॴबन ज़न्म दिवान
        तॖ ब्यॆयि ख़जॖल करना-
        वान
2. मु: अरज़ि ॳज़ीम ख्वतॖ छु
         ख्वलकि ॳज़ीम बॊड
    अ: रुत वर्ताव छु सारिवी
         ख्वतॖ थॊद
3. मु: सराफ़ गंज़रावान द्यार
         तॖ अतराफ़ रावरावान
         द्वह
    अ: वख फ़ॊज़ूल ज़ायि
          करुन
4. मु: सॆहति बदन तॖ रऺहति
         जान
    अ:अख ॴही/सॆहतॖ ख्वतॖ
         बॊड आराम छु नॖ कांह
5. मु: साहब छु बख्शनहार
    अ: दय छु बख्शनवोल
**********************
1. यकुत करुन....To unite
2. यकुत.....Unity/One-
               ness/Unison/
               Sameness
3. यकजा..... Together/
               In one place
4. यकजहती....Unity/
               Unanimity/
              Accord/Agree-
              ment
5. यकबार....One time/
              Once/At once/
         All together/With
     one supreme effort
6. ॳंज़.....Goose
7. ॳन्ज़िनि गर्दन...Long
           neck/Thin neck/
           Beautiful neck
8. ॳन्ज़य मऺन्ज़य गछ़ुन..To
           become aware
           of/To know
9. ॴखॖर....At the end/
                  Ultimade
10. ॴखरी....Last/Ex-
          treme/Ultimate
**********************
     गीता ज्ञान अध्याय-13
यिम ति परॖलूकॖक्य बूग त्यागान, ज़्यनॖ मरनॖक्य बुजरॖक्य द्वख दऻद्य स्वरान
यिमन दूशन प्यठ व्यच़ार करान
वॊन भगवानन गीता ज्ञान
**********************
जे के विचार मंच संस्था छि प्रथ वऺरियि अख कल्चरल प्रोग्राम करान आमॖत्य यथ नाव छु गाशॖतारुक। यथ प्रोग्रामस मंज़ छि बच्चॖ श्यॆयि वुह्यरि प्यठॖ वुह वुह्यरिस ताम हिसॖ निवान। शुर्यन गछ़ि तगुन ग्यवुन, नच़ुन या कांह संगीत वाद्य बजावुन।यॆमिस शुरिस यिमव मंज़ॖ कांह ति ग्वन आसि सु छु ह्यकान अथ प्रोग्रामस मंज़ शिरकत कऺरिथ तॖ पनुन हुन्नर हऻविथ। यिमन शुर्यन हॖन्ज़ कऻबिलियत वुछनॖ बापत छि यिवान तजरुबॖकार व्वसताद यिम च़ारान छि सारिवॖय ख्वतॖ जान हुन्नर हावन वोल शुर तॖ ॳमिस शुरिस छु यिवान नाव दिनॖ गाशॖतारुक। यॆमि लटि छि अमि प्रोग्रामॖच शुरुआत दॊयिमि जूनॖ प्यठॖ। अमि द्वह यी शुर्यन आडिशन ह्यनॖ, यिम अति आडिशन पास करन, तिमन छु हऻज़िर सपदुन शुरऻहमि जून सॆमि-फाईनल बापथ तॖ यिम तति पास गछ़न, तिम ह्यकन फाईनलस मंज़ शिरकत कऺरिथ मुकाबलॖ ज़ीनिथ तॖ गाशॖतारकॖच पदवी प्रऻविथ। मोबाईलस प्यठ छि वारियाहान ग्रुपन मंज़ जे के विचार मन्चॖ तरफॖ शुर्यन फार्म बरनॖ बापथ इतिलाह करनॖ तॖ पनुन हुन्नर हावनॖ बापथ मुकाबलस मंज़ हिसॖ निनॖ बानथ निमंत्रन यिवान दिनॖ।
कऺरिव तॊह्य ति हर्कत तॖ सूज़्यूख पनॖन्य शुर्य यिथिस प्रोग्रामस मंज़ हिसॖ निनॖ बापथ तॖ पनुन पान परज़ॖनावनॖ बापथ।
**********************
"सर्व श्रुति शिरो रत्न विराजित पदाम्बुज:।
वेदान्ताम्बुज सूर्यो य:
तस्मै श्री गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

29.05.2019

29.05.2019, ज़्यॆठॖ (ज्येष्ठ/ गटॖ पछॖ (कृष्ण पक्ष) दऺहम(देवादेव), ब्वदवार (बुधवार), श्री सप्तार्षि सम्वत 5095, राश मीन (चलान),ऋतु ग्रीष्म (चलान), द्रठॖपऻन्च़ुक (पंचक) (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: फरहाद बॖड
    अ: स्व बॖड यस ख्वडॖफॆचि
         आसन
2. मु: ग़रज़मंद दीवानॖ
    अ: ग़रज़मंद छु नॖ पनुन
         हाजथ कडनॖ विज़ि
         अक्लि हॖन्ज़ कथ या
         कऻम करान
3. मु: ग़रज़मंद छु फॊटॖमुत
         ह्वछि क्वलि
    अ: ग़रज़मंद इन्सान छु
         सख़ न्वकसान तुलान
4. मु: तमाह छु तावन
    अ: लालॖच करनॖ सॗत्य छु
         ॴखरस न्वकसान
         गछ़ान
5. मु: अमलन जज़ा तॖ नीति-
          यन मुराद
    अ: यस यिछ़ अमल तॖ
         नियथ आसि त्युथुय
         फल अथि लगान
**********************
1. यकीन....Faith/Truth/
                 Confidence/
          Certainty/Assu-
          rance
2. यकीन आसुन..To have
                          faith
3. यकीन थवुन...To keep
                         faith
4. यकीनन.....In fact/In
             deed/Certainly
             Definitely/
             Positively
5. यकीनी.....Really/Cer-
             tainly/Definite-
             ly/Positively
6. ॳन्द्रिम....Inner relat-
             ing to the por-
             tion inside
7. ॳन्दॖर्य गऺल्य गल्य गछ़ुन..
             To be shy/To
             be ashamed
8. ॳन्दरीय...From inside
                   Internally
9. ॳन्दरुहमल...One who
             does not mix
             with others/
             Arrogant/Con-
             ceited
10. ॳन्दीय..... Secretly/
             Hidden/Silent-
             ly/Separately
**********************
      गीता ज्ञान :अध्याय-13
श्रद्धायि भख्ति भावॖ गुरू सीवा करान, न्यॆबॖर्य ॳन्दॖर्य शुद्ध अंत:कर्ण आसान
मन शरीर वश थवान यऺन्द्रियव सान
वॊन भगवानन गीता ज्ञान
**********************
सऻन्य शुर्य कऺट्य छि जान पऻठ्य पऺर्यमॖत्य तॖ छ़ान्डान छि तमी त्रायि नौकरी ति। सरकऻर्य नौकरी मेलॖन्य छि मुश्किल पाहन प्राइवेट नौकरीयन पतॖ छि दवान सऻन्य शुर्य। यि ज़ोन म्यॆ उतरॖ आथवारि द्वह यॆमि द्वह गुडगांवस मंज़ ओस कल्पुश फौंडेशनॖ तरफॖ ज्वाब-फियर यानि नौकरी-मेलॖ प्रोग्राम कॊरमुत विश्वकर्म स्किल युनिवर्सिटी अहातस मंज़।सत ॴठ प्राइवेट कम्पनी आसॖ आमॖच़ॖ ईन्टरव्यु ह्यनॖ बापथ।  त्रॆ च़ोर हथ लऺडकॖ तॖ लऺडकी आसॖ आमॖत्य नौकरी छ़ान्डनि बापथ ब्यॊन ब्यॊन जायव प्यठॖ। म्यॆ नन्यव ज़ि तिहॖन्ज़ कऻब्यलियच़ मुतऻबिक आसॖ नौकरी कमॖय पाहन। वुछनस तल छु यिवान ज़ि कऻशुर बटॖ कॊट या बटॖ कूर छि नॖ ईन्जीनियर कम कथॖय करान। बी ट्यक एम ट्यक एम बी ए कम छु नॖ कॖन्ही अज़कल। अकि तरफॖ छु स्यठा जान ज़ि शुर छु पॊरमुत ल्यूखमुत मगर तमि मयारॖच नौकरी मेलॖन छि मुश्किल बासान। तमि म्वखॖ छु सान्यन शुर्यन प्यवान नऺगरॖ नीरिथ पांद्रठन गछ़ुन बतॖकाल छ़ान्डनॖ बापथ। यिहऻय वनन छि गऻमॖच़ सान्यन शुर्यन खान्दरॖ बापथ ति। अख ॳकिस छि नॖ टारि खसान परनॖ रंग्य, तनख्वा रंग्य वगैरा वगैरा। नतीजि छु यि ज़ि वारियाह शुर्य सान्य छि हदॖ ख्वतॖ ज़्यादॖ बेकार तॖ अनॖहॖहर्य ति। करव हय तॖ करव क्याह। असि गछ़ि आसुन अब ति तॖ बब ति।
**********************
"गुरु आदि अनादिश्च गुरु: परम्दैवतम्। गुरो: परतरम् नास्ति तस्मै श्री गुरुवे नम:।।"
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

27.05.2019

27.05.2019, ज़्यॆठॖ (ज्येष्ठ) गटॖ पछॖ (कृष्ण पक्ष) ॴठम (देवादेव) (अष्टमी)च़ऺन्दॖरवार (सोमवार),श्री सप्तार्षि सम्वत
5095, राश कुम्भ (चलान)ऋतु ग्रीष्म (चलान)
द्रठॖपऻन्च़ुक (पंचक) (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: कारि ख्वदा ज़ानि
         ख्वदा
    अ: क्वदर्यतॖक्यन सिरन छु
         नॖ सनॖनुक ज़रूरथ
2. मु: कारि नजार बदस्ति
         गिलॖकार
    अ: यस नॖ यम्युक तजरुबॖ
         आसि तस ती प्यतरुन
3. मु: काकुन हापुत
   अ: यॆलि कांह कऻम अगादि
       गछ़ि तॖ म्वकजार मेलि नॖ
4. मु: काकॖ साल तॖ च़्यॆ क्या
         काकॖ बेगार तॖ म्यॆ क्या
    अ: येलि कांह ख्यनॖ विज़ि
         ब्रौठ तॖ कामि विज़ि
         पथ रोज़ि
5. मु: कालीदास तालि च़्यल
    अ: गाटलिस छि मुसीबत
         प्यवान तुलॖन्य
**********************
1. यकसान..Equal/Same
          Similar/Uniform
          Even
2. यकॖ वटॖ....At a time/
                    Together
3. यकमुश ...At once/
                 At a stretch
4. यकॖ..... Vomiting
5. यगजा.... Together
6. ॳस़ील.....Pedigree/
           High born/
           Noble/Gentle/
           Unmixed
7. अकि अकि....One by
                         one
8. ॳलिश लागॖन्य...To
           disturb/To
         create nuisance/
         To trouble/To
          perplex
9. ॳन्य दांद.....A blind
          bull/Fool/Illite-
          rate
10. ॳन्य लूठ...Do wrong
           to, Oppress/
         Tyrant
**********************
      गीता ज्ञान :अध्याय-13
पांछ़ महाबूत मन, ब्वद तॖ प्रकृती, अख मन ब्यॆयि दऺह यऺन्द्रय छिय
ब्यॆयि पांच़न ज्ञानॖ यन्द्रयन विशय ज़ान
वॊन भगवानन गीता ज्ञान
**********************
मन छु नॖ व्यच़ान कुनि यॆलि कांह संस्था आसि पनॖनिस समाजस निषकाम रूप पऻठ्य सीवा करान। कल्पुश फौंवडेशन संस्था छि यिछ़ॖय अख संस्था गुडगांवस मंज़ यथ प्यठॖ नज़रसऻनी करान छि वीना जी वांचू। ब्यॊन ब्यॊन कामि कऺर्य कऺर्य छि यि संस्था पनॖनिस कऻशिर्य पंडित समाजस विज़ि विज़ि फ़ऻयदॖ आमॖच़ वातनावान वुन्युखताम। राथ ओस अमि संस्थायि ज्वाब फियर मुहिम चलोवमुत। ज्वाब फियर माने कऻशिर्य बटॖ लऺडकन या लऺडकियन नौकरी मेलॖ। अथ मेलस मंज़ छि यि संस्था कॆंच़न कम्पनियन सॗत्य राब्तॖ कऻयिम कऺरिथ बॆरोज़गार लूकन कारोबार दिवॖनावान तिमन लूकन हुन्द इन्टरव्यू ह्यथ तॖ तिहॖन्ज़ कऻब्यलियथ वुछिथ। राथ ओस विश्वकर्मा स्किल युनिवर्सिटी तरफॖ कल्पुश फौंवडेशनन गुडगांवस मंज़ॖय यि प्रोग्राम आयोजित कॊरमुत।अथ प्रोग्रामस मंज़ ॴस्य त्रॆ च़ोर हथ बच्चॖ आमॖत्य ब्यॊन ब्यॊन जायव प्यठॖ यानि ज्यॆमि प्यठॖ, हऺर्याना प्यठॖ, दिल्लि तॖ दिल्लि अंद्य-पख्य रोज़नवऻल्य। पूरॖ दॊहस रूद यि प्रोग्राम चलान। ब्यॊन ब्यॊन कम्पऺनियव प्यठ आमॖत्य ज़िम्मॖदार सदस्यव कॊर आमॖत्य बच्चन हुन्द तिहुन्द चुनाव ज़ि कऺमिस बचस किछ़ कऻब्यलियथ छि तऺमिस तमि रंगय कारोबार आव दिनॖ। सानि समाजिक सऻरी बच्चॖ छि पऺर्यमॖत्य लीख्यमॖत्य जान पऻठ्य। तिम ति छि व्वमेद करान ज़ि तिहिन्दि मनॖ मुवऻफिक गऺछ़ तिमन नौकरी मेलॖन। कूशिश छि जऻरी तॖ संस्थायि छु सोन हथ हथ मुबारक यिछ़न काम्यन अंद वातॖनावनॖ बापथ।
**********************
"श्वेतवस्त्र परीधानं नानाsलंकार भूषितं।
आनन्द मुदितं देवं ध्यायेत्पंकज विष्टरं।।"
 पऺरिव यि मंत्र ति दॊहय
**********************
 कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

