19.02.2020

19.02.2020,फाल्गुन (फाल्गुन) गटॖ पछॖ (कृष्ण पक्ष) काह (देवादेव) (एकादशी) ब्वदवार (बुधवार), श्री सप्तर्षी सम्वत 5095, राश धनु (चलान) ऋतु शिशर (चलान)...अज़ छि गाडॖ काह..ॳज़्यकि प्यठॖ छु चिल्लॖ बच्चॖ शुरु तॖ रोज़ि दऺहन दॊहन
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
             गुरु स्तुति
नमस्ते नाथ, भगवन् शिवाय गुरु रूपिणे
विध्यावतार संसिद्धयै सवीकृतान एक विग्रह:
**************************
             लल वाक्     
द्वादशांत मंडल यस दीवस थजि
नासिकॖ पवन दऻर्य अनाहत रव
स्वयम कलप अनतिह च़जि
पानय सुह दीव तॖ अरचुन कस
          *************
अर्थात:- जो सांस खेंचकर द्वादशांत मंडल या ब्रह्मरंथ (सहस्रार में जो देव का स्थान है) मैं अनाहत शब्द एवं प्रकाश का अनुभव करता है, स्वयं ही उस की कल्पनाएं समाप्त अर्थात शांत हो जाती हैं। स्वयं वही देव है। जब उस तथ्य का आभास हो गया तो फिर पूजा किस की करनी?
**************************
           नुंदॖ ऱेशिन्य श्रुक्य 
कम सना न्येन्द्रि हऺत्य वुदी
कम सना नॆशिबॊदी ब्यॊन
कम सना लोलॖ ॳशकॖनि दऺदी
कम सना सास तॖ कम सना स्वन
कम सना मरनस ब्रौंठुय मूदी
ॴसी सास तॖ सपनी स्वन
           ********
माने:- कम न्यॆन्दरि हऺत्य छि हुशार गऻमॖत्य कम छि पज़र ज़ानॖनॖच वति मंज़ अंज़ऻन्य, कम सना दऺद्य ॳशकॖ नारस मंज़ कम छि गफलॖच़ मंज़ रूज़िथ सरतलि बराबर तॖ कम सना छि सरतल ॴसिथ स्वन बन्यॆमॖत्य। कम सना पनॖनि व्यच़ारॖ सॗत्य मरनॖ ब्रौंठॖय मूद्य तॖ सरतल यानि अज्ञऻन्य ॴसिथ बन्यॆयि स्वन कर्मव। कमव अज्ञऻन्यव ज़ोल पनुन अज्ञान ज्ञानॖ नारस मंज़ तॖ च्योख ज़ऻन्य म्वय।
**************************
पंचान्ग:- यॆलि नॖ स्वन त्यॆलि कन, यॆलि नॖ कन त्यॆलि स्वन। अज़कल छि व्यछ़य सऻनिस समाजस मंज़ कऻशिर्य ब्रह्मनन हॖन्ज़। कऺशीरि मंंज़ वख्तॖ अकि ओस क्वलॖ ब्रह्मुन आसान। सऻन्य रसम, संस्कार ओस सुय अंद वातनावान। ज़्यनॖ प्यठॖ मरनातस ताम। वॊहरवोद, श्रान-स्वन्दर, काहन्यॆथॖर, मैखला, मंज़िमयारज़, खान्दर वगैरा ओस क्वलॖ ब्रह्मुनुय पूरॖ करान पनॖनि शास्त्रात दऺस्य। अमि अलावॖ ओस करान अन्तेष्टि, हेरऺच़ पूज़ा, गृह प्रवेश यि दऺप्यज़ि ति शुरु प्यठॖ अंदस ताम ओस क्वलॖ ब्रह्मुन असि सॗत्य सॖत्य आसान। ॳस्य ति ॴस्य नरि-ज़ंगॖ वाहरऻविथ बॆग़म पऻठ्य पनॖनिस धर्मस-कर्मस मंज़ यछ़ तॖ पछ़ थऺविथ पनॖन्य द्वह कडान। ॳमिस क्वलॖ ब्रह्मनस ॴस्य सारिनी यॆज़मनन हुन्द फिरिस्थ बऺनिथ आसान ज़ि कऺमिस यॆज़मनस कमि द्वह कुस कार्यक्रम छु तॖ तमी हिसाबॖ ओस तऺमिस ब्रह्मनस पनुन कारॖबार ति पकान मगर वख गव पकान, अथ कार्यक्रमस आव छ़्यन किथताम पऻठ्य। यि छ़्यन लॊग यूत ज़ि न रूद्य तिम यॆज़मनॖ तॖ न क्वलॖ ब्रह्मन। हालांकि सऻनिस समाजस मंज़ आयि अथ कारस मंज़ नकली व्यवस्था करनॖ मगर पज़र छु यि ज़ि सु तसली छु नॖ यिवान मनस युस तथ वख्तस मंज़ ओस यिवान। अज़कल गव यि पशॖ प्यठॖ शीन वालुन तॖ पनुन दोद अंदरी च़ालुन। हेरच़ पूज़ा करनॖ बापथ छि कॆंह म्यऻन्य बऻय कऻशुर ब्रह्मन छ़ान्डान मगर मेलान छुख नॖ कुनि। यिम नज़रि तल छि तिमन छि थपॖ-थफ। तिमन छु नॖ यूत समय ज़ि तिम वातन प्रथ ॳकिस। अख अनार तॖ सौ बीमार। करव हय तॖ करव क्याह। कथ छि जऻरी।
अज़ छि गाडॖ काह। रीथ छि ज़ि ॳज़्यकि द्वह छि गाडॖ रनान तॖ ख्यवान। हेरच़ प्यठ छि वटुक राज़स पूज़ा करान। यि छि भैरव पूज़ा दपान आसान तॖ कॆंच़न गरन मंज़ छि हेरच़ प्यठ न्यॆन्यन हॖन्ज़ ति प्रथा, कॆंह छि वैष्णव तॖ कॆंह छि गुर्यिट। ब्यॊन ब्यॊन रीत रिवाज छि यिवान वर्तावन यथ द्वहस प्यठ। ॳज़्यकि द्वह गऺयि शिव जियिन्य आराधना करॖन्य तॖ मंगान रोज़ुन पनुन अनुग्रह तऺमिस शिवस हलम दऻर्य दऻर्य। हेरथ मऻज्य आयि, गरॖ सोन आयि। हेरथ मऻज्य आयि।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)