23.02.2020

23.02.2020, फाल्गुन (फाल्गुन) गटॖ पछॖ (कृष्ण पक्ष) मावस (अमावस्या) आथवार (रविवार/एतवार),श्री सप्तर्षी सम्वत 5095, राश कुम्भ (चलान) ऋतु शिशर (चलान), द्रठपऻन्च़ुक (पंचक)(चलान)...अज़ छि डून्य मावस तॖ डून्य परमूज़ॖन्य
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
            गुरु स्तुति       
श्री गुरुम्परमानन्दम् वन्दाम्यानन्द विग्रहम।
यस्य सान्निध्यमात्रेण चिदानन्दायते पुमान।।
**************************
            लल वाक्     
हा च़्यॆता कवॖ छुय लॊगमुत परमस
कवॖ गॊय अपज़िस पज़्युक ब्रौंत
दुशि-बॊज़ वश कॊरनख पर-धर्मस
यिनॖ गछ़नॖ ज़्यनॖ-मरनस क्रोंत
           ************
अर्थात:- हे चित्त तू औरों की ओर क्यों आसक्त हुआ है? क्यों झूठ में सच की भ्रांति हुई तुझे? (तुम में) बुद्धि की कमी है जिसने तुझे पर- धर्म के वश कर रखा है। (जभी तो) तू आवागमन और जन्म मरण के जाल में उलझा हुआ है।
**************************
            नुंदॖ ऱेशिन्य श्रुक्य 
फकिर छुय दॊज़खस वुरुन ठोरो
फकिर छुय अंबियाहन हुन्दुय ख्वय
फकिर छुय उलुग तॖ पुलग च़ॊरो
फकिर छुय मुशिख तॖ ख्वशबॊय
फकिरस प्यठ युस रूद दॊरो
तस छुय यॆति क्या तति ओबिरॊय
        *************   
माने:- फऺकीरी छय दोज़खस पर्दॖ तॖ अम्बियाहन हुन्द स्वबाव। फऺकीरी या युस दयस याद करि तस छु यॆति ति तॖ तति ति हुर्यॆर तॖ पूर्यॆर।फऺकीरी छॆ मुशिक तॖ ख्शबू। युस दय वतॖ छ़ारनस प्यठ थ्यर रोज़ि तस छु यॆरिलूक्य ति तॖ परलूक्य ति यज़्ज़त तॖ मान। सु छु अज्ञऻनियन ति पानस कुन हऺरिथ दय वति कुन लागान।
**************************
पंचान्ग:- हेरऺच़ गव युहुस दु-च़्यॊत दपान मगर डून्य मावस छि कुनी वुन्यखताम। अज़ छि डून्य परमूज़िन्य। हेरऺच़ किस ॳकिस हिसस वोत अंद तॖ दॊयिम हिस्सॖ गव शुरु यानि डून्य परमूज़ॖन्य, डून्य बऻगरॖन्य, तीलॖ ॴठम द्वह जतूं तूं करुन वगैरा वगैरा। व्वंय छि सुझाव यिवान ज़ि "सलाम" नावस बदलावव यि नाव तॖ यि द्वह दपान मनावव ब्यॆयि कुनि नावॖ सॗत्य। अथ नावस छि यिवान दपान पर-ज़ऻच़ हॖन्ज़ मुशिक हिश। हालांकि बॖति तॊरुस सत्तथि अपोर तॖ "सलामि" नावॖ सॗती आयि यि द्वह मनावान मगर व्वंय छु बासान यि नाव म्यान्यन कॆंच़न बायन यिहोय व्वपर नावा ह्यु। व्यच़ार करनस छु नॖ हर्जॖ कॆंह। सलामि द्वह ॴस्य ॳस्य पनॖन्यन शुर्यन हेरच़ ख़र्च दिवान तॖ तिम ॴस्य करान छॊन्याह-टॊन्याह। फिल्मा-विल्मा वुछान तॖ ख्यनाह च्यनाह करान। डून्य मावसि द्वह डून्य परमूज़िथ ॴस्य ॳस्य यारबल वसान तॖ नावि हऻन्ज़स ॴस्य वख अकि कऺशीरि मंज़ ज़ॖ च़ोर डून्य दिवान तॖ सु ओस करनावान नावि सऻराह। बाज़े ओस सु असि व्यथि अपारि-यपोर तार दिवान। सु हऻन्ज ओस तिमन च़्वन-पान्च़न डोन्यन पतॖ मॊत गछ़ान। यारबलन प्यठ ओस ॳज़्यकि द्वह जॆशिन लगान। डून्य मावॖसि द्वह ॴस्य यारबलॖ फीरिथ ब्रांदॖ दरवाज़स प्यठ ठुक ठुक करान। च़्वॊपऻर्य ॴस्य बट्टॖ नज़र यिवान। असि रऻव्य तिम यार ति व्वंय,  यानि सोमयार, द्रऻब्य-यार, गणपयार, मलयार, खरॖयार, डल्हसनयार, क्रालॖयार, मूत्यार, शिष्य-यार वगैरा वगैरा। व्वंय रूज़ यि अख कथा बऺनिथ सान्यन किताबन मंज़ तॖ ज़ानि दय कुस परि तॖ कऺमिस परनावन। ज़ानि दय कर तॖ कॗतिस कालस रोज़ि ज़िन्दॖ यि कथ किताबन मंज़ ति। सऻन्य शुर्य परन यिम सऻर्येय कथॖ व्वंय किताबव प्यठय। न रूद्य सऻन्य ज़िठ्य तॖ न रोज़व ॳसीय। न यिन तिम द्वह ब्यॆयि व्वंय फीरिथ ज़ांह।कॆंच़ॖ कऻल्य पतॖ आसॖ न च़ॖ कांह तॖ न बॖ कांह। ज़ान ग़नीमथ यॊदवय वुनि मॆलान छु स्यॆदि बुथि कऻन्सि कांह।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)