26.05.2019

26.05.2019, ज़्यॆठॖ (ज्येष्ठ) गटॖ पछॖ (कृष्ण पक्ष),सतम (सप्तमी) आथवार (एतवार/ रविवार)श्री सप्तार्षि सम्वत 5095, राश कुम्भ (चलान) ऋतु ग्रीष्म (चलान)....द्रठॖपऻन्च़ुक (पंचक)(चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: कऻम गऺयि हून्य दॖरॖ
         कॊरुस तॖ गऺयि
    अ: कऻम छि लॊतान यक
         दम सिरिफ़ गछ़ि शुरु
         करनॖ यिन्य
2. मु: कामि टोठ व्यपान प्रथ
         जायि तॖ माजि टोठ
         माजि निश
   अ: कऻम करन वोल छु प्रथ
        कऻन्सि टोठ गछ़ान
3.मु: कानि बनेयो रून शॊंगुन
        क्युथ बन्योस नॖ कुठ
  अ: यॆलि कांह कऻम मुश्किल
       अंद वाति तोति प्यॆयस
       पुशि/अख मसलॖ हल
        गछ़ान तॖ ब्याख पऻदॖ
4. मु: कऻन्य ॳछ वुज़ि क्या
         नॆन्दॖर
    अ: यथ नॖ यलाज आसि
         तथ मुतलक़ सौंचुन छु
         ग़लत
5. मु: कानि ॳछ स्वर्मॖ तॖ
         लन्जि ज़ंगि पॊजामॖ
    अ: यि नॖ यथ शूबि ती तथ
         करुन छु फ़ज़ूल
**********************
1. यॆम्बॖरज़ल....Narcissus
2. यमराज़.......Lord of
                       Death
3. यमॖ तॗर.......Terror of
                       death
4. यमॖ दॗथ....Messenger
                    of death
5. युन..........To come
6. ॳश्य टोर...Eye full of
                     tears
7. ॳश्य ददराय...Flow of
          tears/To weep/
          To shed tears
8. ॳश्य दार ...Stream of
                      tears
9. ॳश्य गन्ड....Eyes full
                     of tears
10. ॳश्य बुख....Flow of
                         tears
**********************
     गीता ज्ञान :अध्याय-13
रॆश्य वारिहायि प्रकऻर्य यि तॊत वॊनॖमुत, वीदव तॖ ब्यॆयि ब्यॊन ब्यॊन वखनोवमुत।
ब्रह्मॖ सुतरॖ वति कॊरमुत बखान
वॊन भगवानन गीता ज्ञान
**********************
रातॖ प्यठॖ छु व्हाटसापस प्यठ कुसताम म्यॊन बरादरा अख लेखान रोज़ान ज़ि सरकारॖ तरफॖ छि च़्वन बसन हॖन्ज़ व्यवस्था कऺरमॖच़ कऻशिर्य बटन ज़्यॆठॖ ॴठम प्यठ कऺशीरि तुलमुल वातॖनावनॖच। मुफ्त सवऻर्य यॆति प्यठॖ तुलॖमुल ताम तॖ वापसी दिल्लि ताम। कम्लन हुन्द इन्तिज़ाम ति यी करनॖ तॊत वऻतिथ। ख्यन च्यन छु सवार्यन पनुन पनुन करुन।
तरवुन छु करॖनोव, हक़ दिथ छु वनन, कांह मा स तऺरिव अपोर। पतॖ तार बन्यव नॖ, आलुच़ मॖ कऺरिव, व्वद्यम तऺरिव अपोर। मास्टर ज़िन्दॖकौलनि यिम लऻनॖ ज़ॖ प्यॆयम याद। तुलॖमुलि नागस छि आमॖच़ साफ़ सफ़ऻयी करनॖ कॆंह द्वह ब्रौंठॖय। रऻज्ञन्या दीवी छि प्रारान बख्तन तॊत वातनॖ बापथ। तऺतिक अंद्य पऺख्य रोज़न वऻल्य मुसलमान बऻय छि पूरॖ रऻछ कऺरिथ तुलमुल नागस। मुसलमान ज़नानॖ छि खुले आम अंदर इहातस मंज़ ॳच़िथ नागस ब्रौंहकनि प्यथ खऻल्य रत्नदीप तुलान रोज़ान तॖ मुसलमान लऺडकॖ बडॖ श्रद्धायि सान अंदरॖ न्यबर करान रोज़ान। सु वखॖत म्वकल्यव यॆलि तुलमुल इहातस अंदर ॳच़ुन ओस यिवान छ़्यॊट मानॖनॖ। म्ये छु याद प्यवान यॆलि बख्शी गुलाम मॊहम्मदस दिच़्यॊनॖ रॖख्यमनि द्येदि शॆशतर काठगरॖ अंदर तऺमिस अच़नय। बॖ ओसुस समाज सीवा करान समाज सुधार समति तरफ़ॖ तिमन दॊहन तॖ म्यऻन्यन ॳछन ब्रौंहकनि छु सु द्वह याद यिवान। पितो-पितो कऺरिथ अदॖ मोन तमि रॖख्यमनि दीवी कऺह्यताम कऺह्यताम। बस सिरिफ़ बख़शी सऻबॖय यॊत च़ाव तॖ तऺम्यसुन्द कऻफिलॖ रूद्य गेटॖ न्यबर प्रारान योत ताम प्रधान मंत्री बखशी सऻब वापस द्राव। मगर अज़ कल छु हवा गोमुत फीरिथ ति क्याज़ि कऻशिर्य बटॖ छि आमॖत्य कऺशीरि नीरिथ। रऻज्ञन्या दी ॴज्ञन्या वातय बॖ तुलमुल, व्यनॖ पोश छावय तॖ भावय द्वदॖ डुल।
**********************
"श्री गुरुमपरमानन्दम् वन्दाम्यानन्द विग्रहम्।
यस्य सान्निध्यमात्रेण चिदानन्दायते पुमान।।"
 पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

25.05.2019

25.05.2019 वह्यक (वैशाख) गटॖ पछॖ (कृष्ण पक्ष)शॆयम (षष्ठी), बटॖवार (शनिवार/शनिश्चरवार),श्री सप्तार्षि सम्वत 5095, राश कुम्भ(रऻच़ हॖन्ज़ि 11.42 बजि प्यठॖ), ऋतु ग्रीष्म (चलान)...ॳज्यकि प्यठॖ गव द्रठॖपऻन्च़ुक (पंचक) शुरु
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य लफ़ज़ मंज़ तॖ पनॖन्य कथबात
**********************
1.मु: कऻनिस छा बुथिस प्यठ
        कान्यो दपान
   अ: यस यि ॴब आसि तस
         गछ़ि नॖ सु वनुन
2. मु: काव छलहोन सति
        साबॖन्य, कावस क्रॆहन्यर
        च़लिनॖ ज़ांह
   अ: कॖस्मतॖक्य खुर्य तॖ
        आदति बद छु नॖ च़लान
3. मु: काव छु गाटुल तॖ पनॖनि
         तोंति सॗत्य छु ख्यवान
         गॖस
  अ: गाटुल ति छु बाज़े गलती
       करान
4. मु: काव काव कावॖ हथ
     अ: यॆलि वुछान वुछान
          लूख छि समान
5. मु: कावन ह्यॆछॆयो ककवि
         सुन्द पकुन पनुन पकुन
         मॊठुस
    अ: बऺल्य कऻन्सि नकॖल
         करनॖ सॗत्य छि पनॖन्य
         हॆन ति रावान
**********************
1. यनॖ....From the time/
              Since
2. यनॖ प्यठॖ....From the
              time/Since
3. यंगॖ.....Asafaotide
4. यॆन्दॖर.Spinning wheel
5. यंत्र....Machine
6. ऒश...Tears
7. ॳज़्य प्यठॖ...From to-
               day/Onwards
8. ॳज़्यत..Oppression/
             Torment/Woe/
        Suffering/Trouble
9. ॳसीर...Fed up/Cap-
               tive/Prisoner
10.ॳश्य बानॖ.Tear gland
**********************
      गीता ज्ञान  :अध्याय-13
सु क्षेत्र युथ छु ब्यॆयि यॆमि विकारॖ वोल, कमि कारनॖ छु क्षेत्र यऺगॖ प्रबाव वोल
यि सोरुय बोज़ छ़ॊचरॖ सान
वॊन भगवानन गीता ज्ञान
**********************
च़्ववापऻर्य आव राथ जॆशन मनावनॖ लूकन हॖन्द्य दऺस्य मोदी जीनि नावॖ। हालांकि कुनि कुनि कूनस मंज़ दपान आव बाकॖयव पार्टी हॖन्द्यन नावस प्यठ ति खुशी मनावनॖ मगर सु गव बस कॖतॖ कॖताह तॖ ब्यॆयि नॖ कॆंह। दपान अरतऻजी वॖहिर्य पतॖ छु युथ चुनाव ब्यॆयि सपद्यॊमुत यथ मंज़ कुनि अकि पार्टी छु चुनाव यीच़व सीटव सॗत्य ज़्यूनमुत। मरहब्बा छु मोदी जियस यॆम्य पनॖन्यन पांच़न वऺरियन मंज़ पनॖनि राजुक यूत सॊन असर छु त्रॊवमुत यिथ पऻठ्य या तिथॖ पऻठ्य। लूख छि हदॖ ख्वतॖ ज़्यादॖ ख्वश नज़र यिवान। कऻशिर बटॖ ति छि पनॖनि जायि स्यठाह ख्वश नज़र यिवान तॖ तिहॖन्ज़न व्वमेदन बासान च़ाव नवि सरॖ ज़ुव ह्यु यि सूंचिथ ज़ि शायद गछ़न बटॖ समाजचि सार्यॆय मुरादॖ पूरॖ कऺशीरि मुतलक यिम पऺत्यम्यव त्रॖहव वऺरियव प्यठॖ कुल्य लन्जि प्यठ अलन्ज़ छि। कऻशुर बटॖ छु नॖ व्यच़ान कुनि। बासान ज़न बटनॖय हॖन्ज़ हॊकुमथ चलि ॳज़्यकि प्यठॖ। यपऻर्य ह्यॆतिन दॊयिमि तरफॖ बटॖ संस्थायन ब्यॆयि नवि संस्थायि बनॖनि। व्वंय दपान दिल्लि समति सॗत्य सॗत्य बनावव ब्याख संस्था तथ मुक़ाबलॖ यथ मंज़ तिम सऻरी लूख सदस्य बनन यिम दिल्लि अंद्य-पऺख्य रोज़ान छि। कऻम गऺयि शुरु नाम दर्ज करनॖच। हुपऻर्य द्रायि अख संस्था अख क़दम ब्रौंठ तॖ तमि संस्थायि दपान लीछ्य चिठ्य मोदी जियस तॖ पोवहऻस पनॖन्यन लऺग्यमॖत्यन त्रॖहऻव वऺरियव प्यठॖ ज़ख्मन कुन ज़्वन तॖ छि प्रारान तऺहन्दिस जवाबस। संस्था छि संपूर्ण कशमीर। दिल्लि समति छि वुनि ख्वरॖय डऺखरावान तॖ एन सी आर संस्था छि वुनि थनॖ प्यनय।
रामॖ लगय च्यानि लीलाये
**********************
"ज्ञान-शक्ति समारूढं तत्वमालाविभूषितम्।
भुक्तिमुक्तिप्रदातारं तस्मै श्री गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

24.05.2019

24.05.2019 ज़्यॆठॖ (ज्येष्ठ) गटॖ पछॖ (कृष्ण पक्ष) शॆयम (षष्ठी) शॊकुरवार (शुक्रवार/ जुम्मा),श्री सप्तार्षि सम्वत 5095, राश मकर (चलान)ऋतु ग्रीष्म (चलान)...चूंकि शॆयम छि ज़ॖ गछ़ान, ॳज़्युक वॊहरवोद यी पगाह यानि 25 मऺई 2019
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1.मु: काहनऺव्य चाय
   अ: कांह कऻम अंदनस प्यठ
        दस्गीर सऻबनि नावॖ
        नियाज़ करुन
2. मु: कांहन पौंसन ग्वर्दऻल्य
         पाव
    अ: कंह चीज़ द्रॊग प्यॊन
3. मु: काहन काह वतॖ
    अ: यकुत न आसुन
4. मु: काहन गाव रऻवमॖच़
    अ: अकुय बद इन्सान छु
         सारिनी परेशान करान
5. मु: काहन दीगचन सय
         ॳकिस नॖ छ़ॖनान वय
  अ: यॆलि वारिहान वऻदॖ करव
      अमापॊज़ करव नॖ कऻन्सि
      पूरॖ
**********************
1. यिवनुक....First born
2. यॆन्यवोल .....Bride-
            groom's party/
         A marriage party
3. यिनॖवोल वख...Coming
               events/Future
4. यिनतिज़ाम...Arrange-
           ment/Manage-
           ment/Adminis-
           tration/Regula-
           tion
5. यिनतिखाब....Election
           Revenue record
         Selection/Choice
6. अडॖ....Bus stand/A
          stand for vehicl-
          es/Stationary
          position
7. अडिटर...... Editor
8. अडिटोरियल...Editorial
9. ॳड.....Half/One of
          two equal parts
          of something
10. ॳर...Healthy/Good
            In good order
**********************
     गीता ज्ञान  :अध्याय-13
सारिनॖय क्षत्रन मंज़ म्यॆ ज़ीव
आत्मा ज़ान, प्रकृती ति प्वरुश ज़ानुन त्वतॖ सान
म्योन मानुन छि ॳथ्य ज्ञान वनान
वॊन भगवानन गीता ज्ञान
**********************
चुनावुक दबदबॖ ति म्वकल्यव। ज़ेनन वाल्यव ज़्यून तॖ हारन वाल्यव होर। चुनावस मंज़ छि हऻरतअंगेज़ नऺतीजि प्रथ विज़ि आसानॖय आसान मगर यॆमि लटिक्य चुनाव ॴस्य हना ज़्यादय हऻरान करनवऻल्य ति ज़न गव ज़ि लॊकच्यव लॊकच्यव पार्टियव कॊर अथॖवास कांग्रेसस सॗत्य तॖ कुल मिलऻविथ बनेयि यिम ज़ॖतोवुह पार्टी यिमव चुनाव आयोगस दर्खास्त कॊर ज़ि वोट गंज़रावनुक तऺरीकॖ थोड़ा बदलावुन मगर तिहुन्द दर्खास्त आव रद्द करनॖ। खऻर नऺतीजि आयि तॖ कॖस्मतॖक्य दरवाज़ॖ आयि मुच़रावनॖ अड्यन तॖ अड्यन गऺयि बंद। राथ द्वह द्राव ॳथ्य जटॖजोशस मंज़। ॳड्य रूद्य जॆशिन मनावान तॖ ॳड्य रूद्य मातम मनावान। रूद्य पांच़न वऺरियन प्यठ पनॖन्यन पनॖन्यन पार्टियन ब्यॆयि मसरूफ़ शेरनस सम्बालनस मंज़, मज़बूत बनावनस मंज़ तॖ नऺविस चुनावस मंज़ किथ पऻठ्य छु ब्यॆयि इस्तादॖ रोज़ुन तिम वऺसीलॖ छ़ान्डनस मंज़।
तीतिस कालस करन यॆमि चुनावॖक्य ज़ॆननवऻल्य राजा ताजा पतॖ बोज़व कुस स्वन तोलि तॖ कुस रौफ़ तोलि। भारत माता की जय। यपऻर्य तुल कश्मीर समति हॖन्दिस चुनावस मंज़ ज़्यॆननवाल्यव हल्फ नामॖ ज़ि तिम करन समाज सीवा पूर ईमानदऻरी सान। तिहॖन्ज़ व्वथ छ़ान्ठ ति छि वुछिन्य व्वंय द्वन वऺरियन यॊत ताम ब्यॆयि चुनावुक खुमार खसि। ॳड्य रोज़न दिवान बारव तॖ ॳड्य रोज़न यिवान वॊसि। यिथय पऻठ्य रूद पकान सोन ॴयीन येति ति तॖ तति ति।
**********************
"स्थावरं जंगमं व्याप्तं यत्किंचितचराचरम्। ततपदम् दर्शितं येन तस्मै श्री गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
  नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

23.05.2019

23.05.2019 ज़्येठॖ (ज्येष्ठ)गटॖ पछॖ (कृष्ण पक्ष) पऻन्च़म (पन्चमी) ब्रसवार (वीरवार/ब्रहस्पतवार),श्री सप्तार्षि सम्वत 5095, राश मकर (दुहचि 11.43 बजि प्यठॖ), ऋतु ग्रीष्म (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: किजि प्यठ काजवठ
         विंलिजि प्यठ व्वखुल
    अ: तॆलि वनान यॆलि बद-
         इन्तिज़ऻमी आसि
2. मु: काहन मऻल्य प्वथरन
         कुनुय श्रानॖपठ
    अ: यॆलि स्यठाह ग़ुर्बऺच़
          किन्य मुश्किलन
          गुज़ारॖ आसि
3. मु: कायिर नार तॖ पर-द्यार
         यिम द्वशवय छि नॖ
         वॊफ़ादार
   अ: यिनॖ ज़्यादॖ कालस
        पोशि
4. मु: कथ त्रावतम सथ मतॖ
         त्रावतम
    अ: मॊमूली लडायि किन्य
         गछ़ि नॖ इन्सऻनी रिश्तॖ
         ख़तम गछ़ुन
5. मु: कुर कुर करुन पनॖनि
         गरि तॖ ठूल त्रावॖन्य लूकॖ
         गरि
   अ: युस गरि बे मतलब कथ
       करि तॖ लूकॖ गरन फ़ऻयदॖ
        वातनावि
**********************
1. यॊखती..Power/Way/
           Tact/Skill/
            Device/Means
2. योरकुन..To this direc-
                   tion
3. योर.......Here
4. योनि...Sacred thread
           worn by Hindus
5. यॊदवय...Even though
6. ॳछन मथुन.To accept
                 with respect
7. ॳछन हुन्द    :  To be
     गाश आसुन  very dear
8. ॳडिज.....Bone
9. ॳडजि क्रंज़...Skeleton
10. ॳडजि फुटॖरावनि...To
             break bones/
         To beat severely
**********************
      गीता ज्ञान  :अध्याय-13
         श्री भगवान वनान
श्री कृष्ण अर्ज़न दीवस वनान
शरीर छु क्षत्रकि नावॖ ज़ाननॖ यिवान
ज़ानन वऻलिस ‌क्षत्र गऺयि वनान
वॊन भगवानन गीता ज्ञान
**********************
सानि जंत्री मूजूब छु अज़ कऺशीरि मंज़ ज़िष्टा दीवी हवन
युस ज़ीठ्यऻरॖ यी करनॖ। ज़्येठ ब्रसवारॖ आसॖ वख्तॖ अकि बडॖ मशहूर। सथ ब्रसवारॖ यिम ज़्येठॖ रयतॖ प्यठय आसॖ शुरु गछ़ान तॖ हारनिस रयतस मंज़ आसॖ म्वकलान। मेलॖ ओस लगान ज़ीठ्यऻरॖ ब्रसवारि ब्रसवारि। कॆंह लूख ॴस्य पैदल गछ़ान तॖ कॆंह ॴस्य बसन या पनॖन्यन गाड्यन मंज़ गछ़ान। अज़ छु ज़ीठ्यऻर बदल्यॊमुत कति कोर। पहाडॖ कि दामनॖ प्यठॖ छि अज़ गऻड्य ह्यॊर मंदरस ताम क़रीब क़रीब वातान। तऺहर च़रवन ह्यथ ॴस्य गछ़ान। च़ॊट यानि शूशनोर तॖ तऺहर ह्यथ ॴस्य गछ़ान तॖ तति गऻन्टन त्रावान। ज़्यीठ्यऻर नागस प्यठ ॴस्य श्रान करान तॖ ज़िष्टा मातायि हुन्द द्यान करान। ज़ीठ्यऻरॖ छि अज़कल रोज़नॖ बापथ कमरॖ आमॖत्य बनावनॖ, बाग़ आमॖत्य बनावनॖ। व्यवस्था छि ठीख तति। भारत भूषण भट सऻब छु तऺत्य रोज़ान। मंदरॖच नज़र गुज़र छु सु तॖ तऺम्यसॖन्द्य अहलिकार थविथ। मंदरॖच शक्ल सूरथ छि सुदरेमॖच़ मगर लूख छि नॖ कुनी। गछ़ान छि रोज़ान कॆंह कॆंह मगर युस मॊत ओस मतान अज़ त्रॖह वऺरी ब्रौंठ सु छु नॖ व्वंय तॖ न रोज़ॖ तिम ज़्यॆठॖ ब्रसवारॖ कुनि। म्यॆ ति आव मॊकॖ त्रॆयि च़ोरि लटि गछ़नुक हालॖ हालय। मन छु करान ज़ि बेहमॖहऻव यॆती आसन लगऻविथ मगर वार तॖ व्यस्तार छु नॖ। कति यिन तिम द्वह ब्यॆयि फीरिथ। मगर पनॖन्यन शुर्यन छु वनुन ज़रूरी ज़ि ज़ीठ्यऻर कति छु तॖ ज़्येठॖ ब्रसवारॖ क्याह आसॖ।
कऺसिव कमर अज़ छु सऻनिस मुल्कस मंज़ नऺव सरकार बनावनुक द्वह। कऺमिस खुलन कॖसमतॖक दरवाज़ॖ तॖ कऺमिस गछ़न बंद। वुछव अज़।
**********************
"अनेकजन्मसम्प्राप्तम् कर्मबंधविदाहिने।
आत्मज्ञानप्रदानेन तस्मै श्री गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

21.05.2019

21.05.2019, ज़्यॆठॖ (ज्येष्ठ) गटॖ पछॖ (कृष्ण पक्ष) त्रय (तृतीय), बॊम्वार (मंगलवार),श्री सप्तार्षि सम्वत 5095, राश धनु(चलान), ऋतु ग्रीष्म (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: कजि हॖन्ज़ॖ कोरि सथ
    अ: यॆलि कांह ॴब खऺटिथ
         रोज़ि नॖ
2. मु: करॖ दालि हुन्द वर
    अ: सु न्वकुस युस नॖ सऺहल
        पऻठ्य नेरि/हंगॖ तॖ मंगुक
          मलालॖ
3. मु: करनॖ करुन मगर
         वऺद्य वऺद्य
    अ: खुशी सान नॖ कऻम
         करॖन्य/बॆ-दिलॖ कऻम
4. मु: क्रऺयि ख्वतॖ छु इन्साफ
         बॊड
    अ: रसॖम पूरॖ करनॖ ख्वतॖ
         ज़्यादॖ छु इन्साफ़ करुन
         सवाब
5. मु: क्रालस खॊंड बानॖ
   अ:फुटमुत चीज़ छु बनावन
        वऻलिसॖय हिसस यिवान
**********************
1. यॆत्यन...Here
2. यीरुन...To float
3. युहुस...This year
4. येर.....Wool
5. यहसास... Feeling/
              Sense/Percep-
              tion/Sensitive-
              ness
6. ॳछ टिटॖवार... Twinkle
                       of an eye
7. ॳछ टुवॖन्य....To close
                  eyes/To die
8. ॳछ दरॖ लगनि..To look
                          intently
9. ॳछ दोद........Pain in
              eyes/Eye sore
10. ॳछ रावॖन्य...To lose
                      friendship
**********************
     गीता ज्ञान  :अध्याय-12
निन्द्या तॖ तऻरीफ हिविय ज़ानान, पनॖनि गुज़ारॖ संत्वष्ट रोज़ान
मॊह तॖ गर्ज़ॖ रॊस रोज़ान
वॊन भगवानन गीता ज्ञान
**********************
कश्मीर समति दिल्लि य्यॊस कऻशिर्य बटन हॖन्ज़ अख संस्था बनॆमॖच़ छि कुनवुहशथ तॖ त्रुवनज़ाहस मंज़ बटॖ समाज सीवा बापथ आयि वुन्युखताम पनॖन्य कऻम निभावान बॆहतरीन पऻठ्य। अथ संस्थायि मंज़ ह्यॆकिहॆ सुय सदस्य बऺनिथ युस दिल्लि मंज़ रोज़ान आसिहे। अमि संस्थायि हॖन्ज़ व्यवस्था आयि सम्बालनॖ वुन्युखताम वारिहाव लूकव दऺस्य मगर पत्यम्यव पांच़व शॆयव वऺरियव प्यठॖ वोत अति वुछान ज़ि यिहन्द्यन अथन मंज़ अमि समति हॖन्ज़ लाकम रऺटिथ छि तिम छि नॖ यछ़ान ज़ि ब्यॆयि कांह गछ़ि यि लाकम रटॖन्य। हालांकि नियम छु ज़ि दॊयि दॊयि वुहॖर्य गछ़न चुनाव सपदॖन्य मगर सु नियम आव नॖ व्यतरावॖनॖ पत्यम्यव च़्वन पांच़न वऺरियन। नतीजि द्राव तनाव, निन्दा, शक, ल्यकॖ-ल्यख, अदालत, दुशमनी, दोंखॖ-दोंख, अख ॳकिस पानवुन्य ज़ंग कडनॖच छ़्वम्बॖ छ़ान्डनि, ॳदरिम नॖ न्यबर यछ़ान न्यॆरुन तॖ न्यॆबरिम ॳदर यछ़ान अच़ुन अथ जदोजहदस मंज़ ॴखरकार युहुस चुनाव दपान ज़बर्दस्ती। मगर चुनावस मंज़ ति दपान छ़ल तॖ कपट वर्तावनॖ तॖ न्यॆबरिम्यन हॖन्ज़ कूशिश अंदर अच़नॖच गयि असफल। अंदरिम्यव ज़्यून यथ चुनावस मंज़ पज़ि अपुज़ि दपान ब्यॆयि तॖ कडन नवि सरॖ ब्यॆयि वऺरी जोरह। कॆंह न तॖ कॆंह मॊह छु अंदर समति मंज़ यथ तिम लऻर्य छि भगवान ज़ानि असलियत क्याह छि। बहरहाल म्वकलॆययि समति हॖन्द्य चुनाव ऊतरॖ कुनवुहमि मऺई ज़ं सास कुनवुह द्वह। हऻरऻनी हॖन्ज़ कथ छि ज़ि युस प्रेज़िडेंट ओस ग्वडॖ सु वोलुख बऺन्यमिस पऻविस प्यठ तॖ युस बऺन्यमिस पऻविस प्यठ ओस  सु बनोवुख समति हुन्द सदॖर। सांठ गांठ छि नज़र यिवान टाकारॖ मगर ख्वश छि तिम बटॖ बऻय यिमन अमि समति मंज़ॖ कॆंह लारान आसि। न्यॆबरिम रूद्य वछान ज़ि यि ॳन्दरिम तमाशि क्याह छु तॖ किथ पऻठ्य छु यि सऺर्कस चलान। यि ज़ाल च़टनुक व्वपाय क्याह छु बीठ्य ब्यॆयि अकि फिरि छ़ान्डनि। हालस ख्यॆयि हून्य बस्त खलर।
**********************
"ज्ञानिनां ज्ञानरूपाय प्रकाशाय प्रकाशिनाम्।
विवेकिनां विवेकाय विमर्शाय विवर्शिनाम।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

20.05.2019

20.05.2019, ज़्यॆठॖ (ज्येष्ठ) गटॖ पछॖ (कृष्ण पक्ष) द्वय (द्विती), च़ऺन्दॖरवार (सोमवार), श्री सप्तार्षि सम्वत 5095, राश धनु (रऻच़ हॖन्ज़ॖ 2.28 बजि प्यठॖ), ऋतु ग्रीष्म (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: कलस ति रज़ नलस
         ति रज़
    अ: यॆलि इन्सान मुकमल
         पऻठ्य आसि ह्यनॖ
         आमुत
2. मु: कऺशीरि काह गरॖ
    अ: यॆति नॖ ज़्यादॖ इमॖकान
         आसन/मॊहदूद ज़ऺरयि
         आसुन
3. मु: कशनॖ कशनॖ छु रथ
         यिवान
    अ: गऺखॖर लागनॖ सॗत्य छु
         कामि खुर यिवान
4.मु: कस नॖ गव कस नॖ गछ़ि
        यस नॖ गव तस ति गछ़ि
   अ: युस यथ दुनियाहस
        मंज़ आव तस छु अज़
        न तॖ पगाह मुसीबत
        तुलुन प्यवान
5. मु: क्रॗर्युक न्यॆनि मॊन्डुक
   अ: सु यस नज़र तंग आसि
**********************
1. यलॖ....Open
2. यॆति योर....From now
                    onwards
3. यॆमि पतॖ....After this
4. यॆमि ब्रौंह...Before this
5. यॆमि वऺरयि...This year
6. ॳछ पूर...To have full
                   eye sight
7. ॳछ फोरन्य..Pulsation
            in the eye/Have
            a premonition
8. ॳछ फेरनि ...Not to be
              in good terms
9. ॳछ फ्युर....To lose
                       respect
10. ॳछ तऺल्य नॖ युन..Not
                  to consider
                  adequate
**********************
      गीता ज्ञान  :अध्याय-12
युस दोस दुशमन तॖ मान अप्मान, सर्द गर्म स्वख द्वख मानि समान
म्योन टोठ मॊह ममता त्रावान
वॊन भगवानन गीता ज्ञान
**********************
जवॖ लालनि कोरि कॊर पनॖनिस न्यॆचविस खान्दर ति। चुंकि न्यॆचविस लऺज्य नौकरी गुजरातॖ तरफॖ कपऻर्यताम सु द्राव पनॖन्य भऻर्या ह्यथ व्वंय पनुन गरॖ सम्बालिनि तॖ जवॖलाल रूद ब्यॆयि कुनुय कूर तॖ ज़ामतुर ह्यथ। जवॖ लालॖन्य होवॖर्य बऻच़ गऺयि ज्यॊम त्रऻविथ तॖ वऻत्य राजस्थान बसनि पनॖन्यन पनॖन्यन शुर्यन पतॖ। यपऻर्य गव व्वंय जवलालनि कोरि पनुन दोद बडान तॖ यलाज करनावान करनावान वऻच़ यिति कस ताम डाक्टरस तिथिस यस पनुन कऺल्निक जयपोरस मंज़ छु। मातामाल वाल्यव द्युत सलाह जवॖलालस ज़ि कूर अनुन जयपूरुय युथ तति रोज़ि डाक्टर सॖन्दिस यलाजस तल। यि ज़ोन जव लालन मुनऻसिब तॖ ह्यॊतुन फ्लैटा अख जयपोरस मंज़। त्रोवख ज्यॆमुक मकानॖ तॖ वऻत्य रोज़नि जयपोर। कॆंह कऻल्य पतॖ प्यव जवॖ लाल ब्यमार। कूर ॴसॖय ब्यमार स्व वातिहे पानस किनॖ मऻलिस, कोरि हन्दिस रॗनि सॖन्दिस फ्यॆकिस प्यठ प्यव द्वगनॖ बोर सुति ह्यॊतुन गछ़ुन कमज़ोर। ह्यॊक नॖ फऻसलॖ कऺरिथ सु गछ़ि कोर।यि करान करान वऺट जवॖ लालन ॳछ। व्वंय रूद अति सिरिफ कूर तॖ कोरि हुन्द रून। नविकदलॖकिस जायदादस क्याह गव क्याह नॖ गव, खबरॖय छॆ नॖ। ज्यॆमुक जायदाद रूद लावऻरिस, बऻच़न प्रारान, बऻच़ रूदी नॖ।तथ कुस वाति दय ज़ानि।जवॖ लालुन इतिहासॖय सपुद समाप्त। लरि जायि छि तऺती।
यी हाल गव असि कऻशिर्य बटन यिमन त्रॖहन वऺरियन मंज़। यि छु नॖ असि बासान मगर कऺशीरि प्यठॖ च़लनॖ पतॖ गव कऻशुर बटॖ स्यठा गीर। सु जवॖ लाल युस प्रथ अंगस ॴश्यनावस ओस कालॖ पगाह ख़बर अतर ह्यवान रोज़ान, तमिस जव लालनिस मरनस प्यठ वोत नॖ अख ति यूत दूर अंदर। मोबाइलॖ दऺस्य कॊर सारिवॖय हाय तोबा तॖ आयि कथ तॖ गऺयि कथ। सारिवॖय रऺटमॖच़ पनॖन्य पनॖन्य वथ। कऻशिर्य बटस ओस गछ़ुन क्वत तॖ वोत क्वत। ज़ाव कति ताम, प्याव कति ताम तॖ शाह त्रोवुन कति ताम। तोति रूद पकान ति क्याज़ि पकुन छुस ज़िन्दॖ रोज़नॖ बापथ। छि च़ालॖन्य पनॖन्य दऻद्य पानय, वखतुक छु यी व्वंय फसानय, ब्यॆनि बऻय बंध तॖ बांधव छि अज़कल अख बहानय।
**********************
"चैतन्यं शाशवतं शान्तं व्योमातीतं निरंजनम्। नादबिन्दुकलातीतं तस्मै श्री गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

18.05.2019

18.05.2019, वह्यक (वैशाख) ज़ूनॖ पछॖ (शुक्ल पक्ष), पुनिम (पूर्णिमा) बटॖवार (शनिवार/शनिश्चरवार),श्री सप्तार्षि सम्वत 5095, राश वृश्चिक(रऻच़ हॖन्ज़ॖ 8.29 बजि प्यठॖ),ऋतु ग्रीष्म(चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: कुल मुल छु शूबान
         लंगव लंज्यव सान
    अ: बजर छु अथ मंज़ ज़ि
         ल्वकॖट्य ति रछोख
        पानस सॗत्य
2. मु: कऺलिस मऺलिस ख्वदा
         रऻज़्य
   अ: स्यॆदिस सादस छु ख्वदा
         मदॖतस यिवान
3. मु: कऺल्य सुन्द बोल-बोश
         ज़ानि कऺल्यसुन्द मोल
         मऻज्य
    अ: मऻलिस माजि छि शुर्य
         सॖन्ज़ दग आसान
4. मु: कम ख्यॊन ग़म न ह्यॊन
    अ: ज़्यादॖ लालॖच करनॖ
         ख्वतॖ छु क़नाथ करुन
         बेहतर
5. मु: कऺमीनस ख़ऺदमत छि
         ज़मीनस चौब
   अ: कऺमीनॖ शख्सस ख़दमत
         करॖन्य छि बेकार
**********************
1. या....Or/Either
2. याद...Memory/Re-
             membrance/
             Recollection
3. याद युन....Come to
             mind/To re-
             collect/To re-
             called
4. यादाश्त....Memory/
                   Memoirs
5. यात्रा......Piligrimage
         to a Hindu shrine
6. उमा.....Uma (Name
               of Godess)
7. उनजिमन....Union/
           Association/
          Gathering/Meet-
          ing/Assembly/
          Society
8. उलफत...Love/Attach
          ment/Attraction/
          Affection
9. उल्टा पलट...Up side
                       down
10. उजरथ....Wages/
           Compensation/
           Remuneration
**********************
      गीता ज्ञान  :अध्याय-12
युस नॖ ज़ांह ख्वश या ग़मगीन
सपदान, न कऻन्सि हॖन्ज़ दॖय न कामना आसान।
म्योन टोठ शुब अशुब कर्म त्यागान
वॊन भगवानन गीता ज्ञान
**********************
जवॖ लालॖन कूरि ओस भगवानन नूर बखुशमुत, स्वन्दर कोरिहेन गयि बऺड गछ़ान। मगर ज़न लऺज्य ॳमिस कोरि कऻन्सि हॖन्ज़ बद नज़र तॖ नानि बॖड्यबबसॖन्दि स्वर्गवास गछ़नॖ पतय रऺट यि  कॆंच़व दाद्यव। ॳमिस कोरि कॊरुख खान्दर तॖ ज़ामतुर ऒनुख गऺर्य प्यॆठ यि सूंचिथ ज़ि कूर रोज़ि पनॖन्यन ॳछन तलॖय,  कुन्यर ति बास्य नॖ, यलाज ति वात्यस मुकमल।  चूंकि मकान ओस बॊड बॊड दु-पूर ज्यॆमिस मंज़, कोरि  द्युतुख न्यसॖफ हिसॖ ब्यॊन गरॖ करनॖ बापथ। यि कूर ॴस मंज़ॖ ठीख आसान तॖ मंज़ॖ डॆज्य, ॳम्यसुन्द खानदार ति  ओस वाव वुछितॖय नाव पकनावान। कोरि हॖन्ज़ि माजि ति द्युत यमन नाद।  अयाल छ़ॊक्यव ब्यॆयिहऻन। व्वंय रूद मोल कूर तॖ ज़ामतुर। क्वदरयतन कऺरनख यावरी तॖ न्यॆचुव ज़ाव ॳमिस कोरि। तऺमिस ति आव पालन पोशन करनॖ ठाठ बाठ सान। सुति बड्यव। कोरि हुन्द मोल बुड्यव तॖ वुन्यख ताम ओस यि परवरिश करान कोरि ज़ामतॖरिस तॖ ज़ुरिस मगर व्वंय ॴस्य कूर ज़ामुतुर जवॖ लालॖन ख़दमत करान। कोरि हॖन्दि न्यॆचिव पॊर ल्यूख तॖ वोत  ट़्रेनिंगि करिनि कथ ताम शहरस मंज़। गरॖ गव बिल्कुल छ़ॊर तॖ छ्यॊन।  वख्तस सॗत्य सॗत्य  आयि जवॖ लालन्यन होवर्यॆन ति तबदीली।ॳड्य मूद्य ॳड्य रूद्य। यिम रूद्य तिम आयि छऺकरनॖ ॳड्य होर ॳड्य योर। ज्यॆमुक मकानॖ ति ह्यॊतुनख ख्यॆनि युन बऻच़व रॊस। बॊड मकानॖ दु-पूर ब्यॆयि खऻली ज़मीन युस वख्तॖ अकि शोलाव ओस सब्ज़ी तॖ पोशव सॗत्य।ज़मीनस  वातनवऻल्य वऻतय वैयकुण्ठस तॖ यिम रूद्य तिमन ॴस नॖ स्व सामर्थ ज़ि तिम वातहऻन अथ खऻली ज़मीनस। वख्तन द्युत लरि फिरुन  बिल्कुल तिथय पऻठ्य यिथ पऻठ्य  कुनवुहशथ तॖ नमतस मंज़ समयन वॊलॖग्वतुन द्युत कऻशिर्य बटन कऺशीरि मंज़। कथ छि जऻरी जवॖ लालॖन।
**********************
"हरौ रुष्टे गुरुस्त्राता गुरौ रुष्टे
न कश्चन।
सर्वदेव स्वरूपाय तस्मै श्री गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

17.05.2019

17.05.2019, वह्यक (वैशाख) ज़ूनॖ पछॖ (शुक्ल पक्ष), च़्वदाह (चतुर्दशी)शॊकुरवार (शुक्रवार/जुम्मा), श्री सप्तार्षि सम्वत 5095, राश तुला (चलान) ऋतु ग्रीष्म (चलान)...ॳज़ छि गणॖ च़्वदाह ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: कमस छु कमाल तॖ
         च़ऺरिस छु ज़वाल
    अ: कमसॖय प्यठ गुज़ारॖ
         करुन छु बॆहतर
2. मु: कुनुय फ़ाकॖ तॖ द्राग
         कुनुय ऒबुर तॖ माग
    अ: रछ़ ति नॖ च़्यड या
         बर्दाश्त आसुन
3. मु: कुनि हऺट छे नॖ दानस
         ति दज़ान
    अ: कुन ज़ॊन छु नॖ कऻम
         कऺरिथ ह्यकान
4. मु: कुनी कूर तॖ वऻर्यवि
         कुनी खार तॖ कुछि
    अ: प्रथ कुनि छि पनॖन्य
         पनॖन्य जाय
5. मु: कुनुय पान छु राहति
         जान
    अ: ज़िम्वऻरी रॊस आसुन
         छु बॊड स्वख
**********************
1. यिरनावुन...To cause/
                     To float
2. येल अनुन...To subdue
3. येरुन.....To arrange/
                  To cover
4. येज़ार......Trouser
5. यॆलि.......When
6. ॷठिम.....Eighth
7. ॳपील....Appeal/
                   Request/
         Request in court
         of law
8. ॳबीद...Money offer-
                ed to priest
          at the time of
        Thread Ceremony
9. ॳथ्य.....With hand/
                Through/By
10. अजदर....Snake/
                      Dragon
**********************
      गीता ज्ञान :अध्याय-12
ॳन्दरॖ न्यॆबरॖ पवॆत्र तॖ खऻयिशव रॊस, खौफ़ रॊस ना तरफदार आसि युस। सु म्यॆ टोठ युस यिम विषय त्यागान
वॊन भगवानन गीता ज्ञान
**********************
जवॖ लालसॖन्ज़ कुनी कूर आयि रछनॖ कमि लोलॖ सान पनॖनि नानि बॖडबब सॖन्द्यव अथव मगर मर्गस क्याह कऺर्यज़ि। तिमव वुछ नॖ पतॖ नविकऺदलुक मकानॖ ज़ांह तॖ न ह्यॊक जवॖ लालनॖय तथ कॆंह फऻसलॖ कऺरिथ तिक्याज़ि सु मकानॖ ओस फस्यॊमुत शिरकतस मंज़। जवॖ लालॖ सॖन्द्यन पितत्र्यन वित्र्य मंज़ यिम नॊवकदल त्रऻविथ कशीरि मंज़ॖय होरॖ योर नव्यन बऺस्यतियन मंज़ कतिताम रोज़ान ॴस्य। तिहन्दि मकानॖ मंज़ॖ नेरनुक वजह दपान ओस ज़ि नविकऺदलॖ तिहिन्दिस अलाक़स अंद्य पऺख्य ॴस मुसलमानव पनॖन्य जाय बनऻवमॖच़ तॖ कऻशिर्य बटन ओस नॖ पनुन पान दपान महफ़ूज़ बासान ति क्याज़ि तति दपान सियऻसी गरमा गरमी मंज़ ॴस आये दिन कॆंह न तॖ कॆंह तनाव रोज़ान तॖ कऻशिर्य बटन हुन्द द्वह कडुन ओस गोमुत मुहाल। नविकऺदलि रोज़न वऻल्य बटॖ ॴस्य वारॖ वारॖ पनॖन्य जाय त्रऻविथ ह्यॆरम्यन अलाक़न यानि नऺट्यपूर, शिवपूर, इन्द्रानगर, संतनगर, बर्ज़ुल बाग़ात जवऻहिर नगर गॊगजिबाग, तुलसीबाग वगैरा वगैरा मगर ॴस्य कऺशीरि मंज़ॖय। खऻर, जवॖ लालनि कोरि वॊथ नानि बुड्यबबॖ सुन्द साये तॖ ॴस बनॆमॖच़ कुनी कूर आसनॖ मूजूब ॳछन हुन्द नूर पनॖनिस मऻलिस माजि यिम व्वंय ज्यॆमि आयि रोज़ान मुकमल पऻठ्य। जवॖ लालस दपान ॴस्य पनॖन्य होवॖर्य ति ज्यॆमसॖय मंज़ रोज़ान तिहन्दिस मकानस नखय कतिताम। यॊत ताम म्यॆ ज़्वन छु जम्मू कशमीरस  मंज़ दरबार मूव आसनॖ किन्य ॴस्य वारिहाव कऻशिर्य बटव ज्यॆमिस मंज़ तमि वख्तॖ ज़मीन मऺल्य ह्यॆच़मॖच़ मुजि म्वल भावस तॖ कॆंच़व ॴस्य मकानॖ ति ग्वडय बनऻवमॖतय तॖ ॴस्य वन्दस तरान पनुन अयाल ह्यथ श्यॆन रयतन रोज़िनि ति तॖ येमिस वागुज़ार ओस तिम ॴस्य मुस्तकॖल तोर पऻठ्य ज्यॆमी रोज़ान पुशतऻनी मकान कऺशीरि मंज़ आसनॖ पतॖ ति। मुसलमानव ओस कऺशीरि मंज़ बटन हुन्द जादाद मऺल्य ह्यॊतॖमुत वारियाह कालॖ ब्रौंठ तॖ ओस तिमव पनॖनि नरि ज़ंगॖ परि पखॖ वाहराव्यमच़ॖ बटॖ मऺहलन मंज़। चूंकि शुर्य ज़्यॆवरावस ॴस नॖ रोक टोक तिमन दॊहन दॊनवऺन्य दर्यन मंज़ अमि म्वखॖ ति बडॆयि आबऻदी कऺशीरि मंज़ जान रफ्तारि सॗत्य। मगर मूसलमानन हुन्द रहन सहन ओस हना ब्यॊन बटन निशि तव किन ज़ोन बटव मुनऻसिब ज़ि तिमन अलाक़न मंज़ गछ़ुन यॆत्यन तिमन पनुन माहौल ह्यु बासिहे। ज्यॊम ति बास्यव वारिहान बटन पनॖनि मनॖ मुवऻफिक तॖ आयि रोज़ान ज्यॆमिस मंज़ ति। जवॖ लालन कथ छि जऻरी। यऻरी कऺर्यिन परनवाल्यन।
**********************
"परात परतरं ध्येयं नित्यम आनन्दकारकम्।हृदयाकाश मध्यस्थं शुद्धस्फटिकसन्निमं।।
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

16.05.2019

16.05.2019, वह्यक (वैशाख) ज़ूनॖ पछॖ (शुक्ल पक्ष), बाह (द्वादशी),ब्रसवार
(वीरवार/ब्रहस्पतवार), श्री सप्तार्षि सम्वत 5095,राश तुला (दुहचि 4.56 बजि प्यठॖ),ऋतु ग्रीष्म (चलान)
चूंकि पगाह छि त्रुवाह रावान पगहुक वॊहरवोद यी ॳज़्य यानि बऻश द्वह....
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: कॊबिस लथ कारगर
    अ: कुनि सातॖ छि ग़लत
         तरीकॖ ति कऻम स्यॆज़
         गछ़ान
2. मु: कोरि ल्यख गऺयि तोरि
         दब
    अ: कोरि ल्यख छि सख़
         लगान
3. मु: क्कॖर दपान म्यॆ क्याह
       राह, बतख़ ठूलन द्युतुम
       फ़ा
    अ: कांह जान कऻम कऺरिथ
         ति बदनाम गछ़ान
4. मु: क्व कथ नय तॖ कऺन्य
         तऺल्य क्याज़ि
    अ: नाकारॖ कथॖ छि च़ूरि
          च़ूरि करनॖ यिवान जान
          कथ नॖ
5. मु: क्वकुर गछ़्या बाह
         त्रॊक
    अ: ल्वकुट या कमीनॖ
       शख़स ह्यॆकिनॖ अज़मथ
        प्रऻविथ
**********************
1. न्यॆचुव....Son
2. ज़ुर.......Grand son
3. ज़्युर.. Grand daught-
              er
4. ज़ामतुर.... Son-in-law
5. न्वश.....Daughter-in-
                law
6. बाबथॖर... Nephew
7. बावज़... Niece
8. जद-बऺड्यबब...Great
                  grand father
9. बडॖनान्य..Great grand
                   mother
10. साल....Sister-in-law
**********************
     गीता ज्ञान :अध्याय-12
यसुन्द कऻन्सि ज़ीवस भय नॖ रोज़ान, न पानस कऻन्सि हुन्द ख़ौफ आसान
हर्शॖ तॖ हस्दॖ रॊस म्यॆ टोठ बासान
वॊन भगवानन गीता ज्ञान
**********************
ॳस्य कऻशिर्य बटॖ छि वाकॖय छऺकरिथ तॖ यिम त्रॖह वऺरी वऻत्य असि सिरिफ़ होरॖ योरुय योत करान। कऺशीरि मंज़ ॴस्य बिहिथ वऺलिथ मऺलिथ तॖ पनॖन्यन पनॖन्यन आल्यन मंज़ फॊलिथ। मगर यनॖ तति आतंकवाद्यव च़ऺलॖरऻव्य कुनवुह शथ तॖ कुन्नमथ-नमथस मंज़, असि डॊल ज़िन्दॖ रोज़नुक पैमानॖय। कऺशीरि मंज़ ओस पुशतऻनी ज़मीन् ज़िरात, मकानॖ जायदाद, अंग ॴश्यनाव दऺछिन खॊवॖर्य, यार दोस्त नखि डखि तॖ कुन्यर ओस नॖ प्यॆठ्य प्यवान, दूर्यॆर ओस नॖ बासान, ॳहलस मऺहलस मंज़ ॴस क्रख चिख बराबर चलान। मगर फ्युर लॊग सऻर्यसॖय। कांह चीज़ रूद नॖ डंजि पनॖनि जायि। ॳस्य छि द्वह द्वह कडान मगर तनाव छु अन्दॖर्य ॳन्दॖर्य बरकरार। क्याथान छ़ान्डान तॖ छ़ारान। नवि पुयि प्यॆयि नॖ पलि ति क्याज़ि तिम तऺर्य नॖ अमि कदलॖ प्यॆठ्य। तिम फीर्य न तिमन कोचि गल्यन तॖ तिमन यारबलन। नवि कदलॖ ओस च़ु पूर मकान, ॳथ्य मंज़ द्राव ल्वकॖचार जवॖ लालस। मोल वोत ज्यॊम वखतॖ अकि नौकरी हन्दिस सिल्सिलस मंज़। गर्युक गरॖ गव परेशान ज़ि त्रॆ हथ मील दूर गव जवॖलालस मोल। चिठ्यन प्यठॖ चिठि आयि लेखनॖ, चिठ्यन हन्दिस जवाबस प्रारान मऻज्य दर्वाज़स कुन मुदय गन्डिथ डाकॖ वऻलिस प्रथ द्वह प्रॖछ़ान रोज़ान सानि नावॖ मा कांह चिठ्या।गऺयि तिम द्वह। नविकऺदलुक गरॖ गव वारॖ वारॖ खऻली मगर महदुद रूद्य ज्यॆमिस तामॖय।
समय गव पकान पनॖनि गति तॖ जव लालस गव मोल मऻज् स्वर्गस तॖ रूद पनुन अयाल ह्यथ ज्यॆमिस मंज़। अयाल रूदुस छ़ॊट पानॖ पनॖन्य भऻर्या तॖ अख कोरिहेन। ज्यॆमिस मंज़ लॊदुख बॊड बॊड मकानाह स्वकालि तॖ नॊव कऺदल गव वारॖ वारॖ मऺशिथ मगर ततिच्य व्वथ-छ़ान्ठ रुद्य याद करान। तीतिस कालस आव टेलीफोन ति, चिठि लेखनि गऺयि कम मगर ग़म रूद तऺती ज़ि नविकऺदलॖकिस मंदोरि क्याह बनि। कथ छि जऻरी यऻरी कऺरिन परनवाल्यन
**********************
"वन्देहं सच्चिदानन्दं भेदातीतं जगद्गुरुम्। नित्यं पूर्णं निराकारं निर्गुणं सर्व संस्थितम्।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

15.05.2019

15.05.2015, वह्यक (वैशाख), ज़ूनॖ पछॖ (शुक्ल पक्ष), काह(एकादशी) ब्वदवार (बुधवार), श्री सप्तार्षि सम्वत 5095, राश कन्या (चलान)ऋतु ग्रीष्म (ॳज़्यकि प्यठॖ)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1.मु: क्वकॖर करिहे मान मगर
        पूत्यन क्याह करि
   अ: बाज़े छु ज़्युठ शुर्येन
        हन्दिवॖय कारव सॗत्य
        तंग यिवान
2. मु: क्वकॖर तछान तॖ पूत्य
         ह्यॆछान
    अ: शुर करि ती यि तसॖन्द्य
         ज़िठ करान आसन
3.मु: क्वकॖरि हॖन्दि लति सॗत्य
        छि नॖ पूत्य मरान
   अ: माजि हॖन्दि मार दिनॖ
         सॗत्य छु नॖ शुर्यन न्वक-
         सान वातान
4. मु: क्वकॖर हय थऺव्यज़्यन
         म्वख्तॖ डेरस तति ति
         ह्यॆयि तछुन
    अ: इन्सान छु नॖ कुनि ति
         हालतस मंज़ पनॖन्य
         आदत्य बद त्रावान
5. मु: क्वकॖर हय ख्यॆयि खार
         तोति सपदि नॖ खार
    अ: इन्सान छु नॖ सिरिफ़
         ख्यनॖ ख्यनॖ सॗती बजर
         प्रावान
**********************
1. हाक...Collard greens
2. सॊच़ल....Mallow
3. क्रछ़.....Knapweed
4. ऒबुज...Sorrel
5. हन्द..... Dandelion
6. लीसॖ.... Amaranth
7. नुनर..... Purslane
8. पालक... Spinach
9. वांगुन.....Brinjal
10. ओलव... Potatoes
**********************
   गीता ज्ञान :अध्याय-12
स्वख द्वख समान दुशमनन ति बख्शान, सु यूगी सदा सन्तुष्ट रोज़ान।
जितेंदरय भक्त म्यॆ टोठ आसान
वॊन भगवानन गीता ज्ञान
**********************
सान्यन शुर्यन छि गऻमच़ॖ कऻशिर्य सब्ज़ी ख्यॆनी मऺशिथ।वैसे ति कति ॴस्य ॳस्य ति ख्यवान कऺशीरि मंज़ हन्द, व्वपलहाक, बुम, क्रछ़, ऒबुज, च़्वकॖ लॊडर, कृहॖन्य कनगॖछ, क्यनॖबऺब्य, कऻन्ज़, वगैरा वगैरा। हालांकि हवनस ववनस प्यठ ओस व्वपलहाकस म्वल मगर बकाया चीज़ ॴस्य तति ति नायाबॖय गऻमॖत्य। ॳस्य ॴस्य ल्वकॖचारस यिम चीज़ ख्यवान अलब्तॖ व्वंय गऺयि वुम्बराह अख बुथ वुछनस यिमन चीज़न। अज़ कऺर म्यॆ कूशिश यिमन सब्ज़ियन फ्युर दिनॖच यि सूंचिथ ज़ि यिम म्यानि वऻन्सि यानि सतथ अपोर वऻतिमॖत्य आसन तिमन मा प्यॆयि याद कॆंह कॆंह सब्ज़ी य्यॊस तिमव ल्वकॖचारस ख्यॆमॖच़ आसि तॖ सॗती वनन पनॖन्यन शुर्यन कट्यन यिमन मुतलक तॖ ताकि तिमन गछ़ि अमिच ज़ऻन्यकऻरी। वुडवुन जानावार ओस यथ वनान ॴस्य पऺछिन सुति गव गऻबॖय ज़न। हालांकि सोच़ल हाक म्वंजि नुनर छि वुनि ति मेलान रोज़ान मगर बाकय सब्ज़ी छॆ नॖ नज़र यिवान। कॆंह गरॖ ॴस्य कऺशीरि मंज़ कऻन्ज़ बनावान तॖ मऺहलस बऻगरावान। सऻन्य ज़िठ्य ॴस्य बतस सॗत्य कऻन्ज़ मिलनावान तॖ बतॖ खार ॴस्य यिवान ख्यनॖ। अलॖ हचि, वांगन हचि छि वुनि ति मेलान जेमिस मंज़ ति मगर सऻन्य शुर्य छिनॖ म्यॆ बासान तिमन कुन वुछान ति। ह्वगाडॖ ति छि स्यठा कम लूख सानि ज़ऻच़ मंज़ कमॖय पाहन ख्यवान।रज़ॖ ह्वगाडॖ, गुरन, रामॖ गुरन आसॖ ब्यॆयि ति सब्ज़ी यिम ॳस्य ॴस्य टास कऺड्य कऺड्य ख्यवान। म्वकलॆयि तिम द्वह।
**********************
"स्थावरं जंगमं व्याप्तं यत्किंचितचराचरम।
ततपदम् दर्शितं येन तस्मै श्रीगुरुवे नम:।।"
पऺरिव यि मंत्र ति दॊहय
*********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

14.05.2019

14.05.2015 वह्यक (वैशाख) ज़ूनॖ पछॖ (शुक्ल पक्ष) दऺहम (दशमी) बॊम्वार (मंगलवार),श्री सप्तार्षि सम्वत 5095, राश कन्या(दुहचि 2.28 बजि प्यठॖ), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ बाह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात।
**********************
1. मु: क्वलि काजवठ खसि
         नॖ हॊख
    अ: कांह व्वठ-छ़ांठ छॆ नॖ
         फ़ऺज़ूल आसान
2. मु: क्वलि ख्वतॖ क्वल छि
         सर्द आसान
    अ: कांह मुसीबथ छु नॖ
         दॊयिमि ख्वतॖ कम
         आसान
3. मु: क्वली ग्रज़ान कवय
         छख? आगुर वुछिथ
    अ: बजर छु पतॖवतय
         आसान
4 मु: क्वलि छ़ुनुन छु आसान
        खारुन छु मुश्किल
    अ: बिगाडुन छु सऺहल
         अमापॊज़ सु शेरुन
         पारुन छु मुश्किल
5. मु: कोचि गरॖदऻनी गऺयि
         हालॖ हऻरऻनी
    अ: आवारॖ-गर्दी छि तबाह
          करान
**********************
1. च़ित्थॖर...चेत्र..March-
                        April
2. वह्यक...वैशाख.. April-
                             May
3. ज़्यॆठ...ज्येष्ठ...June
4. हार....आषाढ...July
5. श्रावुन..श्रावण..August
6. बऻद्रिप्यथ...भाद्र...Sep-
                          tember
7. ॴशिद...आश्विन..Octo
                               ber
8. कार्तिक..कार्तिक..Nov-
                           ember
9. मॊंज्यहोर..मार्ग...Dec-
                           ember
10. पॊह..पौष..January
11. माग...माघ..February
12. फागुन..फाल्गुन..Feb-
                  ruary-March
**********************
      गीता ज्ञान :अध्याय-12
सारिनॖय ज़ीवन लोलॖ नज़रि वुछान, गर्ज़ॖ तॖ मतलब रॊस दयावान।
मॊह अहंकार रॊस तॖ ख्यमावान
वॊन भगवानन गीता ज्ञान
**********************
दौरॖ दौर छि लऺगिथ ज़ि कुस सम्बालि कश्मीर समति दिल्लि मंज़ॖच कुर्सी। अंद्रिम नॖ न्यबर नेरनस तयार तॖ न्यॆबरिमन नॖ अंदर अच़नस जाय। क्यथान्य माय छि अंद्रिम्यन यिम नॖ न्यॆबरिम्यन अंदर वथ त्रावान छि। यि छि असि कऻशिर्य बटन हॖन्ज़ि संस्थायि हॖन्ज़ हालथ। बॊयी ॴस नॖ लूकन अमि संस्थायि हॖन्ज़ अज़ त्रॖह वऺरी ब्रौंठ ति क्याज़ि यि संस्था दपान ॴस आमॖच़ बनावनॖ कुनवुह शथ तॖ त्रुवनज़ाहस मंज़ दिल्लि मंज़ रोज़न वाल्यन कऻशिर्य बटन हॖन्ज़ि बॆहबूदी खऻतरॖ तॖ ॴस करान खऻर लूकन कुनि कुनि रंग्य। कऻशुर समाचार मैग़ज़ीन ति ह्यॆच़ॆयोख कडुन यथ मंज़ कऻशिर्य पंडितन हॖन्ज़ ब्यॊन ब्यॊन मज़मूनन प्यठ ख़बरॖ आसॖ यिवान छापनॖ। यि रसालॖ छु वुनि ति यिवान छापनॖ दफ अमापोज़ अम्यकिस मयारस मंज़ दपान आमुत छु ज़रा ल्वच़र। ब्यॆयि छु बोज़नस तल यिवान ज़ि समति हॖन्दिस जायदादस छु नॖ संजीदगी सान कांह सौंचान शेरुन-पऻरावुन। दपान अथ जायि छि ख़स्तॖ हालथ गऻमॖच़। यि हाल ह्यॆतुमुत छुन बिगरुन तनॖ प्यठय यनॖ कऻशिर्य बटॖ च़ऺलिथ आयि कुनवुह शथ तॖ नमतस मंज़ तॖ छऺक्रऻव्य छऺक्रऻव्य वऻत्य दिल्लि तॖ दिल्लि अंद्य-पऺख्य रोज़नि। अमि संस्थायि दपान तमि वख्तॖ कऺरमॖच़ छि स्यठा जान कऻम बटन हॖन्द्यन ज़ख्मन मरहम करनॖ बापथ। तमि सातन ॴस्य दिल्लि हॖन्दी नफ़र संस्थायि हॖन्ज़ कुर्सी सम्बऻलिथ मगर पतॖ यॆलि बदलॖ बदलॖ लूकव ह्यॆच़ अतिच लाकम रटॖन्य तॖ समति हुन्द दपान रंग ह्यॆतुन डलुन। संस्थायक्यन सदस्यन ह्यॆच़ॖन नज़र बदलॖन्य कऻम करनुक अंदाज़ बदलुन तॖ अतिचि व्यवस्थायि ह्यॆच़ॖन दरार पऻदॖ सपदॖन्य य्यॊस दरार बडान गऺयि तॖ कलॖ अख ॳकिस फाटनावकिस हालस ताम आयि। चुनाव छु यिन वोल व्वंय। कशमॖकश छि जऻरी।यऻरी कऺर्यनख मऻज्य दीवी। वुछव ॳस्य ति कऺमिस कोताह ज़ोर छु। अज़कल बस यिहोय अख शोर छु ज़ि समति हुन्द कोर छु।
**********************
"ध्यानमूलं गुरो: मूर्ति: पूजा मूलं गुरो: पदम। मन्त्रमूलम् गुरो: वाक्यम् मोक्षमूलं गुरो: कृपा।।"
 पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

12.05.2019

12.05.2019 वह्यक (वैशाख) ज़ूनॖ पछॖ (शुक्ल पक्ष) ॴठम (अष्टमी) आथवार (एतवार/रविवार),श्री सप्तार्षि सम्वत
5095, राश सिंह (दुहॖचि 11.54 बजि प्यठॖ), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: खऺर्यये पॊठये पऺतिम
         मॊठये
    अ: यॆलि कॖस्मथ यावरी
         करान छु प्रऻन्य बदी छि
         मशान
2. मु: खऺरिस राज डायन
         गर्यन
    अ: नाकारॖ इन्सानॖ सुन्द
         असर रऺसूख छु नॖ
         ज़्यादॖ कालस रोज़ान
3. मु: खऺरिस हय पकिहे
         पनॖनि व्वडि कासिहे
         खऺर
    अ: यस नॖ पानस खऻर
         करुन तगि तस वनान
4. मु: खसवॖनिस ज़ेरिहेन
         वसॖवॖनिस दकॖहऻन
    अ: बऺडिस मोह्यनिविस
         पतॖ पतॖ पकुन तॖ ल्वक
         टिस दक्कॖ द्युन
5. मु: खल तॖ ख्वदा
    अ: यॆलि नॖ किहीं नॊन
         आसि
**********************
1. सफ़ेद.....White
2. क्रुहुन.....Black
3. ल्यॆदुर....Yellow
4. व्वज़ुल...Red
5. सब्ज़.... Green
6. न्यूल....  Blue
7. गुलऻब्य....Pink
8. गगॖर्य रंग...Grey
9. गुलाब......Rose
10. पोश...... Flower
**********************
     गीता ज्ञान :अध्याय-12
यि सादना ति अगर ह्यकख नॖ
कऺरिथ, मनस तॖ ब्वज़ प्यठ विजय प्रऻविथ।
सोरुय कर्मॖ फल गछ़ त्यागान
वॊन भगवानन गीता ज्ञान
**********************
असि छि तॆह छु अहम् तय अभिमान, नासमझ नादान करान मान मान, योरॖ खय होरॖ क्रुर गछ़व कोरुय। असि ॴखॖर गछ़ुन तोर ननवोरुय।  असि बासान दुनिया ज़्यून सोरुय। असि ॴखॖर गछ़ुन तोर ननॖवोरुय। ओम् नाव सॗत्य रोज़ि पथ कुन सोरुय।असि ॴखॖर गछ़ुन तोर ननॖवोरुय। सोम्बरावान गरॖवेठ कऺहन्दि बापथ। तथ ख्यन पतॖ  यॆति पंज़्य तय हापथ। मसऻ थऺकॖराव पान मसऻ त्राव दोरॖय।असि ॴखॖर गछ़ुन तोर ननॖवोरुय। आयि ज़न्मस द्वह पांछ़ करव गिन्दुनाह। वुछव प्रथ रंगॖ रंग बऺरिथॖय यि दुनिया।कुस क्याह वनान तथ ना करव गोरुय।असि ॴखॖर गछ़ुन तोर ननॖवोरुय। लऺर म्यॆ खारेयम मंज़ मऻदानस, ओस
समुत तॆलि अज़ छि पानस पानस। राथ ओस च्युर्यग्यॊश अज़ ना शोरुय।असि ॴखॖर गछ़ुन तोर ननॖवोरुय। मन छु चंचल तय तन डांवाडोल।सॊम रोज़ सॊम ख्यॆ हरि ओम् बोल। यस नॖ कथ पलि प्यॆयि दीप सु छु चोरुय, असि ॴखॖर गछ़ुन तोर ननॖवोरुय।
युस आव योर तस छु वापस गछ़ुन। मोतस क्याह करि सोन पश्युन। यि ज़ऻनिथ ति छु इन्सान वाहरऻविथ नरि ज़ंगॖ मॊह मायायि मंज़। अख ॳकिस सॗत्य वऻर थऺविथ, ज़िद थऺविथ। असान गिन्दान पज़ि असि द्वह कडुन। अख ॳकिस लोल बरुन। अख ॳकिस अकार बकार युन। अख ॳकिस अलज़ुन पलज़ुन। यि गछ़ि इन्सानसुन्द नियम रोज़ुन मगर वुछनस तल छु बासान ज़न सोरुय फिरिथॖय। नऺतीजि छु अलगाव वाद, तनाव, नफ़रत, मार दाड, बेक़रऻरी, बेचऻनी, बेबसी, बेरुखी वगैरा वगैरा। पायस प्यवान प्यवान छि ॳमिस इन्सानस वऻन्स नीरिथ गछ़ान। पतॖ फ़ेरान छुस यॆलि फ़ेरान छस ज़र्दी। तवय छि वनान रोज़ान ज़ि पनॖन्यन संस्कारन पज़ि असि रऻछ करॖन्य। सुबहऻय न्यॆन्दरि वऺथितॖय भगवानस मंगुन ज़ि द्वह नीरिन्य ह्रोच़ तॖ फ्रूच़। रुत छु असि वरतावुन, रुतुय छु असि बुथि ह्यॆछनावुन। रॖत्यसॖय रोज़व व्वमेदवार।
**********************
"अनेकजन्मसम्प्राप्तम् कर्मबंध विदाहिने। आत्मज्ञानप्रदानेन तस्मै श्री गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
   भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

11.05.2019

11.05.2019, वह्यक (वैशाख) ज़ूनॖ पछॖ (शुक्ल पक्ष) सतम (सप्तमी) बटॖवार (शनिवार/शनिश्चरवार), श्री सप्तार्षि सम्वत 5095, राश कर्कट (चलान), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: खऺन्ज़मॖच़ क्वकॖर
    अ: छॊन इन्सान/यस
         नऻल्य पलव ति आसिनॖ
2. मु: खून्तिस प्यठॖ खूंत
    अ: मुसीबथ यॆलि यिवान
         छु तॆलि च़्वपऻर्य
3.मु:ख्वर हय आसि बिल्कुल
         साफ़ तोति आसनस
         हथ फ्यफर
   अ: युस नाकारॖ आसि तस
         छु नॖ सोरुय ख्वचर
         कुनि रंगॖ ति च़लान
4. मु: खोसस निशॖ ग़ोसॖ क्या
    अ: युस क्वदरती कमज़ोर
         आसि तस निशि क्याह
         बऺड व्वमेद थवॖन्य
5. मु: खन्ड्य फ़ुट हिसाब
    अ: सु कारॖबार यथ पूरॖ
         हिसाब थवनॖ आसि नॖ
         आमुत
**********************
1. ख्वरचि ऒंगजि...Toe
2. ग्वड....... Ankle
3. खूर........Heel
4. नम........Nails
5. ब्वकवऺट...Kidney
6. शूशनोर....Lungs
7. म्यादॖ...... Stomach
8. माज़.......Skin
9. शाह रग...Wind pipe
10. रग.......Vein
**********************
    गीता ज्ञान :अध्याय-12
अगर च़्यॆ यूगॖ अब्यासॖ लगी नॖ मन, रोज़ म्यानि खऻतरॖ कर्म करान।
कर्मवान म्यॆ प्रावनॖच सॆदी प्रावान
वॊन भगवानन गीता ज्ञान
**********************
कर्म छु रोज़ुन करान। रॖतिस कर्मस छु रुत फल मेलान। यि छि वऻयिथ कथ। अमापॊज़ दपान पऺतिमि ज़न्मॖक्यन कर्मन हुन्द फल छु यॆमि ज़न्मॖ ति मेलान। लीखित ललाटस यूतुय छुय मेलान त्यूतुय इन्सानस, कस कोताह स्वख द्वख बूगुन छु छि ख़बर ॳकिस भगवानस। मगर रॖत्यन कर्मन छु रुत फल यि कथ छि तय। वुछव यॊदवय तॖ इन्सान छु अख कठपुत्लॖ तॖ नच़ान फेरान भगवान सॖन्दिस इशारस प्यठ। इन्सानस छु नॖ पानस ताम किंहीं। यथ ब्रह्माडस प्यठ अख नज़र योदवय त्रावव तॖ हऻरान गछ़व यि वुछिथ ज़ि सिरियि च़न्द्रमॖ तारख किथ पऻठ्य छि आकाशस मंज़ खड़ा मश्गूल छि सऻरीय पनॖनि पनॖनि गति विदियन मंज़। यिमन वुछ्य वुछ्य छु इन्सान ति पनॖन्य कर्म करान रोज़ान। मगर ज़रुरी छु ज़ि ईश्वरस सॗत्य गछ़्यस लय रोज़ॖन्य ति क्याज़ि तऺम्यसॖन्दिस मददतॖ सॗत्य छु यि इन्सान दम दम कडान।
**********************
"शिष्यानाम् मोक्षदानाय लीलया देहधारने।
सदेहापि विदेहाय तस्मै श्री गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

10.05.2019

10.05.2019 वह्यक (वैशाख) ज़ूनॖ पछॖ (शुक्ल पक्ष) शॆयम (षष्ठी) शॊकुरवार (शुक्रवार/जुम्मा),श्री सप्तार्षि सम्वत 5095, राश कर्कट (दुहचि 8.35 बजि प्यठॖ), ऋतु बसन्त (चलान)...अज़ छि कुमार शॆयम ति
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: खॊट मॊहर
    अ: सु शख्स युस नॖ कुनि
         कारस लगि
2. मु: खॊखॖ ब्रोर
    अ: च़र्यन्य-हार्यन्य च़लॖनावॖ
         नॖ बापथ ज़च्यन हुन्द
         इन्सान
3. मु: ख्वरस प्यठ ख्वर
    अ: वऻर्यदाथ/वकानॖ
4. मु: ख्वडॖ गुपुन
    अ: युस शख्स पनॖन्य कथ
         अंदरीयि रटि
5. मु: खॊव्रि अथॖछ कऻम
    अ: सऺहल कऻम/यथ नॖ
         कांह मुश्किल यी
**********************
1. न्यॊठ....Thumb
2. मंज़ अथॖ....Palm
3. ख्वनॖवठ..... Elbow
4. सीनॖ.....Chest/Breast
5. यड..... Belly
6. तून......Navel
7. कमर....Back
8. कॊठ.... Knee
9. ज़ंग......Leg
10. ख्वर....Foot
**********************
     गीता ज्ञान :अध्याय-12
अगर मन बासे ठीकरुन मुश्किल, यूगॖ अभ्यासॖ सॗत्य कर हऻसिल।
म्यॆ प्रावनॖच यछ़ा रोज़ करान
वॊन भगवानन गीता ज्ञान
**********************
यिथॖ पऻठ्य गछ़ि श्रान-ध्यान कऺरिथ पनॖनि दुहचि कामि लगुन। द्वह छु फ़्रूच़ न्येरान। यि छि अज़मऻवमॖच़ कथ। अगर गरि वख्त छु नॖ मेलान पाठ-पूज़ा करनॖ बापथ, मन गछ़ि नॖ व्वदास करुन। पकान पकान ति ह्यॆकिव तॊह्य ईश्वर ध्यान कऺरिथ। म्यॆ छु नज़रि यिवान ज़ि अज़कल छु इन्सान मिशीनी ज़िन्दगी मंज़ आमुत ॴड्रनॖ। मस्रूफियात छि बडेमॖच़ॖ। मान-मान छि लऺज्यमॖच़। इन्सानस छु  अज़कल न द्वह कुनि नॖ राथ। मगर यथ दवि-दवि मंज़ ति  छु ज़रूरी तस ईश्वर सुन्द नाव ह्यॊन येम्य ईश्वरन असि ज़न्म द्युत तॖ युस ईश्वर असि कऻम करनॖच ह्यमथ दिवान छु। दपान छि ख्वरबानॖ  लऻगिथ गछ़ि नॖ पाठ परुन।पज़र छु। मगर कॆंच़न जायन छि छूट। यॊदवय त्वहि याद आसिवॖ कऺशीरि मंज़ ॴस्य गणपतयारॖ सुबहन तॖ शामन आरती करान तॖ गणपतयार आमॖत्य भखॖत्य ॴस्य ख्वरबानॖ  लगऻविथॖय आरती करान या युस कांह मंदरस दॊहलि गछ़ान ओस सु ओस ख्वरबानॖ लऻग्यथॖय आराधना करान।  यूतुय योत नॖ, म्यॆ छु वुछॖमुत ज़ि कॆंह भख्तजन बसन मंज़ या ट्रेनन मंज़ पाटॖ किताब ख्वरबानॖ लऻगिथॖय परान आसान। वनॖनुक मतलब छु म्यॆ ज़ि बंद गछ़ि नॖ गछ़ुन। ईश्वर नाव ह्यॆकिव तोह्य कुनि सातॖ ति सॊरिथ कुनि जायि ति सॊरिथ। बस पनुन मन गछ़ि साफ़ थवुन, व्यच़ार गछ़न रॖत्य रोज़ॖन्य, कर्म यानि कामि गछ़न रॖति भावॖ सान करनि, बुथ गछ़ि असवुन थवुन, ड्यकॖ गछ़ि मुच़रिथ थवुन, दिल गछ़ि वॊथ थवुन, च़्ववापऻर्य वुछिव तॊह्य तॆलि बहारॖय बहार।
**********************
"नमामि सद्गुरुं शान्तं प्रत्यक्षं शिवरूपिणम्। शिरसा योग पीठस्थं धर्मकामार्थ सिद्धये।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

09.05.2019

09.05.2019, वह्यक (वैशाख) ज़ूनॖ पछॖ (शुक्ल पक्ष) पऻन्च़म (पन्चमी) ब्रसवार (वीरवार/ब्रहस्पतवार)श्री सप्तार्षि सम्वत 5095 राश मिथुन (चलान) ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: ख्यावुन छु नॖ रावान
    अ: कऻन्सि खऻर करुन छु
         नॖ ज़ायि गछ़ान
2. मु: ख्यनॖ म्यट नऻल्य ज़ऺट
         गऺयि बऺड दौलत
    अ: ज़िन्दगी हॖन्ज़ बुन्यऻदी
         ज़रूरथ पूरॖ गछ़ॖन्य
3. मु: ख्यनॖ मंज़ॖ व्वकुस
    अ: ॴसिथ बसिथ ति न
         कॆंह अथि युन
4. मु: खोसॖ ख्यन
    अ: सालॖ विज़ि प्रथ कुनि
         थफ दिन्य तॖ प्यूंता
         प्यूंता ख्यॊन
5. मु: ख्यनॖ वोलॖय ख्यॆयि न
         ख्यनॖ वोल क्याह करि
    अ: यस पानस ख्यनस
         हऻल आसि सुय छु
         ब्यॆयिस ति ख्यावान
**********************
1. हॊट..... Throat
2. गर्दन....Neck
3. फ्यॊक... Shoulder
4. फ्यॆक्य...Shoulders
5. नऺर.......Arm
6. नरि......Arms
7. हॊच़.....Wrist
8. कछ़.....Arm-pit
9. अथॖ.....Hand
10. ऒंगजि... Fingers
**********************
      गीता ज्ञान :अध्याय-12
म्यॆ मंज़ यॆलि मन ब्वद लगावख, अमि पतॖ म्यॆ मंज़ निवास करख
अथ मंज़ कांह समशय मॖ च़ॖ ज़ान
वॊन भगवानन गीता ज्ञान
**********************
अथस बुथ वुछिथ तॖ मंत्र पऺरिथ गछ़ि ज़ल-मल कऺरुन तॖ  बुथ अथॖ छलुन तॖ श्रान-वान करुन। श्रान करनॖ विज़ि गछ़ि भगवान सुन्द नाव स्वरान रोज़ुन। बंदिश छॆ नॖ ज़ि कऺमिस दीवी, दीवता या ग्वरॖ सुन्द नाव ह्यॆयिव मगर नाव ह्यॊन छु जान। यॊदवय योनि आसि लऻगिथ, श्रान पतॖ गछ़ि योनि छलुन तॖ यि मंत्र परुन
"ओम् भू र्भुव: स्व: तत् सवितुर् वरेण्यं, भर्गो देवस्य धीमहि, धियो यो न: प्रचोदयात्।"
श्रान करनॖ पतॖ छु ध्यान करुन ति त्यूतुय ज़रुरी यूत असि ज़िन्दॖ रोज़नॖ बापथ ख्यन छु ज़रूरी। ध्यान करनॖ सॗत्य छु दपान मनस छि शऻन्ती प्राप्त सपदान तॖ सत्-कर्म करनॖच लालसा बडान। जान जान कामि करनॖच वथ मेलान। ध्यान ह्यकव कऻन्सि ति दीवी दीवता सुन्द कऺरिथ। कऺशीरि मंज़ ओस आसान प्रथ गरस मंज़ पूज़ायि कुठ यथ वनान ॴस्य ठोकुर कुठ। सऻन्य ज़िठ्य ॴस्य सुब्हऻय सुब्हऻय श्रान-वान कऺरिथ ठोकुर कुठिस मंज़ ॳच़िथ पनॖनि पनॖनि हिसाबॖ भगवानस पूज़ान, सालेग्रामन पोन्य भावान, गन्टा वायान, शंख वायान तॖ तिमन सॗत्य सॗत्य ॴस असि ति आस्था बडान तॖ ॳस्य ति ॴस्य तिहॖन्द्यन क़दमन प्यठ पकान रोज़ान।
ठोकुर कुठ छु वुनि ति प्रथ गरस मंज़ नज़र यिवान, ल्वकुट या बॊड, मगर आसान छु अल्बतॖ गन्टा या शंख वायनॖच प्रथा छि कमॖय पाहन बासनस तल यिवान।
**********************
"अखण्ड मण्डलाकारं व्याप्तं येन चराचरम। तत् पदं दर्शितं येन, तस्मै श्री गुरुवे नम:।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

08.05.2019

08.05.2019 वह्यक (वैशाख) ज़ूनॖ पछॖ (शुक्ल पक्ष) च़ोरम (चतुर्थी) ब्वदवार (बुधवार) श्री सप्तार्षि सम्वत 5095,राश मिथुन (चलान) ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: ख्यॊन द्युन प्वलावॖ तॖ
         अथॖ छलुन ग्रॖमिथ
    अ: जान कऻम कऺरिथ स्व
         मोमूली कथि सॗत्य
         रावॖरावॖन्य
2. मु: ख्यॊन च्यॊन छु पानस
         पानस पामॖ छि  बऻग-
         रऻविथ
   अ: ख्यवान छि ॳस्य पनॖनि
         मर्ज़ी मुतऻबिक अमा
         पॊज़ कॖठ छि कडान
         ब्यॆयिस
3. मु: ख्यॊन गछ़ि त्युथुय युथ
         ब्यॆयिस ख्वश यी
  अ: ख्यनॖ च्यनॖक्यन आदतन
        प्यठ छि ब्यॆयिसॖन्ज़
         नज़र आसान
4. मु: ख्यॆ गऻव गासॖ धर्मॖकि
         पासॖ
    अ: यॆलि कऻन्सि वसीलॖ
         अनिथ ज़ारॖपारॖ करव
5. मु: ख्यमस खार होरस नॖ
         हार
    अ: ख्वदग़र्ज़ इन्सान/
         कऻन्सि सिरिफ़ फऻयदॖ
         तुलुन अथॖरॊट नॖ करुन
**********************
1. लाल....Eye-ball
2. टोर..... Eye-lid
3. नस....  Nose
4. नकॖवोर... Nostril
5. नकॖवऻर्य...Nostrils
6. ज़्यव..... Tongue
7. दंद(अख)...Tooth
8. दंद (वारियाह)...Teeth
9. बुथ.......Face
10.  बुथ्य-लब...Cheek
**********************
    गीता ज्ञान :अध्याय-12
म्यॆ मंज़ मन लगावन वऻल्य प्रेमी, मृत्य लूकॖ सम्सार म्वकॖलान छि
छुस यिमन पानॖ उदार करान
वॊन भगवानन गीता ज्ञान
**********************
खुली प्रभातन ॳछ यॆमिसातन परनुय गछ़ि तमि सातन, हरि ओम् तत्सत्, हरि ओम् तत्सत्। ति क्याज़ि, दपान छि दीवॖ लूकस मंज़ छि यिवान प्रभातनॖय दीवी दीवताहन कऻम बऻगरावनॖ तॖ तॖ तवय छि दपान ज़ि असि पज़ि ब्रह्म मुहूर्तस न्यॆन्दरि व्वथुन तॖ हरि ओम् तत्सत् मंत्र पऺरिथ पनॖन्यन द्वनवऺनी अथन बुथ वुछान वुछान परुन "कराग्रे वस्ते लक्ष्मी कर मध्ये सरस्वती, करमूले स्थितो गोविन्दा (या ब्रह्मा) प्रभाते कर दर्शनम्।।" कर छु संस्कृत शब्द माने अथॖ। अमि मंत्रुक माने छु ज़ि अथकिस ब्रुहमिस हिसस मंज़ छि लक्ष्मी हुन्द वास यानि लक्ष्मी रोज़ान, अथॖकिस मंज़्यमिस हिसस मंज़ छु सरस्वती हुन्द वास तॖ अथॖकिस मूल माने शुरुकिस हिसस मंज़ छु गोविन्द यानि कृष्णॖसुन्द यानि विष्णुसुन्द या ब्रह्मासुन्द वास, प्रभाते माने सुबॗ प्यठय दर्शनम माने वुछनॖ सॗत्य। माने सुबहऻय अथस बुथ वुछिथ छुस बॖ लक्ष्मी, सरस्वती तॖ विष्णु सुन्द दर्शुन करान। दपान यॆलि कऻन्सि जान इन्सानसुन्द बुथ सुबहऻय वुछव द्वह छु फ्रूच़ यानि जान नेरान। यॆलि पनॖनिस अथस आसि बुथ वुछमुत, तमि पतॖ कऻन्सि हुन्द ति बुथ वुछव तऺम्युक छु नॖ कांह बद असर प्यवान
**********************
"ओम् प्रणतोsस्मि महादेव प्रपन्नोsस्मि सदाशिव निवारय महामृत्युं मृत्युंजय नमोस्तुते।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

07.05.2019

07.05.2019 वह्यक (वैशाख) ज़ूनॖ पछॖ (शुक्ल पक्ष) त्रय (तृतीय) बॊम्वार (मंगलवार), श्री सप्तार्षि सम्वत 5095, राश मिथुन (रऻच़ हॖन्ज़ॖ 4.14 बजि प्यठॖ)
ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: ख्यमॖहऻ छुम नॖ मऻल
         ख्यमॖ नॖ मश्यम हऻल
    अ: ख्यनस कांह न तॖ कांह
         बहानॖ छ़ान्डुन
2. मु: ख्यव-च्यव रंगॖ च़रि
         कऻन्टुर लॊग वालॖ-बरि
    अ: राह कस तान्य तॖ रटान
          कस तान्य
3. मु: ख्यॆल्य कठ
    अ: अक्लि रॊस व्यॊठ-पूठ
          इन्सान
4. मु: ख्यथ ति ख्यनचॖय कल
    अ: सिरिफ़ ख्यनची परेशऻ
         नी
5. मु: ख्यथ ति बारव न
         ख्यथ ति बारव
    अ: कुनि पऻठ्य नॖ रऻज़्य
          गछ़ुन
**********************
1. मस.....Hair
2. बुम्मॖ.... Eyebrows
3. गोंछ़.... Moustaches
4. दऻर...Window/Beard
5. अछरवाल...Eye-lash
6. कलॖ.....Head
7. ड्यक... Forehead
8. ॳछ.....Eye/s
9. कन.....Ear/s
10. ॴस...Mouth
**********************
       गीता ज्ञान :अध्याय-12
यिम सऻरी कर्म करन म्यॆ अर्पण, भक्ति भावॖ म्यॆ लगातार स्वरन
स्वगन रूपॖ यिम म्योन ध्यान दारान
वॊन भगवानन गीता ज्ञान
**********************
कमरस मंज़ अच़ुन ख्वरबानॖ लऻगिथ छॆ नॖ सऻन्य परम्परा।
कमरिकिस दरवाज़ॖ-दासस न्यॆबरय ॴस्य चपॖन्य या बूठ ख्वरव मंज़ॖ कडान तॖ अदॖ ॴस्य कमरस यानि कुठिस अंदर अच़ान। बालॖ यपारि गव नॖ म्यॆ कमरॖकि दरवाज़ुक दास यिथॖ पऻठ्य नज़रि कॆंह। व्वंय छि सऻरीय ख्वरॖबानॖ लऻग्यथॖय कमरन मंज़ अच़ान रोज़ान अल्बतॖ कॆंच़न गरन मंज़ वुछिम यि रिवायत ज़ि तिम छि पनुन ख्वरबान कमरस मंज़ ॳच़्यथॖय दरवाज़स नखॖ लबि कुन कऺडिथ अदॖ अंदर अच़ान। कमरस या कुठिस मंज़ ख्वरबानॖ च़ानुन छि अज़कल अख मजबूरी तिक्याज़ि ॳस्य बालॖ यपारि यिथ व्वंय फ्लैटन मंज़ आमॖत्य रोज़ान तॖ दरवाज़न न्यबर छे नॖ जाय मेलान खवरबानॖ थवनॖ बापथ। हां यिमन गरॖ फ्लैटव बगऻर छि तिमन छि नॖ दरवाज़ॖ-दास म्यॆ यॊत ताम ज़्वन छु। अज़कल छि व्वंय सऻन्य चोकॖ यानि सऻन्य किचन तमि आयि यॆति व्वदॖन्य व्वदॖन्य रूज़िथ छि बतॖ-स्युन रनान करान। कुनि कुनि गरस मंज़ छि तथ चोकस या किचनस मंज़ कॆंह गरिक्य बऻच़ ख्वरबानॖ ह्यथ ति अंदर-न्यबर करान रोज़ान यि सूंचिथ शायद ज़ि किचन छु स्टैंडिग यानि थॊद तॖ ख्वरबानॖ लऻगिथ अंदर अच़नस छु नॖ हर्जि कांह। मगर सऻन्य संस्कृती छे नॖ यि। ख्वरबानॖ यानि बूठ या चपॖन्य लऻगिथ गछ़ि नॖ कुठिस मंज़ अच़ुन तॖ न गछ़ि चोकस यानि किचनस मंज़ ख्वरबानॖ लऻगिथ अच़ुन। अल्बतॖ तॊह्य ह्यॆकिव चोकस मंज़ कांह स्लीपर या चपॖन्य इस्तिमाल कऺरिथ मगर सु ख्वरबानॖ गछ़ि नॖ दालुव यानि चमडूक बन्योमुत आसुन तॖ किचनुक ख्वरबानॖ गछ़ि किचनस मंज़ॖय इस्तिमाल करुन आज़र बाज़र बापथ नॖ। म्यॆ छु बासान असि मंज़ छि वारियाह लूख यि प्रथा थऺविथ। यिम नॖ करान छि म्यऻन्य ॳज़िच राय छि तिहन्दि बापथ
**********************
"ओम् नम: ‌शम्भवाय च, मयोभवाय च, नम: शंकराय च, मयस्कराय च, नम: शिवाय च, शिवतराय च।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

06.05.2019

06.05.2019, वह्यक (वैशाख) ज़ूनॖ पछॖ (शुक्ल पक्ष), द्वय (द्विती) च़ऺन्दॖरवार (सोमवार),श्री सप्तार्षि सम्वत 5095,राश वृष (चलान),ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: ख्यथ-च्यथ शोंगुन
         शान्द दिथ ल्वगुन
    अ: यॆलि नॖ ख्यनॖ-च्यनॖ
         वरऻय कांह कऻम आसि
2. मु: ख्यनॖ बुलबुल पकनॖ
       पऻज़ तॖ गन्ड नॖ ग्वसऻन्य
    अ: सु शख्स युस कम
         ख्यवान आसि/पलवन
         दलवन लोर आसि नॖ
         तॖ कऻम करनस मंज़
         तेज़ आसि
3. मु: ख्यनॖ-च्यनुक यार
    अ: मतलबी इन्सान
4. मु: ख्यनॖ ख्यवान तॖ व्यनॖ
         डऻल्य डऻल्य
    अ: न्यॆबॖर्य बेमऻल लागुन
         मगर ख्यॊन बॆ-वायि
5. मु: ख्यनॖ म्यूठ पॊज़ होरुन
         ट्यॊठ
    अ: सु मज़दार चीज़ युस
         ख्वश करि अमापॊज़
         असर नाकारॖ आस्यस
**********************
1. हश... Mother-in-law
2. ह्युहुर... Father-in-law
3. पितुर-बोय... Cousin
                        brother
4. पितॖर-ब्यॆनि... Cousin
                        Sister
5. बाबथॖर ...... Nephew
    (बऻयसुन्द न्यॆचुव)
6. बावॖज़ॖ.......Niece
    (बऻयसॖन्ज़ कूर)
7. माम......Maternal
                 uncle
8. माम्यन.... Maternal
                    aunt
9. मास ....... Cousin
          (Mother's sister)
10. प्वफ......Cousin
          (Father's sister)
**********************
       गीता ज्ञान  :अध्याय-12
निराकार ब्रह्मस मंज़ मन लगावुन, छु सादनाय कुन मुशकिल आसुन
यि गऺती मनुष्य दॊखॖ सान प्रावान
वॊन भगवानन गीता ज्ञान
**********************
अंग्रेज़व त्रऻव सानि ज़ाच़ प्यठ अख सऺन्य छाप। ज़बऻन्य रंग्य, पलवव-दलवव रंग्य, ख्यनॖ-च्यनॖ रंग्य, व्वथनॖ-ब्यॆहनॖ रंग्य, मेलनॖ-जोलनॖ रंग्य, परनॖ-ल्येख्नॖ रंग्य यानि प्रथ रंगॖ छु असि अंग्रीज़ सऺनिथ गोमुत। ॳछ मॖच़रऻविथॖय छि ॳस्य नमस्कार बदलॖ गुड म्वार्निंग करान। गुड म्वार्निंग माने वुछव तॖ यि गव शुभ प्रभात यानि जान-सुब, व्वंय अगर ॳस्य नमस्कारुक माने वुछव तॖ अम्युक माने छु हना गूड यानि स्यठाह सॊन।
तिज़न गव ज़ि नमस्कार छु निवान असि अध्यात्मस कुन यकदम। नमस्कार छु द्वन शब्दन हुन्द मेल यानि नम:+आकार: (नमस्कार)। माने बॖ छुस नमन करान तुहन्दिस आकारस। यानि ॳस्य छि वनान ज़ि भगवान छु निराकार मगर ॳस्य छि वुछान इन्सानस मंज़ भगवान सुन्द रूप-रंग यि ज़ऻनिथ ज़ि युथुय आसि तऺम्यसुन्द आकार ति क्याज़ि इन्सान छु भगवान सॖन्ज़ रचना। इस्लिये छुसय च़्यॆ मंज़ भगवान सुन्द आकार ज़ऻनिथ च़्यॆ नमन करान। गव नमस्कार करनॖ सॗत्य छु आत्मॖबल बडान, ईश्वरस मंज़ आस्था बडान, इन्सानस ति मान तॖ यज़थ बडान, नमन करनॖ सॗत्य छु अहम् यानि अहंकार दूर गछ़ान  वगैरा वगैरा। नमस्कार करुन छु सऻन्य संस्कृति। असि पज़ि पनॖन्यन शुर्यन यि ह्यॆछनावुन तॖ गुड म्वार्निंग वनुन मऺशरावुन।गुड म्वर्निंग करुन छु नॖ वऻजिब तऻजुब छु ॳस्य छि नॖ बाज़ यिवान। यिथय पऻठ्य छु बकाया चीज़न हुन्द तऻसीर ब्यॊन ब्यॊन बस परखावनुक छु ज़रूरत।
**********************
"सप्ताश्वारथमारूढं प्रचण्डं कश्यपात्मजम्, श्वेतपद्य्मधरं देवं तं सूर्यं प्रणमाम्यहम्।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्र पऻठ्य पानवॖन्य कथबाथ करव
**********************
 नऺविव तॖ फॊलिव
  भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

05.05.2019

05.05.2019, वह्यक (वैशाख) ज़ूनॖ पछॖ (शुक्ल पक्ष) ऒक्दॊह (प्रथमा/ प्रतिपदा) आथवार (एतवार/ रविवार),श्री सप्तार्षि सम्वत 5095, राश वृष (रऻच़ हॖन्ज़ॖ 10.29 बजि प्यठॖ), ऋतु बसन्त (चलान)
**********************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**********************
1. मु: गरॖ प्यठुक ज़ामतुर गव
         बरॖ प्यठुक हून
    अ: खानि दामादस छॆ नॖ
         क़दॖर करनॖ यिवान
2. मु: ग्रकवुन्यन बानन शीन
    अ: ॴखरी मरहलस प्यठ
         वकानॖ गछ़ुन/कऻम
         मुकमल गऺछ़िथ पतॖ
         मुसीबत युन
3. मु: गरॖ करेयो अनि कानि
         गरॖ रोव मान मानि
   अ: मान मानि छु गरॖ वऻरान
         गछ़ान/अगर गर बऻच़न
         मंज़ कथ आसि कांह
         अख ति ह्यकि ख़ान-
         दऻरी कऺरिथ
4. मु : ग्रटस तल फॊस
    अ: कऻन्सि तल लॊगमुत
         आसुन/कऻन्सि हुन्द
         आवेज़ आसुन
5. मु: ग्रॗस्तिस नय फ़ार्सी तॊग
         मारुन मा वोत
    अ: कऻन्सि हय व्वपर
         ज़बऻन्य मंज़ कथ तऺज्य
         नॖ करॖन्य राह कुस
         खाल्यस/अनज़ान
         आसुन छु नॖ पाम या
         ग्वनाह
**********************
1. न्यॆचुव......son
2. कूर.... Daughter/
               Girl
3. पॆतॖर....Uncle
4. पॆच्यॆन्य...Aunt
5. बॆमॖ.... Brother-in-law
6. हऺहऺर...Brother-in-law
7. भाभी...Brother's wife
                Sister-in-law
8. दॖरॖकाकन्य..Husband's
            brother's wife/
            Sister-in-law
9. ज़ाम....Husband's
            sister/Sister-in-
            law
10. द्रुय.... Husband's
                 brother/
            Brother-in-law
**********************
   गीता ज्ञान  :अध्याय-12
म्यॆ अविनाशस लगातार स्वरान, सारिनॖय ज़ीवन हुन्द रुत कांछान।
सु सम भाव यूगी म्यॆ प्रावान
वॊन भगवानन गीता ज्ञान
**********************
अंग्रीज़ ज़बऻन्य सॗत्य छु लूकन ख़ास लगाव वुछनस मंज़ यिवान। पनॖन्यन शुर्यन अंग्रीज़ ह्यॆछनावुन छि तिमन पनॖन्य शान बासान। ह्यॆछनावुन छु नॖ नाकारॖ मगर पनॖन्य माजि ज़्यव मऺशरऻविथ व्वपर ज़्यव ह्यॆछनावुन छु नॖ जान पनॖनि समाजि खऻतरॖ।
चाहे सु कांह ति समाज आसि। रिश्तन छु अंग्रीज़ ज़बऻन्य मंज़ त्युथ वर लॊगमुत ज़ि अथ मंज़ छु ओंखरिस मंज़ जोंखुर नज़र यिवान। सु ज़न गव पितुर, मामतॖर, मासतॖर या प्वफतॖर बापथ छु अकि लफ्ज़ॖ सॗत्य कऻम नेरान सु गव (cousin). कज़िन शब्द लागनॖ सॗत्य छि सऻरी रिश्तॖ ॳक्यसॖय मालि फऺलिस मंज़ त्रॊम्बरिथ गछ़ान। यिथय पऻठ्य छु ब्याख लफ़ॖज़ (in law)। यि लफ़ज़ ति छु सान्यन रिश्तन दूर्यर दिवान।
बॆमस तॖ हऺहरस कुनुय करान।ज़ऻम तॖ दॖरकाकॖनि कुनुय करान। ब्याख लफ़ॖज़ छु (Uncle/Aunt)। ॳम्य लफ़ज़न ति मऺश्यरोव असली रिश्तन हुन्द महत्व। यिम लफ़ज़ पनॖनि कथि बाति मंज़ वर्तावनॖ सॗत्य रोव सान्यन रिश्तन हुन्द व्यकारॖय। अमि वजह सॗत्य छु म्यॆ बासान सान्यन शुर्यन हॖन्दिस प्रेम व्यवहारस या मॆहमान नवऻज़ी
मंज़ छि अख दरार पऻदॖ गऻमॖच़ य्यॊस सानि संस्कृति प्यठ स्यठा सॊन असर छि करान आमॖच़। अथ प्यठ छु सौंच विचार करनुक ज़रूरत।
**********************
"ओम् भास्कराय विद्य्महे, सहस्त्र रशमिये धीमहि, तन्नो
सूर्यो प्रचोदयात्।।"
पऺरिव यि मंत्र ति दॊहय
**********************
कऻशुर ह्यॆछव कऻशुर परव
कऻशिर्य पऻठ्य पानवॖन्य कथबाथ करव
**********************
नऺविव तॖ फॊलिव
 भूषण कौल "दीप"
(बूज़िव अज़्युक सबक़ म्यानि ज़्यॆवि ति)
(koshursabak.blogspot.com ति वुछिव)